ދިވެހިރާއްޖޭގައި މިވަގުތު ހުރި އެންމެ ކުރިއަރާފައިވާ މާލީ އިދާރާކަމަށްވާ ބެންކު އޮފް މޯލްޑިވްސް ނުވަތަ ދިވެހިންގެ ބެންކު ހުޅުވިގެންދިޔައީ 1982 ވަނަ އަހަރުގެ ނޮވެމްބަރުމަހުގެ 11 ވަނަ ދުވަހުއެވެ.
ބޭންކުގެ މަސައްކަތްތަކަށް 40 އަހަރު މިއަހަރު ފުރިގެންދިޔައިރު، ބީއެމްއެލްއަށް ލިބިފައިވާ ކުރިއެރުންތަކުގެ ފަހަތުގައި ހީވާގި އެތައް މުވައްޒަފުންތަކެއްގެ ބުރަ މަސައްކަތް ހިމެނެއެވެ. ބީއެމްއެލްއަށް އެންމެ ފުރަތަމަ ނެގި މުވައްޒަފުންގެތެރޭގައި ހިމެނޭ ބައެއް މުވައްޒަފުން އަދިވެސް އެ ބޭންކުގައި އަންނަނީ މަސައްކަތްކުރަމުންނެވެ. އެގޮތުން ފާހަގަކޮށްލެވޭ އެއް ފަރާތަކީ މޫސާ މުޙައްމަދެވެ.
މޫސަ ބޭންކުގެ ވަޒީފާ އާއި ގުޅުނުއިރު އޭނާގެ އުމުރަކީ 18 އަހަރެވެ. އޭނާއަކީ އެންމެ ފުރަތަމަ ބޭންކަށް ނެގި މުވައްޒަފުންގެ ތެރޭގައި ހިމެނޭ މީހެކެވެ. އަދި ބޭންކު އުފެދުނުއިރު ކުރި މަސައްކަތުގައިވެސް އެންމެ އިސްކޮށް އުޅުނު އެއް ފަރާތެވެ.
ޓީވީއެމްއިން ގެނެސްދޭ ހޭޔަންބޯ ޕްރޮގްރާމުގައި މެހްމާނެއްގެގޮތުގައި ބައިވެރިވެ މޫސާ މުޙައްމަދުވަނީ ބީއެމްއެލް އުފެދުނުއިރު މަސައްކަތްހުރިގޮތުގެ ތަޖުރިބާތައް ހިއްސާކޮށްފައެވެ.
މޫސަ ބުނިގޮތުގައި ރާއްޖޭގައި ބޭންކެއް ހުޅުވަން އުޅޭ ވާހަކަ އޭނާ ގާތު ބުނީ ބޭބެއެވެ. އަދި އެއީ ރަނގަޅު ފުރުސަތެއްގެ ގޮތުގައި ދެކި ބޭންކުގެ ވަޒީފާއަށް ކުރިމަތިލީއެވެ.
އެހެންނަމަވެސް 4 މަސްދުވަސް ވެގެންދިޔަ އިރުވެސް، ޚަބަރެއް ނުވުމުން، އޭނާ ކޯހެއްގައި ބައިވެރިވެރިވިއެވެ. ކޯހުގައި ބައިވެރިވިތާ 2 ދުވަސްތެރޭ، ޑިޕާޓްމަންޓު އޮފް ފިނޭންސްއިން ބޭންކުގެ ވަޒީފާއަށް ހޮވިފައިވާކަމުގެ ލިޔުން ލިބުނު ކަމަށް މޫސަ ބުންޏެވެ. ވަޒީފާއަކަށް ދިޔުމަށް ޝައުގުވެރިކަން ހުރި މިންވަރުން ފުރުސަތުގެ ބޭނުން މޫސަ ހިފިއެވެ.
މޫސަ ބީއެމްއެލްއާއި ގުޅުނީ، މެސެންޖަރެއްގެ ވަޒީފާއަށެވެ. މުސާރައަކީ 325 ރުފިޔާއެވެ. މޫސަވަނީ ބޭންކު އުފެދިގެން އައި ގޮތާއި، ބޭންކަށް ލިބިފައިވާ ކުރިއެރުންތައް ވަރަށް ކައިރިން ތަޖުރިބާ ކޮށްފައެެވެ. އެގޮތުން އޭރު ބޭންކުގެ ގިނަ މަސައްކަތްތައް ކުރަމުން އައިސްފައިވަނީ މެނުއަލްކޮށްކަން މޫސަ ފާހަގަކުރިއެވެ.
