ޤަވާއިދާ ޚިލާފަށް މުދާ ބަރުކޮށްގެން މާލެއިން ފުރި ނާލުބޯޓެއް، މެރިން ފުލުހުން ނުކުމެ ހުއްޓުވައި އަނބުރާ މާލޭ ފަޅަށް ވައްދައިފިއެވެ.
މެރިން ފުލުހުން ވިދާޅުވީ ޤަވާއިދާ ޚިލާފަށް މުދާ ބަރުކޮށްގެން މާލެއިން ފުރިފަހުން ހުއްޓުވައި އަނބުރާ މާލޭ ފަޅަށް ވެއްދީ މާލެއިން ފުރައިގެން ދެކުނަށް ދަތުރުކުރަމުންދިޔަ "ސައުތުލައިން" ނަމަކަށް ކިޔާ ބޯޓެއް ކަމަށެވެ. އެއީ މާލެއިން ފުރައިގެން ދެކުނަށް ދަތުރުކުރި ބޯޓެކެވެ.
ބޯޓު މާލޭ ފަޅަށް ވެއްދުމަށްފަހު ޤަވާއިދާ އެއްގޮތަށް މުދާ ބަރުކޮށްގެން ނޫނީ ބޯޓު އިތުރަށް ދަތުރުނުކުރަން އަންގާފައިވާނެކަމަށް މެރިން ޕޮލިހުން ވިދާޅުވެއެވެ. މިދުވަސްވަރަކީ މޫސުން ގޯސް ދުވަސްވަރަކަށް ވާތީ ދަތުރުފަތުރު ކުރާ ފަރާތްތަކުން މޫސުމަށް ސާމާލުކަން ދީގެން ދަތުރުކުރުމަށް ޕޮލިހުން ވަނީ ނަޞޭހަތްތެރިވެފައެވެ. އަދި ސަލާމަތާއި ރައްކާތެރިކަން ކަށަވަރުކުރުމަށް ވެސް ޕޮލިހުން އިލްތިމާސްކުރައްވައެވެ.
ރާއްޖެއަށް މިހާރު ކުރަމުންދާ ވިއްސާރައިގައި މިއަދުވެސް ރާއްޖޭގެ ބޮޑުބަޔަކަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ. އާއްމު ގޮތެއްގައި 19 މޭލާއި 24 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށް ލަފާކުރެވޭއިރު ވިލާގަނޑުގައި ގަޑިއަކު 45 މޭލަށް ވައި ބާރުވާނެކަމަށް އެ އިދާރާއިން ލަފާކުރެއެވެ.