ރޮނާލްޑޯގެ ނަމްބަރު ލެއާއޯއަށް, މެސީގެ 10 އަދިވެސް ހިފަހައްޓާފައި!

ޕޯޗްގަލްގެ ކޭމްޕް ދޫކޮށް ކެޕްޓަން ރޮނަލްޑޯ ދިއުމުން, އޭނާގެ އައިކޮނިކް 7 ނަމްބަރު ޖަރޒީ ރަފައަލް ލެއާއޯއަށް ދީފިއެވެ. ބޭރުގެ ބައެއް މީޑިއާތަކުން ރިޕޯރޓްކޮށްފައިވާ ގޮތުން ޔުއެފާ ނޭޝަންސް ލީގުގައި ޕޯޗްގަލް ކުރިއަށް އޮތް ދެ މެޗަށް ނިކުންނައިރު ކުޅުންތެރިންގެ ޖަރޒީ ނަމްބަރަށް ގެނައި ބަދަލާއެކު 7 ނަމްބަރު ވަނީ ގަލަތަސަރާއީ އަށް ކުޅޭ ލެއާއޯއަށް ދީފައެވެ. ލެއާއޯ މިހާތަނަށް ބޭނުން ކުރަމުން އައީ 17 ނަމްބަރެވެ.

ޕޯޗްގަލްއަށް ކުރިއަށް އޮތީ މިރޭ ޑެންމާކާ ވާދަކުރާ މެޗާއި, އާދިއްތަ ދުވަހު ނޯވޭއާ ވާދަކުރާ މެޗެވެ. އެ ދެ މެޗުގެ ސްކޮޑުންވެސް ރޮނަލްޑޯ ވަނީ ވަކިވެފައެވެ. ވަކިވި ސީދާ ސަބަބެއް ނުބުނި ނަމަވެސް ރޮނަލްޑޯ ވަނީ ކޭމްޕް ދޫކޮށް ގޮސްފައެވެ. ޕޯޗްގަލް އެންމެ ފަހުން ނޯވޭއާ ދެކޮޅަށް ކުޅެ މޮޅުވި މެޗުގައި ރޮނަލްޑޯއަށް ފުރުޞަތެއް ނުދެއެވެ. އަދި އެމެޗަށްފަހު ކޯޗު ޖޯޖް ޖީސޫސް ދެއްކި ވާހަކަތަކާމެދު ހިތްހަމަ ނުޖެހޭކަން ރޮނަލްޑޯ ވަނީ ފާޅުކޮށްފައެވެ. ޑެންމާކު މެޗުންވެސް ރޮނަލްޑޯއަށް ފުރުޞަތު ލިބުން ދުރުކަމަށް ދޭވަހާ ގޮތަށް ކޯޗު ވަނީ ވާހަކަ ދައްކާފައެވެ. ނޯވޭ މެޗަކީ މިދިޔަ 18 އަހަރުގެ ތެރޭގައި ފިޓްކޮށް ހުރެ ރޮނަލްޑޯއަށް ޕޯޗްގަލް ގައުމީ ޓީމުން ފުރުޞަތު ގެއްލުނު ފުރަތަމަ މެޗެވެ.

ރޮނަލްޑޯގެ އައިކޮނިކް ނަމްބަރު އެހެން ކުޅުންތެރިއަކަށް ދޭން ނިންމާފައި މިވަނީ ރޮނަލްޑޯ ގައުމީ ޓީމަށް ކުޅުން ހުއްޓާލިކަން އިއުލާނު ނުކުރަނީހެވެ. 41 އަހަރުގެ ރޮނަލްޑޯ ބުނެފައިވަނީ އޭނާ ޓީމާ ދުރަށް ދިޔަ ސަބަބު ވަގުތު ޖެހުމުން ހާމަކުރާނެ ކަމަށެވެ. ޕޯޗްގަލް ވަނީ ނޭޝަންސް ލީގުގައި ކުޅުނު ފުރަތަމަ ދެ މެޗު ވޭލްސް އައި ނޯވޭއާ ވާދަކޮށް ކާމިޔާބުކޮށްފައެވެ.

ގައުމީ ޓީމަށް ކުޅުން ހުއްޓާލުމުގެ ކުރިން ރޮނަލްޑޯގެ ނަމްބަރު އެހެން ކުޅުންތެރިއަކަށް ދޭން ނިންމިއިރު, ވާދަވެރި މެސީ ގައުމީ ޓީމަށް ކުޅުން ހުއްޓާލިކަން އިއުލާނުކުރި ނަމަވެސް, ފެއަރވެލް މެޗުގެ ކުރިން އެނަމްބަރު އެހެން ކުޅުންތެރިއަކަށް ނުދޭން އާޖެންޓީނާ ފެޑެރޭޝަނުން ވަނީ ނިންމާފައެވެ. މެސީގެ ފެއަރވެލް މެޗު ކުޅޭނީ މިމަހު 6 ވަނަ ދުވަހު ބެނިންނާ ދެކޮޅަށެވެ. މެސީ ގައުމީ ޓީމަށް ކުޅުން ހުއްޓާލިކަން އިއުލާނުކުރީ މިއަހަރުގެ ވޯލްޑް ކަޕް ފައިނަލުގައި ސްޕެއިން އަތުން ބަލިވި މެޗަށްފަހުއެވެ.

ގައުމީ ޓީމަށް ކުޅުން ހުއްޓާލަން މެސީ ކުޅޭ މެޗަކީ ގައުމީ ޓީމަށް އޭނާ ކުޅެދޭ 208 ވަނަ މެޗެވެ. 125 ގޯލާއެކު އާޖެންޓީނާއަށް އެންމެ ގިނަ ގޯލު ޖެހި ކުޅުންތެރިއަކީ މެސީއެވެ. ޕޯޗްގަލް ގައުމީ ޓީމަށް އެންމެ ގިނަ ގޯލު ޖެހި ކުޅުންތެރިއަކީ ރޮނަލްޑޯއެވެ.