ކުރިއަށް އޮތް 3 އަހަރުތެރޭ ބޮޑު ތިލަދުންމަތީގައި އިތުރު 6 ރިސޯޓު ހުޅުވޭނެ ކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ ކުޅުދުއްދުށި އުތުރު ދާއިރާގެ މެންބަރު ޔާސިރު ޢަބްދުއްލަތީފު ކުރެއްވި ސުވާލަކަށް ޖަވާބުދެއްވަމުންނެވެ.
ރައްޔިތުންގެ މަޖިލީހުގައި ވާހަކަފުޅުދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، ހއ.ހދ. އަދި ށ. އަތޮޅުގައި ރިސޯޓު، ހޮޓާ އަދި ގެސްޓުހައުސްތަކުން ފަތުރުވެރިކަމަށް 1724 އެނދު ރަޖިސްޓްރީކޮށްފައިވާ ކަމަށެވެ. އޭގެތެރެއިން 1524 އެނދު އޮޕަރޭޝަނަށް ގެނެސްފައިވާ ކަމަށެވެ.
ކުރިއަށް އޮތް 2 އަހަރުތެރޭގައި ހދ. ދިއްޕަރުފުށި އަދި ހދ. ނާގޯށީގެ ފުރަތަމަ ފޭސް ހުޅުވި، ކުރިއަށް އޮތް 3 އަހަރުތެރޭގައި އިތުރު 4 ރިސޯޓު ހުޅުވިގެންދާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ގެސްޓު ހައުސްތަކުން އިތުރުވާނެ ފަތުރުވެރިކަމުގެ އެނދުގެ އަދަދާއެކު ކުރިއަށް އޮތް 3 އަހަރުތެރޭ އެ ސަރަޙައްދުގައި ފަތުރުވެރިކަމުގެ އެނދުގެ އަދަދު 3700އަށް އަރާނެ ކަމަށެވެ.
" 3 އަހަަރުތެރޭ އިތުރު 4 ރިސޯޓެއް އޮޕަރޭޝަނަށް އަންނާނެ، އެއީ ހއ. ބެރިންމަދޫ، ށ. ހުރަސްފަރު، މާއިންފަރު އަދި ކަބާލިފަރު، މީގެއިތުރުން ޓޫރިސްޓު ހޮޓާތައް ތަރައްޤީކުރުމުގެ މަސައްކަތް ހއ. ކެލާ، ހއ. އުތީމް، އަދި ހއ، ވަށަވަރުގައި ކުރިއަށްގެންދާ ހޮޓާ ރިސޯޓު ނިމި 404 އެނދު ތައާރަފްކުރެވޭނެ ކަމަށް ބެލެވޭ،" މިނިސްޓަރ މައުސޫމް ވިދާޅުވިއެވެ.
މިނިސްޓަރ ވިދާޅުވީ ހދ. ހަނިމާދޫ އިންޓަރނޭޝަނަލް އެއަރޕޯޓް ތަރައްޤީކުރެވިގެންދާއިރު އެސަރަހައްދުގައި ފަތުރުވެރިކަމަށް އެކަށީގެންވާ މިންވަރަށް އެނދުތައް ހުންނާނެ ކަމަށެވެ. އެގޮތުން ފުުރަތަމަ އަހަރުތެރޭ ކޮންމެ ދުވަހަކު އެއެއަރޕޯޓު މެދުވެރިކޮށް ދުވާލެއްގެ މައްޗަށް 300 ފަތުރުވެރިން އަންނާނެ ކަމަށް ލަފާކުރެވޭއިރު، ބެޑް ކެޕޭސިޓީ އެމިންވަރަށް އެބަހުރި ކަމަށެވެ.
" ހަނިމާދޫ އެއަރޕޯޓު ފުލް ކެޕޭސިޓީގައި ޑެއިލީ ފަސިންޖަރގެ އަދަދު 1180 ފަސިންޖަރސް އުޅޭނެ ކަމަށް ބެލެވޭ، ފުރަތަމަ އަހަރު ޖުމްލަ ކެޕޭސިޓީގެ %20 ގައި އޮޕަރޭޓުކުރާނެ ކަމަށް ބެލެވޭ، އެގޮތުން 300 ފަސިންޖަރުން އަންނާނެ، މިހާރު ހުރި ބެޑު ކެޕޭސިޓީ އާއި އިތުރުވާނެ ބެޑު ކެޕޭސިޓީން އެމިންވަރަށް ބެޑު އެބަހުރި،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ބެޑު ކެޕޭސިޓީގެ އިތުރަށްވެސް ފަތުރުވެރިކަން ކުރިއަރައިގެން ދިޔުމަށް ބޭނުންވާނެ އެހެން ވަސީލަތްތައްވެސް ތަރައްޤީކުރުން މުހިންމު ކަމަށެވެ. އެގޮތުން ފެނާއި ނަރުދަމާ އާއި އިންޓަރނެޓުގެ ޚިދުމަތާއި، ރެސްޓޯރެންޓު ފަދަ ޚިދުމަތްތައް ހުރުން މުހިއްމުކަމަށް މިނިސްޓަރ ވިދާޅުވިއެވެ.