މިސްރުގެ ސުއޭޒް ކެނަލްއިން ދަތުކުރާ ބޯޓު ފަހަރުތަކުން ނަގާ ފީ އަންނަ އަހަރުން ފެށިގެން ބޮޑުކުރަން ނިންމާފައިވާކަމަށް މިސްރުގެ ސަރުކާރުން ބުނެފިއެވެ.
ސުއޭޒް ކެނަލް އޮތޯރިޓީން އިއްޔެ ނެރުނު ބަޔާނެއްގައި ބުނީ ތެލާއި ޕެޓްރޯލިއަމްގެ ބާވަތްތައް އުފުލާ ޓޭންކަރުތަކުން ދައްކަން ޖެހޭ ފީ 15 އިންސައްތަ އަދި އެ ނޫން ބާވަތްތަކުގެ މުދާ އުފުލާ އުޅަނދުތަކުން ނަގާ ފީ 10 އިންސައްތައަށް އަންނަ އަހަރުން ފެށިގެން ބޮޑު ކުރާނެ ކަމަށެވެ.
އެ އޮތޯރިޓީގެ ވެރިޔާ އުސާމާ ރާބީ ވިދާޅުވީ އަންނަ އަހަރުގެ ޖެނުއަރީމަހުގެ 1 ވަނަ ދުވަހު ފެށިގެން ފީ ބޮޑުކުރާނެ ކަމަށެވެ. އަދި އެއީ ކޮންމެހެން ކުރަންޖެހޭ ކަމެއް ކަމަށްވެސް އުސާމާ ވިދާޅުވިއެވެ. އުސާމާ ވިދާޅުވީ ދުނިޔޭގެ އިންފްލޭޝަން މަތިވުމުގެ ސަބަބުން ހިންގުމުގެ ޚަރަދާއި މަރާމާތާއި އަދި އެނޫންވެސް ހަރަދުތައް ކުރަންޖެހޭ މިންވަރު އިތުރުވެފައިވާކަމަށެވެ.
މިދިޔަ އަހަރު 20649 އުޅަނދު އެ ކެނަލް ހުރަސްކޮށްފައިވާ ކަމަށާއި މިއީ 2020 ވަނަ އަހަރު ކެނެލް ހުރަސް ކުރި 18830 އުޅަނދަށް ވުރެ 10 އިންސައްތަ އިތުރު އަދަދެއްކަމަށް އޮތޯރިޓީން ބުނެއެވެ.
މިދިޔަ އަހަރު އެ ކެނަލްއަށް އާމްދަނީގެ ގޮތުގައި ވަނީ 6.3 ބިލިއަން ޑޮލަރު ލިބިފައެވެ. އަދި މިއީ އެ ކެނަލްގެ ތާރީހުގައިވެސް އެންމެ ބޮޑު އާމްދަނީއެއް ލިބުނު އަހަރެވެ.
ދުނިޔޭގެ އެއް ތަނުން އަނެއް ތަނަށް ފޮނުވާ ތެލުގެ %7 އަދި އެ ނޫން ބާވަތްތަކުގެ މުދަލުގެ %10 ފޮނުވަނީ ސުއޭޒް ކެނަލް މެދުވެރިކޮށެވެ. އަދި 103 މިލިއަނަށް ވުރެ ގިނަ މީހުން ދިރިއުޅޭ އަރަބި ދުނިޔޭގެ އެންމެ ބޮޑު އާބާދީ އޮންނަ މިސްރަށް ބޭރު ފައިސާގެ ބޮޑު ބައެއް ފޯރުކޮށްދެނީ ސުއޭޒް ކެނަލް މެދުވެރިކޮށް ކުރާ ވިޔަފާރީންނެވެ.
މިސްރަށް އިގްތިސާދީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާއިރު، ދަނޑުވެރިކަމުގެ ބާވަތްތަކާއި ތެޔޮ ފަދަ ޒަރޫރީ ތަކެތި ގަތުމަށް ބޭނުންވާ ބޭރު ފައިސާގެ ދަތިކަން މިސްރަށް ވަނީ ކުރިމަތިވެފައެވެ.