"ޕޯޓު މަޝްރޫޢާއެކު ތަރައްޤީވެފައިވާ ޤައުމަކަށް ރާއްޖެ މިސްރާބު ޖަހާނެ"

ވިޔަފާރި ބަނދަރު ތިލަފުއްޓަށް ބަަދަލުކުރުމުގެ މަޝްރޫޢުއަކީ 2040ވަނަ އަހަރު އަންނައިރު ތަރައްޤީވެފައިވާ ޤައުމަކަށް ރާއްޖެ ހެދުމަށް އެޅޭ އެންމެ ވަރުގަދަ އެއް ބިންގާކަމަށް އިޤްތިޞާދީ ތަރައްޤީއާއި، ދަތުރުފަތުރާއި، ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވިޔަފާރި ބަނދަރު ތިލަފުއްޓަށް ކުރަމުންދާ މަސައްކަތްތައް ބައްލަވާލެއްވުމަށް ރައީސުލްޖުމްހޫރިއްޔާގެ އަރިހުގައި ތިލަފުއްޓަށް ވަޑައިގެން ވަޒީރު ސަޢީދު ވިދާޅުވީ އެ މަޝްރޫޢުއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްކަންދެއްވާ އެއް މަޝްރޫޢުކަމަށެވެ.

ވިޔަފާރި ބަނދަރު ތިލަފުއްޓަށް ބަދަލު ނުކޮށް އެތައް އަހަރެއް ފާއިތުވެގެން ދިޔުމަކީ ރާއްޖޭގެ ވިޔަފާރިއާއި އިޤްތިޞާދު އެހެން ހަރުފަތަކަށް ގެންދިޔުމަށްޓަކައި އެޅިފައި އޮތް ހުރަހެއްކަމަށެވެ. ނަމަވެސް މި ސަރުކާރުން އެ މަސައްކަތް ފަށައިގެން ކުރިއަށްގެންދާކަން ފާހަގަކުރައްވާ ވަޒީރު ވިދާޅުވީ ރައީސްގެ ޓާގެޓްއަކީ އަންނަ އަހަރުގެ ނޮވްމްބަރުގެ ކުރިން ފުރަތަމަ ފިޔަވަހި ނިންމާ 2028ގެ ނޮވްމްބަރުގެ ކުރިން މުޅި މަޝްރޫޢުު އެއްކޮށް ނިންމުންކަމަށެވެ. ވަޒީރު ވިދާޅުވީ އެ މަޝްރޫޢު ނިމޭއިރު އެތައް ގޮތަކުން ފައިދާ ލިބޭނެކަމަށެވެ. އެގޮތުން ވިޔަފާރި ބަނދަރު ތިލަފުއްޓަށް ބަދަލުވުމުގެ އިތުރުން ބާޒާރުމަތީގައި ހުރި އަތޮޅު ފިހާރަތައްފަދަ އޮޕަރޭޝަންތައްވެސް ބަދަލުވާނެކަން ފާހަގަކުރެއްވިއެވެ.

"މި މަޝްރޫޢު ނިމޭއިރު އިންޓަނޭޝަނަލް ކީވޯލްއާއި އިންޓަރނޭޝަނަލް ބަނދަރާއި ސްޓޯރޭޖް ވެއަރހައުސް އަދި އަތޮޅު ފިހާރަތައް ފަދަ ބާޒާރުމަތީގައި ހުރި ހުރިހާ އޮޕަރޭޝަންސްތައް ބަދަލުވެ، ގޯޑައުންނާއި ފިރީޒޯންތަކާއި އަދި ބްރިޖްއިން ގުޅި ކާގޯ ދެވޭނެ ގޮތަށް އިންތިޒާމްތައް ހަމަޖެހިގެންދާނެ. އަދި ހުޅުމާލެއިންވެސް އިންބައުންޑް ކާގޯ ދެވޭނެ ގޮތަށް ، އެއަޕޯޓަށް ސީޓު އެއަރ ކާގޯގެ ޚިދުމަތްވެސް ދެވޭނެ ގޮތަށް ހައްލެއް ގެނެވޭނެ."އިޤްތިޞާދީ ތަރައްޤީއާއި، ދަތުރުފަތުރާއި، ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވިއެވެ.

ވަޒީރު ވިދާޅުވީ 2040 އަންްނަން 14 އަހަރު އޮތް އިރު ތަރައްޤީވެފައިވާ ޤައުމަކަށް ވުމަށް އެޅޭ އެންމެ ވަރުގަދަ އެއް ބިންގަލަކަށް ޕޯޓް ބަދަލުކުރުމުގެ މަސައްކަތްވާނެކަމަށެވެ. އަދި މި މަޝްރޫޢުން އެންމެ ބޮޑު އުފަލެއް ލިބިގެންދާނީ ރާއްޖެގެ ވިޔަފާރިވެރިންނާއި އިޤްތިޞާދުގައި އިންވެސްޓުކުރާ ފަރާތްތަކަށްކަން ވަޒީރު ފާހަގަކުރެއްވިއެވެ. ރާއްޖޭގައި މިވަގުތުވެސް ޕްރައިވެޓް ސެކްޓަރގައި ކޮންސްޓްރަކްޝަން އިންޑަސްޓްރީން 11 ބިލިޔަން ޑޮލަރުގެ އިންވެސްޓްމަންޓް ހިނގާކަމަށާއި އޭގެ ތެރެއިން ބޮޑުބައެއް ހިމެނެނީ ޓުއަރިޒަމް އިންޑަސްޓީރީގައިކަން ވަޒީރު ފާހަގަކުރެއްވިއެވެ. ނަމަވެސް އެތަންތަނަށް މުދާ ފޯރުކޮށްދިނުމުގައި ބޮޑު ދަތިކަމެއް އޮތްކަމަށާއި ގިނަ ދަތިތަކާއކެު ކުޑަދުވަސްކޮޅެއްގެ ތެރޭ ޕޯޓް ބަދަލުކުރުމުގެ މަޝްރޫޢުއަށް ކުރިއެރުންއައިކަން ވަޒީރު ފާހަގަކުރެއްވިއެވެ.

ތިލަފުއްޓަށް ވިޔަފާރި ބަނދަރު ބަދަލުކުރުމާއެކު މުދާ ބާލާ ކްލިއަރ ކުރަން ހޭދަވާ 7 ދުވަހުގެ ބަދަކުގައި އެއް ދުވަސްތެރޭ މޭވާއާއި ތަރުކާރީފަދަ އާންމުކޮށް ބޭނުންކުރާ ކާބޯތަކެތީގެ ބާވަތްތައް އެއްދުވަސްތެރޭ ބޯޓުން ބާލާ މުދާ ލިބެން ހުންނާނެކަން ވަޒީރު ފާހަގަކުރެއްވިއެވެ.