ކޯވިޑުގެ ބަލިމަޑުކަމާ ގުޅިގެން ކުރިމަތިވި ދަތިކަމުގެ ސަބަބުން ސްވިޑަންގެ ވޮލްވޯ ކާސްއިން ޗައިނާގެ ޗެންގްޑޫ ސިޓީގައި ހުންނަ ލޯކަލް ކާރުޚާނާ ވަގުތީ ގޮތުން ބަންދުކުރަން ނިންމައިފިއެވެ.
މިކަމުގެ ސަބަބުން ވިޔަފާރިއަށް ކުރާނެ އަސަރު ވަޒަންކޮށް، ހާލަތު މޮނިޓަރ ކުރުމުގެ މަސައްކަތް އެ ކުންފުނިން ދަނީ ކުރަމުންކަމަށް ވޮލްވޯގެ ތަރުޖަމާނު ވިދާޅުވިއެވެ. އަދި ފާއިތުވި ދުވަސްތަކުގައި ޗައިނާގެ ޑަކިންގައި ހުންނަ ވޮލްވޯގެ ކާރުޚާނާއަށްވެސް ފުރަބަންދުގެ ސަބަބުން އަސަރުކޮށްފައިވާކަމަށް އޭނާ ވިދާޅުވިއެވެ.
ޗެންގްޑޫއިން ވަނީ މިއަހަރުގެ ކުރީކޮޅު ފުރަބަންދުކުރި ޝަންހާއީއަށްފަހު ދެން އެންމެ އާބާދީ ބޮޑު ސިޓީ ފުރަބަންދުކުރާނެކަމަށް އިއުލާނުކޮށްފައެވެ. މި ސިޓީގެ އާބާދީގައި 21.2 މިލިއަން މީހުން ދިރިއުޅެއެވެ.
ޗައިނާގެ އޮޓޯމޯޓިވް ކުންފުނި ގީލީ ހޯލްޑިންގްގެ މެޖޯރިޓީ ހިއްސާވާ ސްޓޮކްހޯމްގައި ލިސްޓްކޮށްފައިވާ ވޮލްވޯއިން 2013 ވަނަ އަހަރުން ފެށިގެން ޗައިނާގައި ކާރު އުފައްދައެވެ. މިދިޔަ އަހަރު އެގައުމުގައި ގާތްގަނޑަކަށް 172،000 އުޅަނދު ވަނީ ވިއްކާފައެވެ. މިއީ ޖުމްލަ ވިޔަފާރީގެ 25 އިންސައްތައެއްހާ އުޅަނދެކެވެ.