އއ. މާޅޮސް ކައިރިން ދަތުރުކުރި ލޯންޗެއް ބަންޑުންޖަހާލި ޙާދިސާގައި ގެއްލުނު ދެ މީހުންގެ ތެރެއިން ފެރިދޫ ފުށްޓަރު ފަރާތުން ފެނުނު މީހާ މިހާރު މާލެގެނެސްފައިވާކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ، މިދިޔަ ބުރާސްފަތި ދުވަހު 13:00 ހާއިރު މާލެއިން ފުރައިގެން އުކުޅަހަށް ދަތުރުކުރި ލޯންޗެއްގެ ޚަބަރެއް ނުވެގެން ފުލުހުންނަށް ރިޕޯޓުކޮށްފައިވާކަމަށެވެ. ލޯންޗުފުރީ މާލެ، ކުރީގެ ކުނިކޮށްޓާ ދިމާއިން ކަމަށާއި، އެ ލޯންޗުން ދަތުރުކުރީ ދިވެހި ދެ ފިރިހެނުންކަމަށް މައުލޫމާތު ލިބިފައިވާކަމަށް ފުލުހުން ވިދާޅުވިއެވެ.
އެ ލޯންޗު ބަންޑުންޖަހާލާފައި އޮއްވައި ފެނިފައިވަނީ އއ. މާޅޮސް ކައިރިންނެވެ. އެ ލޯންޗުން ދަތުރުކުރި އެކަކު ފެރިދޫ ފުށްޓަރާ ދިމާއިން ފެނިފައިކަމަށް ފުލުހުން ވިދާޅުވިއެވެ. އަދި އެމީހާއަށް ފެރިދޫ ޞިއްޙީ މަރުކަޒުގައި ފަރުވާދިނުމަށްފަހު އާއިލާގެ އެދުމުގެ މަތިން ރޭގެ ވަގުތެއްގައި މާލެ ގެނެސްފައިވާކަމަށެވެ. އޭނާއަށް މިހާރު ފަރުވާދެމުންދަނީ އައި.ޖީ.އެމް.އެޗުގައިކަމަށްވެސް ފުލުހުން ވިދާޅުވެއެވެ.
މި ލޯންޗުން ދަތުރުކުރިކަމަށްބުނާ ދެވަނަ މީހާ ހޯދުމުގެ މަސައްކަތް އަދިވެސް ކުރަމުންދާކަމަށް ފުލުހުން ވިދާޅުވެއެވެ. އޭނާ މިމަހުގެ 5 ވަނަ ދުވަހުގެ 13:00 ހާއިރުން ފެށިގެން ޚަބަރެއް ނުވެ ގެއްލިފައިވާކަމަށް އޭނާގެ އާއިލާއިން ފުލުހުންނަށް ރިޕޯޓްކޮށްފައިވަނީ މިމަހުގެ 6 ވަނަ ދުވަހުގެ 20:50 ހާއިރުކަމަށް ފުލުހުން ވިދާޅުވެއެވެ.
ފުލުހުން ވަނީ ގެއްލުނު މީހާ ފެނިއްޖެނަމަ ނުވަތަ އެމީހާއާ ގުޅޭ އެއްވެސް މަޢުލޫމާތެއް ލިބިފައިވާނަމާ 119 ނުވަތަ 3322111 އަށް ހިއްސާކޮށްދެއްވުމަށް އެދިވަޑައިގެންފައެވެ.