ރާއްޖެއާއި ގެމްބިޔާއާ ދެމެދު ވިޔަފާރީގެ ފުރުޞަތުތައް އިތުރުކުރުމާއި ގުޅޭގޮތުން މަޝްވަރާކޮށްފި

ވިޔަފާރީގެ ފުރުޞަތުތައް އިތުރުކުރުމާއި ގުޅޭގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްއާއި ގެމްބިޔާއިން ރާއްޖެއަށް ކަނޑައެޅުއްވި އައު ސަފީރު، މުސްތަފާ ޖަވާރާ މަޝްވަރާކުރައްވައިފިއެވެ.

މި މަޝްވަރާތައްކޮށްފައިވާ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި، ގެމްބިޔާގެ އައު ސަފީރާ ފަތްކޮޅު އެރުވުމަށްފަހުއެވެ.

މިބައްދަލުކުރެއްވުމުގައި، ރައީސުލްޖުމްހޫރިއްޔާއާއި ގެމްބިޔާގެ އައު ސަފީރު ދެއްކެވި ވާހަކަފުޅުގައި ވަނީ، ދެޤައުމުގެ ދެމެދުގައި އޮތް ޒަމާންވީ ގާތްގުޅުމުގެ މައްޗަށާއި، ދެޤައުމުން ހިއްސާކުރާ، އިސްލާމީ އަދި ތާރީޚީ ގުޅުންތަކާއި، ދިމިޤުރާތީ އަސާސްތަކުގެ އިތުރުން، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) އާއި ކޮމަންވެލްތް އޮފް ނޭޝަންސްގެ މެމްބަރު ޤައުމުތަކުގެ ގޮތުގައި ކުރެވޭ މަސައްކަތްތަކުގެ މައްޗަށްވެސް އަލިއަޅުއްވާލައްވާފައެވެ.

މީގެއިތުރުން ދެބޭފުޅުން ވަނީ، ދެޤައުމަށް ފައިދާހުރި، ދާއިރާތަކުން ގުޅުން ބަދަހިކުރުމާއި، ވިޔަފާރީގެ ފުރުޞަތުތައް އިތުރު ކުރުމާއި ގުޅޭގޮތުން މުހިއްމު މައުޟޫއުތަކަށް ވާހަކަފުޅުދައްކަވާފައެވެ. ރައީސް ވިދާޅުވީ ރޮހިންޔާ ދަރިކޮޅުގެ މީހުންގެ ހައްޤުތައް ހޯދައިދިނުމަށްޓަކައި ގެމްބިޔާއިން ކުރެއްވި މަސައްކަތްތަކަށް ރާއްޖެއިން ތާޢީދުކުރެއްވުމަކީ ބައިނަލްއަޤުވާމީ މައިދާނުގައި ރާއްޖެއާ ގެމްބިޔާއިން ގުޅިގެން މަސައްކަތް ކުރުމުގެ ފުރިހަމަ މިސާލެއް ކަމަށެވެ.

މިބައްދަލުކުރެއްވުމުގައި، ގެމްބިޔާ ސަފީރު މުސްތަފާ ޖަވާރާ ވަނީ، ފަތުރުވެރިކަމާއި ދަނޑުވެރިކަމުގެ ދާއިރާއިން، ދެޤައުމުގެ މެދުގައި މަޢުލޫމާތާއި ފަންނީ ތަޖުރިބާ ހިއްސާކުރުމުގެ ޝައުޤުވެރިކަން ފާޅުކުރައްވާފައެވެ. އަދި އެމަނިކުފާނު ވަނީ، ރާއްޖޭގެ ފޮރިން ސާވިސް އިންސްޓިޓިއުޓް މެދުވެރިކޮށް، ޑިޕްލޮމެޓުން ތަމްރީން ކުރުމުގެ ޝައުޤުވެރިިކަންވެސް ފާޅުކުރައްވާފައެވެ. މިކަމާއި ގުޅިގެން ރައީސް ވަނީ ފޮރިން ސާވިސް އިންސްޓިޓިއުޓް މެދުވެރިކޮށް ގެމްބިޔާގެ ޑިޕްލޮމެޓުން ތަމްރީނުކުރުމަށް އެހީތެރިވެދިނުމަށް ހުށައެޅުވި ހުށަހެޅުއްވުން ފުރިހަމައަށް ބައްލަވާނެކަމުގެ ޔަޤީންކަން ދެއްވާފައެވެ.

ރައީސުލްޖުމްހޫރިއްޔާ އާއި ގެމްބިޔާގެ އާ ސަފީރު ވަނީ ދެ ޤައުމަށް ފައިދާހުރި ކަންކަމުގައި އިތުރަށް ގުޅުން ބަދަހިކުރުމާއި މެދު ފުޅާ ދާއިރާއެއްގައި މަޝްވަރާކުރައްވައި، ދެޤައުމުގެ ދެމެދުގައި މިހާރު އޮތް ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެ ކަމުގެ ޔަޤީންކަންވެސް ދެއްވާފައެވެ.

ދިވެހިރާއްޖެއިން ގެމްބިޔާއާއެކު ސިޔާސީ ގުޅުން ޤާއިމްކޮށްފައި ވަނީ، 3 ޖުލައި 1989ގައެވެ.