ދުނިޔެ ސާފުކުރުމުގެ ދުވަހުގެ ހަރަކާތްތަކުގައި ވީހާވެސް ގިނަ އިދާރާތަކުން ބައިވެރިވުމަށް އީޕީއޭއިން އެދިއްޖެ

ދުނިޔެ ސާފުކުރުމުގެ ދުވަހުގެ ހަރަކާތްތަކުގައި ވީހާވެސް ގިނަ އިދާރާތަކުން ބައިވެރިވުމަށް އެންވަޔަރަންމަންޓަލް ޕްރޮޓެކްޝަން އޭޖެންސީ، އީ.ޕީ.އޭއިން އެދިއްޖެއެވެ.

"ވޯލްޑް ކްލީންއަޕް ޑޭ" ނުވަތަ ދުނިޔެ ސާފުކުރުމުގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ސެޕްޓެމްބަރުމަހުގެ 3 ވަނަ ހޮނިހިރު ދުވަހުއެވެ. މިއަހަރު މިދުވަސް ދިމާވަނީ މިމަހުގެ 17 ވާ އަންނަ ހޮނިހިރު ދުވަހާއެވެ.

ދުނިޔެ ސާފުކުރުމުގެ ދުވަހަކީ ބައިނަލްޢަޤްވާމީ ގޮތުން ދުނިޔޭގެ ހުރިހާ ޤައުމަކުން ބައިވެރިވެ އެއްދުވަހެއްގައި ސާފުކުރުމުގެ މަސައްކަތް ކުރުމަށް ކަނޑައަޅާފައިވާ ދުވަހެކެވެ. އެގޮތުން، ގޮނޑުދޮށާއި، މޫދާއި، މަގުތަކާއި، މިނޫންވެސް ތަންތަނުގައި ހުރި ކުނިތައް ނަގައި ސާފުކޮށް އެފަދަ ކުނި ރައްކާތެރިގޮތުގައި ނައްތާލުމުގެ މަސައްކަތްތައް ރާވައިގެން މި ދުވަހުގައި ކުރެއެވެ.

މި ދުވަހާ ގުޅުވައިގެން އީ.ޕީ.އޭއިން ނެރުނު ސާކިއުލާއެއްގައި ސަރުކާރުގެ އިދާރާތަކާއި، ސްކޫލްތަކާއި، ރިސޯޓުތަކާއި މިނޫންވެސް އެހެނިހެން ފަރާތްތަކުން މި އަހަރުގެ ދުނިޔެ ސާފުކުރުމުގެ ދުވަހަށް ސާފުކުރުމުގެ ޕްރޮގްރާމްތައް ރާވާ ހިންގުމަށް އެދިފައިވެއެވެ. އަދި އެފަދަ ޕްރޮގްރާމްތައް ރާވާ ފަރާތްތަކުން ދުނިޔެ ސާފުކުރުމުގެ ދުވަހުގެ ވެބްސައިޓް www.worldcleanupday.org ގައި ރަޖިސްޓަރކޮށް ވެބްސައިޓުގައި އެ ޕްރޮގްރާމް ހިމެނުމަށް އީ.ޕީ.އޭއިން ވަނީ އެދިފައެވެ. މިފަދައިން ސާފުކުރުމުގެ ޕްރޮގްރާމްތައް ރާވާ ހިންގާއިރު ކުނި މެނޭޖުކުރުމާބެހޭ ގަވާއިދާއި އެއްގޮތްވާގޮތަށް ސާފުކުރެވޭ ކުނި މެނޭޖުކުރުމަށްވެސް އެ އެޖެންސީން އިލްތިމާސްކޮށްފައިވެއެވެ.

ދުނިޔެ ސާފުކުރުމުގެ ދުވަސް ފާހަގަކުރަން ފަށާފައިވަނީ 2018 ވަނަ އަހަރުން ފެށިގެންނެވެ. މިފަދަ ދުވަހެއް ފާހަގަކުރުމުގެ އެންމެ ބޮޑު ބޭނުމަކީ ރައްކާތެރި އަމާން ސާފުތާހިރު ވެއްޓެއް ބިނާކުރުމަށް ކުރެވޭ މަސައްކަތްތަކުގައި ސަރުކާރުތަކާއި، މަދަނީ ޖަމިއްޔާ ޖަމާޢަތްތަކާއި އާއްމު ފަރުދުންގެ ބައިވެރިވުން އިތުރުކޮށް، ރައްކާތެރިގޮތުގައި ކުނި މެނޭޖްކޮށް ނައްތާލުމަށް ބާރުއެޅުމެވެ.