ބަލިމީހުންގެ ރައްކާތެރިކަމާއި ގުޅޭ މަހާސިންތާއެއް ފުރަތަމަ ފަހަރަށް ޤައުމީ ފެންވަރުގައި ބާއްވައިފި

ބަލިމީހުންގެ ރައްކާތެރިކަމާއި ގުޅޭގޮތުން ޤައުމީ ފެންވަރުގައި ބޭއްވި ފުރަތަމަ މަހާސިންތާ ނިންމާލައިފިއެވެ.

މިމަހާސިންތާ ކުރިއަށް ގެންގޮސްފައިވަނީ މިމަހުގެ 23 ން 27 އަށެވެ.

މިއަހަރުގެ ބަލިމީހުންގެ ރައްކާތެރިކަމާބެހޭ ދުވަހުގެ ޝިއާރަކީ "ގެއްލުމާއި ނުލާ ބޭސްފަރުވާ" މިއެވެ. އަދި މި މަހާސިންތާގެ ޝިއާރަކީ "ބަލިމީހުންނަށް ރައްކާތެރިކަން ފޯރުކޮށް ދިނުން ފެށެނީ އަހަރެންނާއި ހަމައިން" މިއެވެ.

ޑަބްލިޔު.އެޗް.އޯއާއި ގުޅިގެން މިިދިޔަ އާދިއްތަ ދުވަހު ފެށި މި މަހާސިންތާގައި އެކި ދާއިރާތަކުގައި މަސައްކަތް ކުރައްވާ ސިއްހީ ޚިދްމަތްތެރިން ބައިވެރިވެފައިވެއެވެ. އޭގެތެރޭގައި، ޑޮކްޓަރުންނާއި، ނަރުހުންނާއި، ލެބޯޓްރީ ޓެކްނީޝަނުންނާއި، ކޮމިއުނިޓީ ހެލްތު ވޯކަރުންނާއި ޞީއްޙީ ދާއިރާގެ އެކިއެކި ފަންނީ ލެކްޗަރާއިން ހިމެނެއެވެ. 75 ފަރާތުން މަހާސިންތާގެ ޖަލްސާއަށް ހާޒިރުވެގެން ބައިވެރިވިއިރު 100 އަށްވުރެ ގިނަ ފަރާތުން ބައިވެރިވީ އޮންލައިންކޮށްނެވެ.

މަހާސިންތާގެ ޖަލްސާތަކަށް މާލެ ހިމެނޭ ގޮތަށް ކޮންމެ އަތޮޅަކުން 2 މީހަކު ހާޒިރުވެ ބައިވެރިވިއެވެ. އަދި މާލެ ސަރަހައްދުގައި ހިމެނޭ ހޮސްޕިޓަލްތަކުން 3-7 އާއި ދެމެދުގެ އަދަދަށް ސިއްހީ ޚިދްމަތްތެރިން ބައިވެރިވިއެވެ. މިމަހާސިންތާގައި ވާޗުއަލްކޮށް ބައިވެރިވެފައިވަނީ ސިއްހީ ޚިދުމަތްދޭ މަރުކަޒުތަކުގައި މަސައްކަތް ކުރާ ސިއްހީ ޚިދުމަތްތެރިންނެވެ.

