އަމިއްލަ މަސައްކަތްކުރާ ފަރާތްތަކަށް މާލީ އެހީ ދިނުމުގެ ދެވަނަ ބުރު ފަށައިފި

ކޯވިޑް-19އާއި ގުޅިގެން އާމްދަނީއަށް ނުރަނގަޅު އަސަރުކޮށްފައިވާ އަމިއްލަ މަސައްކަތްކުރާ ފަރާތްތަކަށް އަމާޒްކޮށްގެން ހިންގާ މާލީ އެހީ ދިނުމުގެ ޕްރޮގްރާމުގެ ދެވަނަ ބުރަށް ފޯމު ހުށަހެޅުމުގެ ފުރުޞަތު ހުޅުވާލައިފިއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ވޯލްޑް ބޭންކް ގުޅިގެން ހިންގަމުންދާ "ކޯވިޑް-19 އެމެޖެންސީ އިންކަމް ސަޕޯޓް ޕްރޮޖެކްޓް" ގެ ދަށުން، ކޯވިޑް-19 އާ ގުޅިގެން އަމިއްލަ މަސައްކަތް ކުރާ ފަރާތްތަކަށް މާލީ އެހީގެ ޕްރޮގްރާމުގެ ފުރަތަމަ ބުރު ނިމި، ދެވަނަ ބުރަކަށް ފޯމު ހުށަހެޅުން މިހާރުވަނީ ހުޅުވާލާފައެވެ.

އިކޮނޮމިކް މިނިސްޓްރީން ވިދާޅުވީ، މި ޕްރޮގްރާމުގެ ފުރަތަމަ ބުރުގައި ހުށަހަޅާފައިވާ އެޕްލިކޭޝަން ފޯމުތައް މިހާރު ރިވިއު ކުރަމުންދާކަމަށެވެ. އަދި ދެވަނަ ބުރުގައި އެ ފަރާތްތަކުން އަލުން ފޯމު ހުށަހަޅަން ނުޖެހޭނެ ކަމަށާއި، އެހެންނަމަވެސް، ފުރަތަމަ ބުރުގެ މުއްދަތު ހަމަވިއިރު ފޯމު ހުށަނޭޅުނު ފަރާތްތަކަށް ދެވަނަ ބުރުގައި އެ ފޯމު ހުށަހެޅުމުގެ ފުރުޞަތު ހުޅުވާލެވިފައިވާނެ ކަމަށް މިނިސްޓްރީން ވިދާޅުވިއެވެ.

މާލީ އެހީ ޕްރޮގްރާމަށް ހުޅުވާލެވިފައިވާ ދާއިރާތައް:

• ކާބޯތަކެތި އުފެއްދުން
• އަތްތެރި މަސައްކަތް
• ބިއުޓީ އަދި މޭކަޕް ކުރުން
• ފޮޓޯގްރަފީ އަދި ވީޑިއޯގްރަފީ
• ފެހުން އަދި ޓެކްސްޓައިލްސް ގެ މަސައްކަތް
• އިންފޮމޭޝަން ކޮމިއުނިކޭޝަން ޓެކްނޮލޮޖީ
• ކްރިއޭޓިވް އާރޓްސް އަދި މިއުޒިކް
• ކުޅިވަރު އަދި ފިޓްނަސް

މި އެހީއަށް ޝަރުތުހަމަވާ ފަރާތްތަކަށް 60,000 (ފަސްދޮޅަސް ހާސް) ރުފިޔާއާ ހަމައަށްވާ ފައިސާގެ އަދަދެއް ގްރާންޓުގެ ގޮތުގައި ދިނުމަށް ވަނީ ހަމަޖެހިފައެވެ. އަދި މި އެހީ ލިބުމުގެ ޝަރުތެއްގެ ގޮތުން އިކޮނޮމިކް މިނިސްޓްރީގެ ފަރާތުން ދޭ ތަމްރީން ޕްރޮގްރާމް ފުރިހަމަ ކުރަންޖެހެއެވެ.

އެހީއަށް އެދުމުގައި ފުރިހަމަވާންޖެހޭ މައިގަނޑު ޝަރުތުތައް:

• 1 ޖުލައި 2022 އާއި ހަމައަށް މަދުވެގެން 6 (ހައެއް) މަސް ދުވަހުގެ މުއްދަތަކަށް އަމިއްލަ މަސައްކަތުން އާމްދަނީ ހޯދަމުން އައިސްފައިވާ ފަރާތެއް ކަމުގައި ވުން

• އެޕްލިކޭޝަން ހުށަހެޅުމާ ހަމައަށް، ފާއިތުވެދިޔަ 4 ހަފްތާގައި މުސާރަ ލިބޭ ވަޒީފާއެއް އަދާ ކުރާ ފަރާތަކަށް ނުވުން ނުވަތަ، ވަޒީފާއެއް އަދާކުރާނަމަ ހަފްތާއަކު 20 ގަޑިއިރަށްވުރެ ގިނައިރު ވަޒީފާ އަދާކުރަމުންދާ ފަރާތަކަށް ނުވުން

މި ޕްރޮގްރާމްގެ ތެރެއިން ހުޅުވާލެވިފައިވަނީ ޖުމްލަ 500 ފުރުޞަތެވެ. ފޯމު ހުށަހެޅުމުގެ ސުންގަޑިއަކީ، މިމަހުގެ 30 ވަނަ ދުވަހެވެ. މި އެހީ އަށް އެދުމަށްޓަކައި އެޕްލިކޭޝަން ހުށަހަޅަންޖެހޭނީ މިނިސްޓްރީގެ ޖޮބް ސެންޓަރ ޕޯޓަލް މެދުވެރިކޮށް އޮންލައިންކޮށެވެ.