މީހުން ބިނާކުރުމަށް ހިންގާ ނޭޝަނަލް އެޕްރެންޓިސްޝިޕް ޕްރޮގްރާމްގެ ދަށުން އަންނަ އަހަރުގެ ނިޔަލަށް 3000 ޒުވާނުން ތަމްރީނުކޮށް ނިންމާލެވޭނެކަމަށް ޔޫތް މިނިސްޓްރީން ވިދާޅުވެއްޖެއެވެ.
3000 ޒުވާނުން ތަމްރީނުކޮށް ވަޒީފާގެ ފުރުސަތު ހޯދައިދިނުމަށްޓަކައި ސަރުކާރު ހިއްސާވާ ކުންފުނިތަކާއި އަދި އަމިއްލަ ކުންފުނިތައް ގުޅިގެން ޤައުމީ ފެންވަރުގައި ހުޅުވާލައިގެން ނޭޝަނަލް އެޕްރެންޓިސްޝިޕް ޕްރޮގްރާމް ފަށާފައިވަނީ މިދިޔަ އަހަހަރުގެ ތެރޭގައެވެ.
މި ޕްރޮގްރާމްގެ މަޢުލޫމާތު ހިއްސާކުރައްވަމުން ޔޫތް މިނިސްޓްރީގެ ކޮންސަލްޓެންޓް އަޙްމަދު ނިޝާމް ވިދާޅުވީ، ނެޝަނަލް އެޕްރެންޓިސްޝިޕް ޕްރޮގްރާމްގައި މިވަގުތު 14 ކުންފުންޏެއް ބައިވެރިވެފައިވާކަމަށެވެ. މިވަގުތު ސަރުކާރުގެ ކުންފުނިތައް ގިނަނަމަވެސް، އަމިއްލަ ކުންފުނިތަކާއެކު އެއްބަސްވުން ހެދުމުގެ މަސައްކަތް ކުރަމުން އަންނަކަމަށް ނިޝާމް ވިދާޅުވިއެވެ.
މިގޮތުން ފަތުރުވެރިކަމުގެ ސިނާއަތަށް ވަރަށް އަވަހަށް މި ޕްރޮގްރާމް ފުޅާ ކުރެވިގެންދާނެކަމަށާއި، މިހާރުވެސް ދެ ރިސޯޓަކުން އެކަމަށް ޝަޢުގުވެރިކަން ފާޅުކުރަމުން އަންނަކަމަށް ނިޝާމް ވިދާޅުވިއެވެ. މިއިން ކޮންމެ ރިސޯޓަކުން 100 ފުރުޞަތު ވަނީ ހުށައަޅާފައެވެ.
މި ޕްރޮގްރާމްގެ ދަށުން މިވަގުތު 867 ފުރުސަތު އެކި ކުންފުނިތަކުން ލިބިފައިވާކަން ފާހަގަކުރައްވާ ނިޝާމް ވިދާޅުވީ، މިހާރުވެސް 336 މީހުން އެޕެރެންޓިސްޝިޕް ޕްރޮގްރާމްގެ ދަށުން ކުންފުނިތަކުގައި މަސައްކަތް ކުރަމުން އަންނަކަމަށެވެ. އަދި ކުރިއަށް އޮތް އަހަރުގެ ތެރޭގައި ޓާގެޓަށް ވާޞިލްވުމުގެ އުއްމީދުއޮތްކަމަށްވެސް ނިޝާމް ވިދާޅުވިއެވެ.
މި ޕްރޮގްރާމްގެ ދަށުން މިވަގުތު 25 މީހުން ތަމްރީން ފުރިހަމަކޮށްފައިވާ ކަމަށާއި، މީގެ ތެރެއިން 22 މީހަކަށް އެމީހުން ބައިވެރިވި ކުންފުނިންވަނީ ވަޒީފާ ހަމަޖެހިފައެވެ.
ނޭޝަނަލް އެޕްރެންޓިސްޝިޕް ޕްރޮގްރާމަކީ ސަރުކާރުގެ ސްޓްރެޓެޖިކް އެކްޝަން ޕްލޭންގެ ދަށުން ޒުވާނުންގެ ތެރެއިން ހަވާސާވެފައިވާ ޒުވާނުންނާއި، އަދި ޖުމްލަކޮށް ދެޖިންސުގެ ޒުވާނުންނަށް އަމާޒްކޮށްގެން ތަފާތު ހުނަރުތައް ދަސްކޮށްދީ، ވަޒީފާގެ ބާޒާރަށް އަހުލުވެރި ކުރުވައި، އަދި ޒުވާނުންނަކީ ޤައުމުގެ އިޤްތިސާދީ ތަރައްޤީއާއި އިޖްތިމާއީ ހަމަޖެހުމަށް މަސައްކަތްކުރާ ބަޔަކަށް ހެދުމުގެ ގޮތުން ކުރިއަށްގެންދާ ޕްރޮގްރާމެކެވެ.