މިމަހާސިންތާގައި ބަލިމީހުންގެ ރައްކާތެރިކަމާއި، ރައްކާތެރި ގޮތުގައި ބޭސް ދިނުމާއި، ގެއްލުމާއި ނުލާ ބޭސް ދިނުމާއި، އިންފެކްޝަނުން ރައްކާތެރިވުމާއި އަދި ކޮންޓްރޯލް ކުރުމާއި، ޞިއްޙީ ޚިދުމަތްދޭ ތަންތަނުން ޖެހޭ އިންފެކްޝަން މޮނިޓަރ ކުރުމާއި، ޞިއްޙީ ޚިދުމަތްދޭ ތަންތަނުގައި އުފެދޭ ކުނި މެނޭޖްކުރުމާއި، ޞިއްޙީ ޚިދުމަތްދޭ އާލާތްތައް ރައްކާތެރިކުރުމާއިމެދު މަޝްވަރާކޮށްފައިވެއެވެ. އަދި ބަލިމީހާގެ ރައްކާތެރިކަން ކަށަވަރު ކުރުމުގައި ފަރމަސިސްޓުންގެ މުހިންމުކަމާއި ސަރޖަރީތަކުގެ ރައްކާތެރިކަމަށް ބޭނުންކުރާ ސަރޖިކަލް ޗެކްލިސްޓަށް އަހުލުވެރިކުރުމާއި، ސިއްހީ ދާއިރާގެ އެކިއެކި ކޯސްތަކުގެ ކަރިކިއުލަމްގައި އިންފެކްޝަނުން ރައްކާތެރިވުމާ ގުޅޭ މަޢުލޫމާތުތައްވެސް ހިއްސާކޮށްފައިވާކަމަށް ހެލްތު މިނިސްޓްރީން ވިދާޅުވެއެވެ. މީގެ އިތުރަށް ބަލިމީހުންގެ ރައްކާތެރިކަމާއި ގުޅޭ ހާދިސާތައް ރިޕޯޓް ކުރުމާއި އެފަދަ ހާދިސާތަކުން ދަސްކުރާނެ ނިޒާމްތަކާއި "ޕޮއިންޓް އޮފް ކެއަރ" ކޮލިޓީ ހިފެހެއްޓުމާއި ގުޅޭގޮތުން ނެގިފައިވާ ފިޔަވަޅުތަކުން ޓްރެއިނިންގ ދިނުމާއި ގުޅޭގޮތުން މި މަހާސިންތާގައި މަޝްވަރާ ކުރެވިފައިވެއެވެ.

ހެލްތު މިނިސްޓްރީން ވިދާޅުވީ މި މަހާސިންތާގައި ކޮލިޓީ ރަނގަޅު ކުރުމާއި ބެހޭ 30 ޕްރޮޖެކްޓެއް ފަރުމާ ކުރެވި، ފެސިލިޓޭޓަރުންގެ އެހީގައި ބައިވެރިންނަށް ހުށަހަޅާދީފައިވާކަމަށެވެ. މިޕްރޮޖެކްޓްތަކުގެ ތެރެއިން ކާމިޔާބު ކަމާއިއެކު ތަންފީޒުކުރެވޭ ޕްރޮޖެކްޓްތައް ބައިނަލްއަޤްވާމީ ނޫސް މަޖައްލާއެއްގައި ޝާޢިއު ކުރުމުގެ ފުރުސަތު ލިބިގެންދާނެ ކަމަށް ހެލްތު މިނިސްޓްރީން ބުނެއެވެ.

މި މަހާސިންތާގައި މައުލޫމާތު ދެއްވާފައިވަނީ ކަމާގުޅޭ ރާއްޖޭގެ 12މާހިރަކާއި ރާއްޖެއިން ބޭރުގެ 21 މީހެކެވެ. މި މަހާސިންތާ އިންތިޒާމް ކޮށްފައިވަނީ ޑަބްލިޔު.އެޗް.އޯގެ އެހީގައި މިނިސްޓްރީ އޮފް ހެލްތުގެ ކޮލިޓީ އެޝުއަރެންސް އަދި ރެގިއުލޭޓަރީ ޑިވިޜަނުގެ ފަރާތުންނެވެ. އަދިި "ޕޮއިންޓް އޮފް ކެއަރ ޓްރެއިނިންގ'' ހިންގާފައިވަނީ އިންޑިޔާގެ ނޭޝަނަލް ކޮލިޓީ އޮފް ކެއަރ ނެޓްވޯރކްއާއި ގުޅިގެންނެވެ.