ސަޢުދި ޢަރަބިއްޔާގައި ކުރިއަށްދާ "ކިންގް ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާން"ގެ ފައިނަލަށް ރާއްޖޭގެ ފަރާތުން މި މުބާރާތުގައި ވާދަކުރާ އަލްޙާފިޡް އަޙްމަދު ނަބީޙް ޢަބްދުލްޤާދިރު ހޮވިއްޖެއެވެ. މި މުބާރާތަކީ ސަޢުދީގައި ބާއްވާ އެންމެ ބޮޑު ބައިނަލްއަޤްވާމީ ޤުރުއާން ކިޔެވުމުގެ އެއް މުބާރާތެވެ.
މިމަހުގެ 10 އިން 21 އަށް ސަޢުދީ އަރަބިއްޔާގައި ކުރިއަށްދާ މި މުބާރާތަށް ރާއްޖެ ތަމްޞީލުކުރާނެ ބައިވެރިން ހޮވާފައިވަނީ ޤުރުއާނާބެހޭ ޤައުމީ މަރުކަޒުން ކުރިއަށްގެންދިޔަ އޮޑިޝަންއަކުންނެވެ. މި އޮޑިޝަން ކުރިއަށް ގެންގޮސްފައިވަނީ ބެލެނިވެރިންގެ ހާޒިރުގައި ފަނޑިޔާރުންގެ ޕެނަލަކުންނެވެ.
މި މުބާރާތުގައި ބައިވެރިވުމަށް ހުޅުވާލުމުން 6 ފަރާތަކުން އެޕްލިކޭޝަން ހުށަހަޅާފައިވެއެވެ. މި ފަރާތްތަކުގެ ތެރެއިން މުބާރާތުގައި ރާއްޖެ ތަމްޞީލުކުރުމުގެ ފުރުޞަތު ލިބުނީ އަލްޙާފިޡް ނަބީޙުގެ އިތުރުން، އަލް މަދަރުސަތުލް ޢަރަބިއްޔަތުލް އިސްލާމިއްޔާގެ ދަރިވަރު މުޙައްމަދު ޔޫޝަޢު ބިން ޒަމްޒަމްއެވެ.
ރާއްޖޭގެ ފަރާތުން މި މުބާރާތުގައި ބައިވެރިވި 2 ބައިވެރިންގެ ތެރެއިން ފުރަތަމަ ބުރުގައި ކިޔަވައިނިމި، ދެވަނަ ބުރާއި ފައިނަލް ބުރަށް ދަތުރުކޮށްފައިވަނީ އަލްޙާފިޡް ނަބީޙު އެކަންޏެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން އިސްލާމިކް މިނިސްޓްރީގެ ސްޓޭޓް މިނިސްޓަރ އައްޝައިޚް އިލްޔާސް ޖަމާލް ވިދާޅުވީ، މި މުބާރާތުގައި ދުނިޔޭގެ 111 ޤައުމެއްގެ 153 ދަރިވަރަކު ބައިވެރިވާކަމަށާއި، މީގެ ތެރޭގައި މި ދާއިރާއިން ޕީ.އެޗް.ޑީ އަދި މާސްޓަރސް ފެންވަރަށް ކިޔަވައިގެން ތިބި ދަރިވަރުންވެސް ހިމެނޭކަމަށެވެ. އަދި އެ ހުރިހާ ކުދިންގެ ތެރެއިން މިހާ ބޮޑު މުބާރާތެއްގެ ފައިނަލްގައި ވާދަކުރުމުގެ ފުރުޞަތު ނަބީޙު ފަދަ ޚާއްސަ އެހީއަށް ބޭނުންވާ ކުއްޖަކަށް ލިބިގެން ދިއުމަކީ ވަރަށް ބޮޑު ކާމިޔާބީއެއްކަމަށެވެ.
އިލްޔާސް ވިދާޅުވީ، ނަބީޙުގެ ކިޔެވުމާއި، އޭނާގެ ހުނަރާމެދު މުބާރާތް އިންތިޒާމްކުރާ ފަރާތުގެ އިތުރުން ސަޢުދީ ސަރުކާރުގެ ސަމާލުކަން ލިބިފައިވާކަމަށެވެ.
"ނަބީޙުގެ ޓެލެންޓު ފެނި، އެކޮޅުގެ އިސްލާމިކް މިނިސްޓްރީ ބޭފުޅުން ނަބީޙުއާއި އޭނާގެ ބެލެނިވެރިން ވަކިން ގެންގޮސްގެން އިންޓަރވިއުވެސް ނެގި. އެމީހުންނަށް ފާހަގަކުރެވުނު މިއީ އާދަޔާ ޚިލާފު ކުއްޖެއްކަން. އެކި ރާގު ރާގަށް ނަބީޙު ލައްވާ ކިޔުއްވި. ބަންގިވެސް ގޮވީމަ، އެމީހުން ބުނި ހީވަނީ ހަރަމުން ބަންގި ގޮވާލާހެނޭ" އިލްޔާސް ވިދާޅުވިއެވެ.
މި މުބާރާތުގެ ޤަވާއިދު އޮންނަގޮތުން، މުބާރާތް އިންތިޒާމް ކުރާ ފަރާތުން، މި މުބާރާތުގައި ބައިވެރިވުމަށް ޓިކެޓް ހަމަޖައްސައިދެނީ ކުއްޖާއަށް އެކަންޏެވެ. އެ ކުއްޖަކީ އުމުރުން 17 އަހަރު ދަށުގެ ކުއްޖެނަމަ، ކޮންމެވެސް އެއް ބެލެނިވެރިއަކަށް ކުއްޖާއާއެކު ދަތުރުކުރުމުގެ ފުރުޞަތު ލިބިގެންދެއެވެ. އެހެންނަމަވެސް ނަބީޙުގެ ޙާލަތަށް ބަލާ، އޭނާއާއެކު ދަތުރުކުރުމުގެ ފުރުޞަތު މަންމައާއި ބައްޕައަށްވެސް ދީފައިވާތީ، ކީރިތި ޤުރުއާނާބެހޭ މަރުކަޒުން ވަނީ އެކަން ޝުކުރުވެރިކަމާއެކު ފާހަގަކޮށްފައެވެ.
މީގެ ކުރީގެ އަހަރުތަކުގައިވެސް "ކިންގް ޢަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤްރުއާން" ގައި ބައިވެރިވެ، އެކި ފަރާތްތަކުން ރާއްޖެ ތަމްޞީލުކޮށްފައިވެއެވެ. އެހެންނަމަވެސް މިއީ މިހާ ހަގު އުމުރުގެ ކުއްޖަކަށް މި މުބާރާތުގެ ފައިނަލްގައި ކިޔެވުމުގެ ފުރުޞަތު ލިބުނު ފުރަތަމަ ފަހަރެވެ.
މި މުބާރާތުގެ ނަތީޖާ ފާޅުކުރުމަށްފަހު، ބައިވެރިން އެނބުރި ރާއްޖެއައުމަށް ހަމަޖެހިފައިވަނީ މިމަހުގެ 22 ވަނަ ދުވަހުކަމަށް ކީރިތި ޤުރުއާނާބެހޭ މަރުކަޒުން ވިދާޅުވެއެވެ. މި މުބާރާތުގެ ތެރެއިން ބައިވެރިންނަށް ޢުމްރާގެ އަޅުކަން އަދާކުރުމުގެ ފުރުޞަތު ފަހިކޮށްދިނުމުގެ އިތުރުން މަދީނާގެ ޓުއަރއެއްވެސް ދެވިގެންދާނެއެވެ.