އައްޑޫސިޓީ ގަން އިންޓަރނޭޝަނަލް އެއަރޕޯޓު ޒަމާނީ ފެންވަރަށް ތަރައްޤީ ކުރުމުގެ މަސައްކަތް އަންނަ ޖެނުއަރީމަހުގެ ތެރޭގައި ބަޔަކާއި ހަވާލުކުރެވިގެންދާނެކަމަށް އިކޮނޮމިކް މިނިސްޓްރީން ހާމަކޮށްފިއެވެ.
ގަން އެއާޕޯޓު ތަރައްޤީކުރުމުގެ މަޝްރޫޢު ޕްރީ ކޮލިފިކޭޝަން މަސައްކަތް އިންޑިއާގެ އެގްޒިމް ބޭންކުން މޭއި މަހު ވަނީ ފަށާފައެވެ. އަދި ޕްރީ ކޮލިފިކޭޝަނުން 7 ކުންފުންޏެއް ވަނީ ކޮލިފައިވެފައެވެ. މިއާއެކު މި 7 ކުންފުންޏަށް ބީލަން ހުށަހެޅުމުގެ ފުރުސަތު މިމަހުގެ 21 ވަނަ ދުވަހަށް ހަމަވާނެއެވެ.
ސަރުކާރަށް 4 އަހަރު ފުރުމާއި ގުޅިގެން ޕީއެސްއެމް ނިއުސްއިން ގެނެސްދޭ ޚާއްސަ ޕްރޮގްރާމުގައި ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޟް އިސްމާއިލް ވިދާޅުވީ، މި ސަރުކާރުން އައްޑޫގެ ތަރައްޤީއަށް އަމާޒުކޮށް ގިނަ މަޝްރޫޢުތަކެއް ކުރިއަށްގެންދަމުންދާ ކަމަށެވެ. އަދި މި މަޝްރޫޢުތަކުގެ ތެރެއިން އައްޑޫ ގަން އިންޓަރނޭޝނަލް އެއަރޕޯޓު ޒަމާނީ ފެންވަރަށް ތަރައްޤީކުރުމުގެ މަސައްކަތް ކުރިއަށް އޮތް ދެމަސްދުވަސްތެރޭ ބަޔަކާއި ހަވާލުކުރެވިގެންދާނެކަމަށް މިނިސްޓަރ ވިދާޅުވިއެވެ. އެހެންނަމަވެސް މި މަޝްރޫޢު ކުރިއަށްދާ ދުވެލި ކޯވިޑާއި ގުޅިގެން ލަސްވެފައިވާކަން މިނިސްޓަރ ފާހަގަކުރެއްވިއެވެ.
" އައްޑޫގެ ޕްރޮޖެކްޓު ހިތްހަމަޖެހޭ ވަރަކަށް އެބަކުރިއަށްދޭ، އެހެންނަމަވެސް ކޮންމެ ސަރުކާރަކުންވެސް ބޭނުންވާނެ އެ ސަރުކާރުގެ މުއްދަތުގެތެރޭގައި ނިމި ރައްޔިތުންނަށް ބޭނުންކުރެވޭ ހިސާބަށް ދިޔުން، އަޅުގަނޑުމެންވެސް އުއްމީދުކުރީ އެގޮތަށް އެކަން ކުރެވޭނެގޮތެއް ވޭތޯ، އެހެންނަމަވެސް ކޯވިޑާއި މި ހުރިހާ ކަމެއްގެ ސަބަބުން ވަގުތުވެސް ގެއްލުނީ ފައިސާވެސް ގެއްލުނީ" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އައްޑޫގެ ރައްޔިތުން ދެކެމުން އައި ހުވަފެން ހަޤީގަތަކަށް ހަދަން ކުރަންޖެހޭ ހުރިހާ މަސައްކަތެއް ސަރުކާރުން މިހާރު ކޮށްފައިވާކަމަށެވެ. އެހެންނަމަވެސް މަޝްރޫޢުތައް ނިމެން އަދި ވަގުތު ބޭނުންވާކަން މިނިސްޓަރ ފާހަގަކުރެއްވިއެވެ.
ގަން ޒަމާނީ ފެންވަރަށް ތަރައްޤީކުރުމަކީ ރައީސް އިބްރާޙިމް މުހައްމަދު ސާލިޙްގެ ވަޢުދުފުޅެކެވެ. މިއީ ދެކުނުގެ އިޤްތިޞާދީ ހަބެއްގެ ގޮތުގައި އައްޑޫ ތަރައްޤީ ކުރުމަށް ސަރުކާރުން ގެންގުޅޭ ސިޔާސަތައް ވަރަށް މުހިންމު މަޝްރޫޢެއް ކަމަށް އިކޮނޮމިކް މިނިސްޓްރީން ވިދާޅުވެއެވެ.
އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ގަން އިންޓަނޭޝަނަލް އެއަރޕޯޓު ތަރައްޤީ ކުރާއިރު، މިއީ އަހަރަކު 1.5 މިލިއަން ފަސިންޖަރުންނަށް ޚިދުމަތްދެވޭ ގޮތަށް ތަރައްޤީ ކުރާ އެއަރޕޯޓެކެވެ. މިމަޝްރޫޢުގެ ދަށުން ޒަމާނީ ފެންވަރަށް ޓާމިނަލް ތަރައްޤީކޮށް، ޑިއުޓީ ފްރީ ފިހާރަތަކާއި ރެސްޓޯރެންޓުތަކާއި ލައުންޖުތަކުގެ އިތުރުން، އައު ކޮންޓްރޯލް ޓަވަރަކާއި ފަޔަރ ސްޓޭޝަނެއް ޤާއިމް ކުރުމަށް ވަނީ ހަމަޖެހިފައެވެ.
މީގެ އިތުރުން އެއަރޕޯޓުގައި ކޯލްޑް ސްޓޯރޭޖެއް ތަރައްޤީ ކުރެވި، ކާގޯ ވަސީލަތްތައް އިތުރަށް ތަރައްޤީކޮށް، މަގުތައް ހަދައި ޕާކިންގެ އިތުރުން އެއަރޕޯޓަށް ބޭނުންވާ އެހެނިހެން ވަސީލަތްތައް ތަރައްޤީ ކުރުމަށް މިމަޝްރޫއުގެ ތެރޭގައި ހަމަޖެހިފައިވާ ކަމަށް އިކޮނޮމިކް މިނިސްޓްރީން ވިދާޅުއެވެ.
ގަން އެއަރޕޯޓު ތަރައްޤީ ކުރުމަށް 17 މިލިއަން ޑޮލަރު ޚަރަދުވާނެކަމަށް މީގެ ކުރީން ސަރުކާރުން ވަނީ ހާމަކުރައްވާފައެވެ. މިމަޝްރޫޢުގެ ސަބަބުން ދެކުނުގެ މަސްވެރިކަމާއި ފަތުރުވެރިކަން ތަރައްޤީ ކުރުމަށް މަގުފަހިވެގެންދާނެ ކަމަށް ސަރުކާރުން ވިދާޅުވެއެވެ. އަދި މި މަޝްރޫޢުގެ ސަބަބުން ސީދާގޮތުންނާއި ނުސީދާގޮތުން އެތައް ހާސް ވަޒީފާއެއް އުފެދި، ދެކުނުގެ ރައްޔިތުންގެ ފުދުންތެރިކަން އިތުރުކުރުމަށް މަގުފަހިވެގެންދާނެކަމަށްވެސް ސަރުކާރުން ވިދާޅުވެއެވެ.