ކުރިއަށްއޮތް ހަފްތާއެއްހާ ދުވަހު ތިލަފުށިން ބޯކޮށްދުން އެރުން އެކަށީގެންވާތީ ސަމާލުވާން އަންގައިފިއެވެ.
ވޭސްޓް މެނޭޖްމަންޓް ކޯރޕަރޭޝަން، ވެމްކޯއިން ވިދާޅުވީ، ތިލަފުށީގައި ވަގުތީގޮތުން ކުނި ބަހައްޓާ ސަރަޙައްދުގައި މިއަދު މެންދުރުފަހު އަލިފާނުގެ ޙާދިސާއެއް ހިނގާފައިވާކަމަށެވެ. އަލިފާންގަނޑު އެން.އެމް.ޑީ.އެފްގެ ފަޔަރ އެންޑް ރެސްކިއު ޓީމާއި ވެމްކޯގެ މުވައްޒަފުން ގުޅިގެން ނިންވާލެވިފައިވީނަމަވެސް އެ ސަރަޙައްދުން ދުން އަރަމުންދާކަން ފާހަގަކުރެވިފައިވާކަމަށް ވެމްކޯއިން ވިދާޅުވިއެވެ.
މި ޙާދިސާއާގުޅިގެން ކުރިއަށްއޮތް ހަފްތާއެއްހާ ދުވަހު އެ ސަރަޙައްދުން އަލިފާންފެނި، ބޯކޮށް ދުން އެރުން އެކަށީގެންވާތީ، މިކަމަށް ސަމާލުވުމަށް ވެމްކޯއިން ވަނީ އަންގާފައެވެ. އަދި ތިލަފުއްޓަށް ކުނި ގެންދާ އުޅަނދުތަކުން، ކަނޑައެޅިފައިވާ އުޞޫލާ އެއްގޮތަށް ކުނި ގެންދިއުމަށާއި، އެ ސަރަޙައްދުގައި އަލިފާނުގެ ޙާދިސާއެއް ހިނގާނެފަދަ އެއްވެސް އަމަލެއް ނުކުރުމަށްވެސް އެކުންފުނިން ވަނީ ތަކުރާރުކޮށް އިލްތިމާސްކުރައްވާފައެވެ.
ވެމްކޯގެ ފަރާތުން ތިލަފުށީގައި ކުނި މެނޭޖްކުރުމަށް ކުރާ މަސައްކަތްތަކުގައި ދުވާލެއްގެ މައްޗަށް 500 ޓާނަށްވުރެ ގިނަ ކުނި ޕްރޮސެސްކޮށް، ބޭލްކުރަމުންދާކަމަށް ވެމްކޯއިން ވިދާޅުވެއެވެ.
ތިލަފުއްޓަށް ގެނެވޭ ކުނީގެ ޢަދަދު އިތުރުވެފައިވުމާއި، ކުނި މެނޭޖްކުރުމަށް ކުރެވޭ މަސައްކަތް އިތުރުވެފައިވާތީ، ވަގުތީގޮތުން ކުނި ބަހައްޓަމުން ވެމްކޯއިން އަންނަނީ ތިލަފުށީގެ ކުނިފުންޏާއި ކީވޯލްއާއި ދެމެދުގައެވެ.
ތިލަފުށީ ކުނިގޮނޑުން ދުން އެރުން ހުއްޓުވައި ކުނި މެނޭޖްކުރުމަށް އެންވަޔަރަމަންޓް މިނިސްޓްރީއާއި ވެމްކޯއިން ސަރުކާރުގެ ސިޔާސަތުތަކާ އެއްގޮތަށް ކުނި މެނޭޖްކުރުން އިތުރަށް ހަރުދަނާކުރުމަށް މަސައްކަތްކުރަމުންދާކަމަށް ވެމްކޯއން ވިދާޅުވެއެވެ. އަދި ތިލަފުށީ ވޭސްޓް މެނޭޖްމަންޓް ފެސިލިޓީއަކީ ރައްކާތެރިކަމާއެކު ކުނި ނައްތާލެވޭ ތަނަކަށް ހެދުމަށް މަސައްކަތްކުރަމުންދާކަމަށްވެސް އެކުންފުނިން ވިދާޅުވެއެވެ.