ރާއްޖެ ޓްރާންސްޕޯޓު ލިންކް (އާރްޓީއެލް)ގެ ޓެސްޓު ދަތުރުތައް ށ.އަތޮޅުގައި ފެށުމުން މިހާތަނަށް 600އަށްވުރެ ގިނަމީހުން ދަތުރުކޮށްފައެވެ.
ރާއްޖެ ޓްރާންސްޕޯޓް ލިންކަށް އަހުލުވެރިކުރުމުގެ ދަތުރުތައް ށ.އަތޮޅުގައި ފާށާފައިވަނީ މިދިޔަ މަހުގެ 30ވަނަ ދުވަހުގައެވެ.
ރާއްޖެ ޓްރާންސްޕޯޓް ލިންކަށް އަހުލުވެރިކުރުމުގެ ދަތުރުތައް ށ.އަތޮޅުގައި ފަށައިގެން ޝެޑިއުލާ އެއްގޮތަށް ދަނީ ކުރިއަށެވެ. އެގޮތުން، ވޭތުވެދިޔަ ހަތަރު ދުވަހު 646 ފަސިންޖަރުން ށ. އަތޮޅުގެ 7 ރޫޓަކުން ދަތުރުކޮށްފައިވާކަމަށް މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރަރސްޓްރަކްޗަރއިން ވިދާޅުވިއެވެ. ށ.އަތޮޅުގައި ޚިދުމަތް ދިނުމަށްޓަކައި 4 ފެރީ ބޭނުން ކުރެއެވެ.
އާރްޓީއެލްގެ ޚިދުމަތް ޒޯން 1ގައި ފެށީ ޖޫންމަހުގެ 12ވަނަ ދުވަހުއެވެ. ޚިދުމަތް ފެށީ ހދ.އަތޮޅުންނެވެ. ހއ.އަތޮޅުގައި ޚިދުމަތް ފެށީ ޖުލައި މަހުގެ 3ވަނަ ދުވަހުއެވެ. ޒޯން1ގައި ހިމެނެނީ ހއ، ހދ، ށ، މި 3 އަތޮޅެވެ. ޒޯން 1ގައި ހިމެނޭ 3 އަތޮޅުގައި މީހުން ދިރިއުޅޭ 30 ރަށް އޮވެއެވެ. މިހާތަނަށް މި ޚިދުމަތް ފެށި އަތޮޅުތަކުގެ ރައްޔިތުން އެންމެ ގިނައިން ދަތުރުކޮށްފައި ހުރީ ބޭސްފަރުވާގެ ޚިދުމަތް ހޯދުމަށެވެ.
އާރްޓީއެލްގެ ޚިދުމަތުގައި ބޭނުންކުރަމުން އަންނަނީ ހައި ސްޕީޑް ފެރީތަކެވެ. މުޅި މިޒޯންގެ ޚިދުމަތަށް 17 ފެރީ ބޭނުންކުރާނެއެވެ. މިފެރީތައް ފަރުމާކޮށްފައިވަނީ ރާއްޖެ ޓްރާންސްޕޯޓް ލިންކްގެ ޚިދުމަތަށް ޚާއްސަކޮށްގެން ޒަމާނީ ފެންވަރަށެވެ. އެގޮތުން ޖާގަ ތަނަވަސް މިފެރީތަކުގައި ބަލި މީހުން އުފުލޭނެ އިންތިޒާމުތަކާއި ފުރުޅުލީ ގޮނޑީގައި ފަސޭހަކަމާއެކު މީހުންނަށް އަރައިފޭބޭނެ ގޮތް ހަމަޖެހިފައިވެއެވެ.
މި ޚިދުމަތް ސަރުކާރުން ދޭން ކަނޑައަޅާފައިވަނީ ވީހާވެސް ކުޑަ އަގެއްހައެވެ. އެގޮތުން ކައިރި ރަށްރަށަށް 35 ރުފިޔާއަށް ދަތުރުކުރެވެއެވެ. ދުރު ރަށްރަށުގެ އަގުތައް އުޅެނީ 100ރުފިޔާއާއި 200ރުފިޔާ އާ ދެމެދުގައެވެ.
އާރްޓީއެލްގެ ޚިދުމަތްތައް ފަސޭހަކުރުމުގެ ގޮތުން، އޮންލައިންކޮށް ޓިކެޓް ނެގޭނެ އެޕްލިކޭޝަނެއް ތަޢާރަފްކޮށް މިހާރުވަނީ ބޭނުންކުރަން ފަށާފައެވެ. މިއާއެކު ދުރާލައި ޓިކެޓް ބުކް ކުރެވޭނެއެވެ. ރާއްޖެ ޓްރާންސްޕޯޓް ލިންކުގައި ހިމަނައިގެން ހައި ސްޕީޑް ފެރީ ނިޒާމަކުން މުޅި ރާއްޖެ ގުޅާލާނެއެވެ. އޭގެތޭރޭގައި އަތޮޅު ފެރީތަކާއި ޒޯން ފެރީތައްވެސް ހިމެނެއެވެ.