އއ. މާޅޮހުގެ ދެކުނުން ބަންޑުން ޖަހާލި ލޯންޗުން ގެއްލިގެން ހޯދަމުންދަނީ އުމުރުން 28 އަހަރުގެ ޒުވާނެކަމަށް އެމް.އެން.ޑީ.އެފުން ވިދާޅުވެއްޖެއެވެ.
އެމް.އެން.ޑީ.އެފުން ވިދާޅުވީ، މި ޙާދިސާގައި ގެއްލުނުނު މީހާ ހޯދުމަށް 35 އަކަ ނޯޓިކަލް މޭލުގެ ސަރަހައްދެއް ބަލާފައިވާކަމަށެވެ. އަދި މި މަސައްކަތުގައި އެމް.އެން.ޑީ.އެފް ކޯސްޓްގާޑް ޝިޕް ޝަހީދު ޢަލީއާއި، ފާސްޓް އިންޓަސެޕްޓް ކުރާފްޓް "ހަކުރާ" އަދި އެމް.އެން.ޑީ.އެފް ޑޯނިއަރ ފްލައިޓް އެ ސަރަހައްދުގައި ހަރަކާތްތެރި ވަމުންދާކަމަށެވެ.
ގެއްލިގެން ހޯދަމުން ދަނީ ސ. ހިތަދޫ، މިންހާ, މުޙައްމަދު މިންހާޖުއެވެ. އޭނާ އެންމެފަހުން ލައިގެން ހުރީ އަޅި ކުލައިގެ އަތް ދިގު ޓީޝާޓަކާއި ނޫ ކުލައިގެ ޖިންސެއް ކަމަށް އެމް.އެން.ޑީ.އެފް ކޯސްޓްގާޑަށް ވަނީ މަޢުލޫމާތު ލިބިފައެވެ.
މި މީހާއާއި ބެހޭ އެއްވެސް މަޢުލޫމާތެއް ލިބިއްޖެނަމަ ކޯސްޓްގާޑުގެ ހިލޭ ގުޅޭނަމްބަރު 191 ނުވަތަ 3395981، 3398898 ނަންބަރަށް އަދި ވައިބަރ ކުރައްވާނަމަ 9931082 އަދި ފެކްސް ކުރައްވާނަމަ 3391665 ނަމްބަރަށް ފެކްސްކުރެއްވުމަށް އެމް.އެން.ޑީ.އެފުން ވަނީ އެދިވަޑައިގެންފައެވެ.
މިދިޔަ ބުރާސްފަތި ދުވަހު 13:00 ހާއިރު މާލެއިން ފުރައިގެން އުކުޅަހަށް ދަތުރުކުރި މި ލޯންޗު ބަންޑުން ޖަހާލަފައި އޮއްވާ ފެނުނީ މާޅޮހު ކައިރިންނެވެ. ލޯންޗު މިހާރު ވަނީ ކަފުޖަހައިގެން ގެންގޮސް މާޅޮހު ފަޅަށް ވައްދާފައެވެ.
އެ ލޯންޗުން ދަތުރުކުރި އެކަކު ފެރިދޫ ފުށްޓަރާ ދިމާއިން ފެނިފައިވާއިރު، އެމީހާއަށް ފެރިދޫ ޞިއްޙީ މަރުކަޒުގައި ފަރުވާދިނުމަށްފަހު އާއިލާގެ އެދުމުގެ މަތިން ރޭގެ ވަގުތެއްގައި މާލެ ގެނެސްފައިވާކަމަށް ފުލުހުން ވިދާޅުވެއެވެ. އޭނާއަށް މިހާރު ފަރުވާދެމުންދަނީ އައި.ޖީ.އެމް.އެޗުގައިކަމަށްވެސް ފުލުހުން ވިދާޅުވެއެވެ.