މިހާރު ކުރިއަށްދާ އުމްރާނީ ތަރައްޤީގެ މަޝްރޫޢުތަކާއެކު ރާއްޖޭގެ އިޤްތިޞާދު ހަތަރު ގުނަ ފުޅާވެގެން ދިޔުމުގެ ފުރުސަތު އޮންނާނެ ކަމަށް ފިނޭންސް މިނިސްޓަރ އިބްރާޙިމް އަމީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ސަރުކާރަށް 4 އަހަރު ފުރުމާއި ގުޅިގެން ޕީއެސްއެމް ނިއުސްއިން ގެނެސްދޭ ޚާއްސަ ޕްރޮގްރާމުގައި ވާހަކަފުޅުދައްކަވަމުންނެވެ.
ދައުލަތުގެ ދަރަނި އިތުރުވެފައިވާ ކަމަށް ބައެއް ފަރާތްތަކުން ބުނާ ބުނުމަށް ރައްދުދެއްވަމުން މިނިސްޓަރ އަމީރު ވިދާޅުވީ، މި ސަރުކާރުގެ ދަރަނި އިތުރުވެގެންދިޔައީ، ކޯވިޑުން އަރައިގަންނަން ކުރި މަސައްކަތްތަކަށް ނެގި ލޯންތަކުގެ ސަަބަބުން ކަމަށެވެ. އެގޮތުން ފަރުދުންނަށް ލިބުނު ގެއްލުންތަކަށާއި، ވިޔަފާރިތަކަށް އެހީވުމަށް ސަރުކާރުން ގިނަ މަސައްކަތްތަކެއް ކުރިކަމަށް މިނިސްޓަރ ވިދާޅުވިއެވެ.
"އޭގެ ނަތީޖާއަކަށްވީ ދަރަންޏަށް ފައިސާ ނަގައިގެންވެސް ކަންތައްތައް ކުރަން ޖެހުން، އޭރުގެ ވިސްނުމަކީ ކުރަން ޖެހުނު ކޮންމެ ކަމެއް ކޮށްގެންވެސް ރާއްޖޭގެ އިޤްތިޞާދު ފްރީ ފޯލްއަކަށް ދިިޔަ ނުދީ ހިފެހެއްޓުން، އެއީ އިޤްތިޞާދު ކުރިއަށް ނަގާ އިޤްތިޞާދު ކޮޅަށްޖަހަން ވަގުތު ލިބޭއިރު، އެންމެން އެ ހާލަތުގައި ތިބުން،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކޯވިޑުގެ ހާލަތުން އަރައިގަތުމަށް ކުރަންޖެހުނު ޚަރަދުތަކާއެކު ދައުލަތުގެ ދަރަނި އިތުރުވި ކަމަށެވެ. މިނިސްޓަރ އަމީރު ވިދާޅުވީ މިސަރުކާރުގެ 4 އަހަރުތެރޭ ދަރަންޏަށް އިތުރުވެފައި މިއޮތީ ގާތްގަނޑަކަށް 39 ބިލިއަން ރުފިޔާ ކަމަށާއި މީގެތެރެއިން ގާތްގަނޑަކަށް 17 ބިލިއަން ރުފިޔާއަކީ ކޯވިޑާއި ގުޅިގެން އިތުރުވި ދަރަނި ކަމަށެވެ.
މިނިސްޓަރ ވިދާޅުވީ ލޯންގެ އެހީގައި ރާއްޖޭގައި ތަރައްޤީގެ އެކި މަޝްރޫޢުތައް ކުރިއަށްދާ ކަމަށެވެ. އެގޮތުން ރާއްޖޭގެ ހުރިހާ ރަށެއްގައި ނަރުދަމާގެ މަސައްކަތް ކުރިއަށްދާ ކަމަށާއި، ބްރިޖުގެ މަސައްކަތާއި، ރާއްޖޭގެ އުތުރާއި ދެކުނުގައިވެސް އެއަރޕޯޓުތައް އިތުރަށް ތަރައްޤީކުރުމަށްވެސް ގިނަ މަސައްކަތްތަކެއް ކުރެވެމުންދާ ކަމަށް މިނިސްޓަރ ވިދާޅުވިއެވެ.
"ބުރިޖުގެ މަސައްކަތްކުރިއަށް އެބަދޭ، ކޮމާޝަލް ޕޯޓު ރީ ލޮކޭޝަން ކުރިއަށްދޭ، ހާއްސަކޮށް ހަނިމާދޫ އިންޓަރނޭޝަނަލް އެއަރޕޯޓާއި، ގަން އިންޓަރނޭޝަނަލް އެއަޕޯޓުގެ މަސައްކަތް ކުރިއަށް އެބަދޭ، މީގެއިތުރުން ހުޅުލޭ އިންޓަރނޭޝަނަލް ޓަރމިނަލްގެ މަސައްކަތްވެސް ކުރިއަށްދޭ، މިހާރު ރާއްޖޭގެ އިޤްތިސާދުގެ ސައިޒަކީ 6 ބިލިއަން ޑޮލަރުކަމުގައިވާ ނަމަ، މި މަސައްކަތް ނިމުމުން 3 ގުނަ 4 ގުނައަށް ފުޅާވުމުގެ ފުރުސަތު އޮތް އިޤްތިސާދަކަށްވެގެންދާނެ،" މިނިސްޓަރ ވިދާޅުވިއެވެ.
މި މަޝްރޫޢުތަކާއެކު ރާއްޖޭގެ އެކި ހިސާބުތަކަށް އިންވެސްޓުމަންޓުތައް އަންނާނެކަން މިނިސްޓަރ ފާހަގަކުރެއްވިއެވެ. އަދި ކޮންސްޓްރަކްޝަން ސެކްޓަރއަށްވެސް ގިނަ ކުރިއެރުންތަކެއް ލިބިގެންދާނެކަން މިނިސްޓަރ ފާހަގަކުރެއްވިއެވެ.