އެމެރިކާގެ ޔޫއެސް އެއިޑްގެ އެހީގައި ރާއްޖޭގައި ކޯވިޑް-19ގެ ތަފާތު ވޭރިއަންޓްތައް ދެނެގަންނާނެ ޖީން ސީކުއެންސިންގ ފެސިޓީއެއް ޤާއިމުކޮށްފިއެވެ.
މިތަން ރަސްމީކޮށް ދިވެހި ސަރުކާރާއި ޙަވާލުކުރުމަށްޓަކާ ހެލްތު މިނިސްޓްރީގައި ޚާއްސަ ރަސްމިއްޔާތެއް ވަނީ ބާއްވާފައެވެ.
މި ރަސްމިއްޔާތުގައި މި ފެސިލިޓީ ޙަވާލުކުރުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، ހެލްތު މިނިސްޓަރ އަޙްމަދު ނަސީމެވެ. ޔޫ.އެސް އެއިޑްގެ ފަރާތުން ސޮއިކުރެއްވީ އެތަނުގެ ގަވަނެންސް އެންޑް ވަލްނަރަބަލް ޕޮޕިއުލޭޝަން އޮފީހުގެ ޑައިރެކްޓަރު ކެވިން ޑީންއެވެ.
ޖީން ސީކުއެންސިންގ ފެސިޓީއެއް ޤާއިމުކުރުމަށްޓަކާ ޔޫ.އެސް އެއިޑުން ވަނީ ރާއްޖެއަށް 89,937.64 އެމެރިކާ ޑޮލަރު (1.4 މިލިއަން ރުފިޔާ) އެހީ ހަދިޔާކޮށްފައިވެއެވެ. މިފަދަ ފެސިލިޓީއެއް ޤާއިމުވެގެންދިއުމަކީ ކޯވިޑް-19އިން އަރައިގަތުމަށް ކުރާ މަސައްކަތްތަކަށް ލިބިގެންދާނެ ބޮޑު ބާރަކަށްވެގެންދާނެކަމަށް ހެލްތު މިނިސްޓްރީން ވިދާޅުވެއެވެ.
Handover of the establishment of Gene sequencing facility at NHL, from @USAID.
— Ministry of Health (@MoHmv) September 19, 2022
Today’s Donation worth USD89,937.64, will help us establish Gene sequencing facility in Maldives, establishment of Gene sequencing is crucial in our efforts to tackle Covid19 pandemic. pic.twitter.com/RVQo65UaJe
މި ފެސިލިޓީ ޙަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ހެލްތު މިނިސްޓަރ އަޙްމަދު ނަސީމް ވިދާޅުވީ، އެމެރިކާއާއި ރާއްޖެއާ ދެމެދު އޮތް ޒަމާންވީ ގުޅުމުގެ ތެރެއިން ރާއްޖޭގެ އިޖްތިމާޢީ ތަރައްޤީއަށް ގިނަ އެހީތަކެއް ޔޫ.އެސް އެއިޑުން ވަމުންދާކަމަށެވެ.
ވަކިން ޚާއްސަކޮށް މިކަމުގެ އެންމެ ބޮޑު ފައިދާއެއް ލިބޭ އެއް ދާއިރާއަކީ ރާއްޖޭގެ ޞިއްޙީ ދާއިރާކަން މިނިސްޓަރ ނަސީމް ފާހަގަކުރެއްވިއެވެ. ކޯވިޑް-19 ރާއްޖޭގައި މެނޭޖްކުރުމުގައި ޔޫ.އެސް އެއިޑުން ވަމުން އަންނަ އެހީތެރިކަމަށް މިނިސްޓަރ ނަސީމް ވަނީ ޝުކުރުއަދާކުރައްވާފައެވެ.
Minister @KerafaNaseem’s remarks at the Handover ceremony of the establishment of Gene sequencing facility at NHL, from @USAID @fhi360 @WHOMaldives pic.twitter.com/DyjaHsTkdw
— Ministry of Health (@MoHmv) September 19, 2022
މި ފެސިލިޓީގެ ސަބަބުން ކޯވިޑްގެ ވޭރިއަންޓްތައް ރާއްޖޭގައި ދައުރުވާ މިންވަރު ދެނެގަތުމުގެ ޤާބިލުކަން އިތުރުވެގެންދާނެކަމަށާއި، މިތަނުގައި މިފަދަ ފެސިލިޓީއަކަށް ބޭނުންވާނެ އެންމެ ފަހުގެ ޒަމާނީ އާލާތްތައް ހުންނާނެކަމަށްވެސް ޔޫ.އެސް އެއިޑުން ބުނެއެވެ. އަދި މި ލެބޯޓްރީއަށް ބޭނުންވާ މުވައްޒަފުން ތަމްރީންކުރުމުގެ މަސައްކަތުގައިވެސް އެހީތެރިވާނެކަމަށް އެ ޖަމާއަތުން ބުނެފައިވެއެވެ.
މި ޖީން ސީކުއެންސިންގ ފެސިލިޓީ ޤާއިމުކޮށްފައިވަނީ މޯލްޑިވްސް ފުޑް އެންޑް ޑްރަގް އޮތޯރިޓީ، އެމް.އެފް.ޑީ.އޭގެ ދަށުން ހިންގާ ނެޝެނަލް ހެލްތު ލެބޯޓްރީ އެން.އެޗް.އެލް ގައެވެ. ރާއްޖޭގައި ކުރިން ޖީން ސީކުއެންސިން ޓެސްޓްތައް ހަދަމުން އައީ ރާއްޖޭން ބޭރަށް ސާމްޕަލްތައް ފޮނުވައިގެންނެވެ.
ކޯވިޑް-19އިން އަރައިގަތުމަށް ކުރާ މަސައްކަތުގައި އެހީތެރިވުމުގެގޮތުން ޔޫ.އެސް އެއިޑުން މީގެކުރިންވެސް ރާއްޖެއަށް ވަނީ އެކިގޮތްގޮތުން އެހީތެރިކަން ފޯރުކޮށްދީފައެވެ. އެގޮތުން މާލީ އެހީގެ އިތުރުން، ވެކްސިން ހަދިޔާކުރުމާއި، މިކަމަށް ބޭނުންވާ ޕީ.ޕީ.އީއާއި ވެންޓިލޭޓަރުފަދަ ސާމާނުވެސް ހަދިޔާކޮށްފައިވެއެވެ.