ދިވެހިރާއްޖޭގެ ޤައުމީ ޔުނިވަރސިޓީން އަންނަމަހު ޖޮބް ފެސްޓިވަލެއް ބާއްވަން ނިންމައިފިއެވެ.
އެމް.އެން.ޔޫއިން ދަސްވެނިވާ ދަރިވަރުންނަށާއި އާއްމުންނަށް ހުޅުވާލައިގެން ބާއްވާ މި ޖޮބް ފެސްޓިވަލް އޮންނާނީ އަންނަމަހުގެ 9 އިން 10 އަކަށެވެ. ކުރިން ބޭއްވި ފެސްޓިވަލަށް ލިބުނު ތަރުޚީބަށް ބަލާ މިފަހަރުގެ ފެސްޓިވަލް މާލޭ ކެމްޕަސްގެ އިތުރުން އެމް.އެން.ޔޫގެ އަތޮޅުތަކުގެ ކެމްޕަސްތަކުގައިވެސް މި ކުރިއަށްގެންދިއުމަށް ވަނީ ނިންމާފައެވެ.
"އެމް.އެން.ޔޫ ފަހި ފުރުޞަތު" ގެ ނަމުގައި ދިވެހިރާއްޖޭގެ ޤައުމީ ޔުނިވަރސިޓީން ބާއްވާ މި ފެސްޓިވަލަކީ ރާއްޖޭގައި ވަޒީފާ އުފައްދާ ފަރާތްތަކާ، ވަޒީފާދޭ ފަރާތްތަކާ، ދަސްވެނިވަމުންދާ ދަރިވަރުންނާއި ވަޒީފާ ހޯދާ ފަރާތްތަކާއި، އެކި ކަހަލަ ފަންނީ ހުނަރުވެރި ދައިރާތަކުން ކުރިއަށްދާން ބޭނުންވާ ފަރާތްތަކާ ގުޅުވައިދޭނެ ބާޒާރެއްކަމަށް އެމް.އެން.ޔޫއިން ވިދާޅުވެއެވެ. މި ޖޮބް ފެސްޓިވަލަށް ވަނުމުގެ ފުރުޞަތު ހުރިހާ އާއްމުންނަށް ހިލޭ ވަނީ ހުޅުވާލާފައެވެ.
އެމް.އެން.ޔޫއިން ވިދާޅުވީ، މިފަދަ ހަރަކާތެއް ކުރިއަށްގެންދިއުމުގެ މަޤްޞަދަކީ ރާއްޖޭގެ އެކި ކަންކޮޅުތަކުގަޔާއި، މާލޭގައި ހުރި ވަޒީފާގެ ފުރުޞަތުތަކާ، އެކި މުއައްސަސާތަކުގައި ހުރި ތަފާތު އެކި ކަހަލަ އާމްދަނީ ނުވަތަ މަސައްކަތުގެ ތަޖުރިބާ ލިބޭނެފަދަ ފުރުޞަތުތައް އާއްމުންނަށް ދައްކާލެވޭނެ ފުރުޞަތު ތަނަވަސްކޮށްދެވޭނެ ފަހި މާޙައުލެއް ޤާއިމުކޮށްދިނުންކަމަށެވެ. އަދި އާއްމުންނާ ހިސާބަށް އެހާ ބޮޑަށް ފޯރުކޮށްނުދެވިހުރި އެކި ކަހަލަ ފުރުޞަތުތައް، ބްރޭންޑްތައް ނުވަތަ ވައްތަރުތައް އާއްމުންނާ ހަމައަށް ގެނެސްދެވޭނެ މާޙައުލެއް އުފައްދާ، ރާއްޖޭގައި ހުރި އެކިކަހަލަ ސިނާޢީ ފުރުޞަތުތަކާ، އެއާގުޅޭނެފަދަ ކަންކަމަށް ހުނަރުވެރިން ބިނާކުރުމަށް އަހުލުވެރިކުރުވުމާއި، މިފަދަ ކަންތައްތައް ޝަޢުގުވެރިކަން އުފައްދާ ދެމެހެއްޓުމަށް ބާރުއެޅުންކަމަށެވެ.
މިއަހަރުގެ ޖޫންމަހު ބޭއްވި ފުރަތަމަ އެމް.އެން.ޔޫ ފަހި ފުރުޞަތުގައި ދިވެހިރާއްޖޭގެ ޤައުމީ ޔުނިވަރސިޓީގެ އިތުރުން ރާއްޖޭގެ މަޝްހޫރު ބޮޑެތި ކުންފުނިތަކާ ސަރުކާރުގެ މުއައްސަސާތައް ހިމެނޭގޮތަށް 32 ފަރާތަކުން ވަނީ ބައިވެރިވެފައެވެ.
އަންނަމަހު ބޭއްވުމަށް ހަމަޖެހިފައިވާ ޖޮބް ފެސްޓިވަލުގައި ބައިވެރިވާން ޝަޢުގުވެރިވާ ފަރާތްތަކުން، ފެސްޓިވަލުގައި ބައިވެރިވުމަށް ވަޒީފާދޭ ފަރާތްތައް ހުށައަޅާ ފޯމު ފުރުއްވުމަށްފަހު މިމަހުގެ 24 ވާ ހޯމަ ދުވަހުގެ މެންދުރު 14:00 ކުރިން ހުށަހެޅުއްވުމަށް އެމް.އެން.ޔޫއިން ވަނީ އެދިފައެވެ.