އަމީނީ މަގުގެ ޓްރެފިކް ޕޮލިސް ކައިރީގައި ސައިކަލްތަކަށް ޕާކްކުރެވޭނެ ޕާކިން ޒޯނެއް ހަދައި ނިންމާލައިފިއެވެ.
ސިޓީ ކައުންސިލުން ވިދާޅުވީ މާލޭގައި މިނީ ބަހުގެ ޚިދުމަތް ފެށުމަށްޓަކައި ކުރަމުން އަންނަ މަސައްކަތުގެ ތެރެއިން އަމީނީ މަގުގެ ޓްރެފިކް ޕޮލިސް ސްޓޭޝަން ކައިރީގައި ހެދި ޕާކިން ޒޯންއަކީ 335 ސައިކަލަށް ޕާކްކުރެވޭނެ ޒޯނެއްކަމަށެވެ.
އަންނަ ހޯމަ ދުވަހު މާލޭގައި މިނީ ބަހުގެ ޚިދުމަތް ފަށާއިރު، ބަހުގެ ރޫޓުތެރޭގައި ހިމެނޭ މަޖީދީމަގާއި ފަރީދީ މަގުގައި ހުރި ވެހިކަލްތައްޕާކް ކުރެވޭނެ އިންތިޒާމްތައް ހަމަޖެއްސުމަށްޓަކައި އެ ސަރަހައްދުތަކުގައި އަންނަނީ ޕާކިން ޒޯންތައް ތަރައްޤީ ކުރަމުންނެވެ.
ޕާކިންގ އިތުރުކުރުމަށް ބިން ދީފައިވަނީ، ހ.ސަމޯސާވިލާ ގެއިންނާއި، ހައިކޯޓު ކުރިމަތިން އޮންނަ ބިމާއި، އަމީނީމަގުން ދަރުބާރުގެ ކައިރީގައި އޮންނަ ރުއްގަނޑު ސަރަޙައްދާއި މާފަންނުން ކޮރަލް ބޮލެވަރޑް ސަރަޙައްދުންނާއި، އަދި މަޖީދީމަގުން ހީނާމާގެއާއި ބިއްލޫރިޖެހިގެއިންނެވެ. މީގެ އިތުރުންވެސް އިތުރު ބައެއް ބިންތައް މިކަމަށް ދޫކުރުމަށްވަނީ ހަމަޖެހިފައެވެ.
މިނީ ބަހުގެ ޚިދުމަތަށް 18 ބަސް މާލޭގައި ބޭނުންކުރާނެއެވެ. އޭގެތެރެއިން 8 ބަހުގައި ފުރޮޅުލީ ގޮނޑީގައި އުޅޭ މީހުންނަށްވެސް ފަސޭހަ ކަމާއެކު ދަތުރުކުރެވޭނެއެވެ. ބަސް ދަތުރު މައިިގަނޑު 3 ރޫޓަކުން ބާއްވާނެއެވެ. އެއީ ސޯސަން ރޫޓް، އަމީނީ ރޫޓް އަދި އޯކިޑް ރޫޓެވެ. ސޯސަން ރޫޓްގައި 8 ސަރަޙައްދަކަށް ބަސް މަޑުކުރާނެއެވެ. އަމީނީ ރޫޓް އަދި އޯކިޑް ރޫޓްގައި 18 ސަރަޙައްދަކަށް ބަސް މަޑުކުރާނެއެވެ.
މިނީ ބަހުގެ ދަތުރުގެ އަގު 7 ރުފިޔާއަށް ސަރުކާރުން ކަނޑައަޅާފައިވަނީ އާއްމުންނަށް ވީހާވެސް ހެޔޮ އަގެއްގައި އަތްފޯރާ ފަށުގައި ދަތުރުކުރެވޭގޮތަށެވެ. ބަހުގެ ޚިދުމަތުގައި ސްކޫލް ކުދިންނާއި 65 އަހަރުން މަތީގެ މީހުންނާއި، 3 އަހަރުން ދަށުގެ ކުދިންނާއި، ޚާއްސަ އެހީއަށް ބޭނުންވާ މީހުންނަށް މުޅިން ހިލޭ ދަތުރުކުރެވޭނެއެވެ. މިއީވެސް ބެލެނިވެރިންނާއި އާއްމު ރައްޔިތުންނަށްވެސް ލިބޭ ބޮޑު ލުޔެކެވެ.