" ބޭންކަށް ދިޔުމަށްފަހު ފުރަތަމަ މަސައްކަތްކުރީ ފިނޭންސް ޑިޕާޓްމަންޓުގައި، އެތަނުގައި ޖެހުނީ ބޭންކަށް ބޭނުންވާ ފޮތްތައް ތައްޔާރުކުރުން، މި ޒަމާނުގައި ހުންނަހެން ކޮމްޕިއުޓަރ ވަސީލަތްތަކެއް ނުހުރޭ، ހުރިހާ ކަމެއްވެސް މެނުއަލްކޮށް ކުރީ،" މޫސަ ބުންޏެެވެ.
ބޭންކުގެ ޚިދުމަތަށް މިހާރު 40 އަހަރު ފުރިފައިވާއިރު ޕްރޮމޯޝަންތައް ލިބެމުން އައިސް، މޫސަ އަކީ މިހާރު ބީއެމްއެލްގެ ސީނިއަރ ފެސިލިޓީ އޮފިސަރއެވެ. އޭނާ ދެކޭގޮތުގައި ވަޒީފާގައި މިހާ ގިނަ ދުވަހު ދެމިހުރެވުމުގެ ސިއްރަކީ ބޭންކުގެ މާހައުލުގައި މުވައްޒަފުންގެ މެދުގައި އޮންނަ ގުޅުމެވެ. އަދި ވެރިންގެ އިރުޝާދުތަކަށް ފުރިހަމައަށް އަމަލުކުރުމަކީވެސް ވަޒީފާއެއްގައި ދެމިހުރުމަށް މުހިއްމު ކަމެއްގެ ގޮތުގައި މޫސަ ދެކެއެވެ.
" އަޅުގަނޑު ދެކޭގޮތުގައި ބޮޑެއްޗަށް ތިބޭ މީހުން ދައްކާ މަގުންނޭ އަބަދުވެސް ތިބެން ޖެހޭނީ، އެއަށް ކަށިޔާރުކޮށްނުލާ، އެބޭފުޅުން ވިދާޅުވާ ގޮތަށް އުޅުމުން ކަންނޭގެ އަޅުގަނޑަށް ހީވަނީ، އެންމެންގެވެސް ލޯބި ލިބިގެން މިހާތަނަށް އުޅެވުނީ،" މޫސަ ބުންޏެވެ.
މޫސަ ފަދަ އަދި އިތުރު މުވައްޒަފުންވެސް ބީއެމްއެލްގައި އަންނަނީ މަސައްކަތްކުރަމުންނެވެ. އެގޮތުން ބީއެމްއެލްގެ ޑެޕިއުޓީ ސީއީއޯ އައިޝަތު ނޫރައްދީން އަދި ބީއެމްއެލްގެ ޑިރެކްޓަރ އޮފް ޑިވެލޮޕްމަންޓު ފާތިމަތު މަނިކުވެސް ބޭންކުގައި މަސައްކަތްކުރާތާ މިހާރު 40 އަހަރުވީއެވެ.
ދިވެހިރާއްޖޭގައި މިވަގުތު ހުރި އެންމެ ކުރިއަރާފައިވާ މާލީ އިދާރާކަމަށްވާ ބެންކު އޮފް މޯލްޑިވްސް ނުވަތަ ދިވެހިންގެ ބެންކު ހުޅުވުނީ 1982 ވަނަ އަހަރުގެ ނޮވެމްބަރުމަހުގެ 11 ވަނަ ދުވަހުއެވެ. ބޮޑުތަކުރުފާނު މަގުގައި، މިހާރުގެ ބީއެމްއެލްގެ ހެޑް އޮފީސް ހުރި ތަނުގައި ދެ ބުރިއަށް ހަދާފައިވާ އިމާރާތުގައި ޤާއިމްވެގެންދިޔަ ބެންކް އޮފް މޯލްޑިވްސް ހުޅުވައިދެއްވީ އޭރުގެ ރައީސުލްޖުމްހޫރިއްޔާ މައުމޫން އަބްދުލްޤައްޔޫމްއެވެ.