އެމްއައިބީގެ ޗެއާމަންގެ މަޤާމަށް ކާޒީ އަބޫ މުޙައްމަދު މާޖިދުއް ރަޙްމާން އަދި ސީއީއޯގެ މަޤާމަށް މުފައްދަލް އިދުރީސް ޚުމްރީ އައްޔަންކޮށްފިއެވެ.
އެމްއައިބީގެ ޗެއާމަންގެ މަޤާމަށް ކާޒީ އަބޫ މުޙައްމަދު މާޖިދުއް ރަޙްމާން މި މަގާމަށް އައްޔަން ކޮށްފައިވަނީ މިދިޔަ ހޯމަދުވަހުއެވެ. 2012 ވަނަ އަހަރުން ފެށިގެން ޗެއަރމަންގެ މަޤާމުގައި ހުންނެވި ނަޖްމުލް ޙަސަންގެ ބަދަލުގައި އެ މަގާމަށް އަލަށް އައްޔަން ކުރެވުނު މާޖިދުއް ރަޙްމާނަކީ 2021 ވަނަ އަހަރުގެ އޮކްޓޯބަރ މަހުން ފެށިގެން އެބޭންކުގެ ބޯޑު މެންބަރުކަން ވެސް ކުރައްވަމުން އަންނަ ބޭންކިންގ ދާއިރާގެ ތަޖުރިބާކާރެކެވެ.
މާޖިދުއް ރަޙްމާން ވަނީ މީގެ ކުރިން ބަންގްލަދޭޝްގެ އިތުރުން މެދުއިރުމަތި، އެފްރިކާ އަދި އޮސްޓްރޭލިއާގެ މާލީ އިދާރާތަކުގެ އެކި މަގާމުތައް ފުރުއްވާފައެވެ.
ޗެއާމަންގެ މަޤާމަށް ކާޒީ އަބޫ މުޙައްމަދު މާޖިދުއް ރަޙްމާން އައްޔަންކޮށްފައިވާއިރު އެމްއައިބީގެ ހުސްވެފައިވާ ސީއީއޯގެ މަޤާމަށް މުފައްދަލް އިދުރީސް ޚުމްރީ ވަނީ އައްޔަން ކޮށްފައެވެ.
ބޭންކިން ދާއިރާގެ 25 އަހަރުގެ ތަޖުރިބާ އާއި އެކު މުފައްދަލް އަކީ އިސްލާމިކް ފައިނޭންސް ދާއިރާގެ ތަޖުރިބާކާރެއް ވެސްމެއެވެ. އޭނާ ވަނީ އިސްލާމިކް ފައިނޭންސް ދާއިރާގައި 17 އަހަރު ޚިދުމަތް ކުރައްވާފައެވެ.
މި މަގާމާ ޙަވާލުވުމަށްފަހު މުފައްދަލް ވިދާޅުވި ގޮތުގައި، ކަސްޓަމަރުންނަށް ދެވޭ ޚިދުމަތް ރަނގަޅު ކުރުމަށާއި ޑިޖިޓަލް ބޭންކިން ފުޅާކުރުމާއި ރީޓެއިލް ކަސްޓަމަރުންގެ އިތުރުން ވިޔަފާރިތަކަށް ދެވޭ ޚިދުމަތް ފުޅާކޮށް އެމްއައިބީގެ ވިޔަފާރި ފުޅާކުރުމަށް މަސައްކަތް ކުރާނެ ކަމަށެވެ. އަދި ރާއްޖޭގައި އިސްލާމިކް ބޭންކިން އިތުރަށް ފުރިހަމަކޮށް ފުޅާކުރުމަށް އިސްކަން ދޭނެކަމަށް ވިދާޅުވިއެވެ.