ބައިނަލްއަގުވާމީ ކޮންޓްރެކްޓްތަކާ ގުޅޭގޮތުން ކޮންސްޓްރަކްޝަން ދާއިރާއިން މީހުން ތަމްރީންކޮށްފިއެވެ.
މި ތަމްރީންތައް ކުރިއަށް ގެންގޮސްފައިވަނީ މޯލްޑިވްސް ނެޝެނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ(މަސީ) އަދި އިންޓަނޭޝަނަލް ފެޑެރޭޝަން އޮފް ކޮންސަލްޓިން އިންޖިނިއަރިން (ފިޑިކް) ގުޅިގެންނެވެ.
މި ތަމްރީންގެ ދަށުން ފިޑިކްގެ އުސޫލުތަކާއި އަދި ފިިޑިކްގެ ކޮންޓްރެކްޓްތައް ބޭނުންކުރެވޭނެ ގޮތްތަކާ ގުޅޭ ގޮތުން ބައިވެރިންނަށް ވަނީ ތަމްރީން ދީފައެވެ.
މި ތަމްރީން ފުރިހަމަކުރި ބައިވެރިންނަށް ސެޓްފިކެޓް ދިނުމަށް ބޭއްވި ރަސްމިއްޔާތުގައި މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހިމް ހަސަން ވިދާޅުވީ މިފަދަ ތަމްރީން ޕްރޮގްރާމްތަކަކީ ވަރަށްމުހިއްމު ތަމްރީން ޕްރޮގްރާމެއްކަމަށާއި ކޮންސްޓްރަކްޝަން ދާއިރާގެ މަސައްކަތްތައްފަދަ ފަންނީ މަސައްކަތްތަކަކީވެސް އިހްތިރާމް ލިބިގެންވާ މަސައްކަތްތަކަށް ހަދަން ޖެހޭކަމަށެވެ. އަދި މިފަދަ މަސައްކަތް ކުރާ މީހުންނަކީ އެކަން ކުރަން އެނގޭ، އެ މަސައްކަތް ކުރުމުގެ ހުއްދަ ލިބިފައިވާ ފަރާތްތަކަށްވުމަކީވެސް މުހިއްމުކަމެއްކަމަށް އޭނާ ވިދާޅުވިއެވެ.
މީގެ ކުރިން ކޮންޓްރެކްޓްތަކާ ގުޅޭ ތަމްރީންތައް ހަދަމުން ގެންދިޔައީ ރާއްޖެއިން ބޭރަށް ގޮސް ނޫނީ ތާޑް ޕާޓީތައް ގެނެސްގެންނެވެ. ނަމަވެސް މަސީން ފިޑިކްއާއީ ސީދާ ގުޅިގެން ދެ މަސްދުވަހުގެ ތަމްރީންތައް ކުރިއަށް ގެންދިޔައީ އޮންލައިންކޮށެވެ. އެ ތަމްރީންތަކުގައި ކޮންޓްރެކްޓްތަކަށް އަހުލުވެރިކުރުމާއި އަދި ކޮންޓްރެކްޓްތަކުގައި ދިމާވާ މައްސަލަތައް ހައްލުކުރުމާ ގުޅޭ ގޮތުން ދެ މޮޑިއުލްއެއް ކުރިއަށް ގެންދިޔައެވެ. މި ދެ މޮޑިއުލްއިންވެސް 31 ދަރިވަރުން ވަނީ ފާސްވެފައެވެ.
މި ތަމްރީންތަކުގައި ބައިވެރިވި ފަރާތްތަކުގެ ތެރޭގައި އަމީން ކޮންސްޓްރަކްޝަން ފަދަ ޕްރައިވެޓް ކުންފުނިތަކާއި، ސްޓެލްކޯ، އެޗްޑީސީ އަދި ފަހި ދިރިއުޅުން ކޯޕަޜޭޝަން ހިމެނެއެވެ.