ކޮންމެ ޤައުމެއްގައިވެސް އެންމެ މުހިއްމު ރައޫސުލްމާލަކީ އެ ޤައުމެއްގެ ތުއްތުކުދީންނެވެ. ހަރުދަނާ ޒުވާން ޖީލެއް ބިނާކުރެވޭނީ އެ ޤައުމެއްގެ ކުޑަކުދީންނަށް ބޭނުންވާ ޙިމާޔަތާއި ރައްކާތެރިކަމާއި އެހެންވެސް އެންމެހައި ކަންކަން އޭގެ އެންމެ ފުރިހަމަގޮތުގައި ލިއްބައިދީގެންނެވެ.
ބައިނަލްއަޤްވާމީ ގޮތުން ފާހަގަކުރާ ކުޑަކުދިންގެ ދުވަސް މިއަދު ފާހަގަކުރަމުން އަންނައިރު އަޅުގަނޑުމެންގެ މި މުޖުތަމަޢުއަކީވެސް ލޯތްބާއި، އަޅާލުމާއެކު ކުޑަކުދިންގެ ހައްޤުތަކަށް އިޙްތިރާމްކުރާ ބަޔަކަށްވުން މުހިއްމެވެ. ބައިނަލްއަޤްވާމީ ކުޑަކުދިންގެ ދުވަސް ފާހަގަކުރުމަށް މިއަހަރު އދ. އިން ކަނޑައަޅާފައިވާ ޝިއާރަކީ "އިންކުލޫޝަން، ފޯރ އެވްރީ ޗައިލްޑް" އެވެ.
ކުޑަކުދިންނަކީ ޤައުމުގެ މުސްތަޤުބަލެވެ. އެ ޤައުމެއްގެ އެންމެ މުހިންމު ރައުސުލްމާލެވެ. ޤައުމުގެ ކުރިމަގު ބިނާވެގެންވަނީ މިއަދުގެ ކުޑަކުދިން ތަރުބިއްޔަތު ކުރެވޭ ގޮތެއްގެ މައްޗަށެވެ. ޤައުމާމެދު އެކުދިންގެ ވިސްނުން ބިނާކުރެވޭ ގޮތެއްގެ މައްޗަށެވެ.
ކުޑަކުދިންގެ ދުވަހުގެ ގޮތުގައި ބައިނަލްއަޤްވާމީ ފެންވަރުގައި ދުވަހެއް ފާހަގަކުރުމުގެ އެންމެ މުހިއްމު މަޤްޞަދަކީ، އެކުދިންނަށް ޙައްޤު ރަޙުމާއި ލޯބި ދިނުމާއި، މުޖުތަމަޢުގައި އެކުދިންނަކީވެސް މުހިންމު ބައެއްކަން އަންގައިދިނުމެވެ. އަދި ކުޑަކުދިންގެ ޙައްޤުތައް ރައްކާތެރިކުރުމުގައި މުޖުތަމަޢު ހޭލުންތެރިކޮށް، ޤައުމީ ފެންވަރުގައި ކުޑަކުދިންނަށް ދިމާވާ މައްސަލަތައް ޙައްލުކުރުމުގައި އެންމެން ގުޅިގެން މަސައްކަތްކުރުމުގެ ރޫޙު އާލާކުރުމެވެ.
އިޖްތިމާޢީ ނަޒަރުން ބަލާއިރު ރާއްޖޭގައި ކުޑަކުދިންނަށް ލިބެންވާ ޙިމާޔަތާއި ރައްކާތެރިކަމާއި އިޙްތިރާމް ލިބިދެއެވެ. އެހެންނަމަވެސް، ކުޑަކުދިންގެ ޙައްޤުތަކާ ފުށުއަރާފަދަ ޙާދިސާތައް ރާއްޖޭގައިވެސް ހިނގާލެއް މަދެއްނޫނެވެ.
އެންމެ ތުއްތު އުމުރުން ފެށިގެންވެސް އެކުދިންނަށް އެކިކަހަލަ އަނިޔާތަކާ ކުރިމާތިލާންޖެހެއެވެ. ޖިންސީ އަނިޔާތަކާއި ނަފްސާނީ އަދި ޖިސްމާނީ އަނިޔާގެއް އެތަކެއް މައްސަލަތަކެވެ. އެކުންދިންނަށް އިޙުމާލުވުމާއި، ނާޖާއީޒު ފައިދާ ނެގުމުގެ އެތައް މައްސަލައެކެވެ. މިއީ މިއަދު އަޅުގަނޑުމެން މި ކުޑަ ކުޑަ މުޖުތަމަޢުގެ ތެރޭގައިވެސް ކަންބޮޑުވުން ހުރި މައްސަލަތަކެވެ.
ރާއްްޖެއަށް ބަލާއިރު ކޮންމެ މަހެއްގައިވެސް މިނިސްޓްރީ އޮފް ޖެންޑަރ ފެމެލީ އެންޑް ސޯޝަލަ ސަރވިސަސްއަށް ހުށައެޅޭ އެކި ބާވަތްތަކުގެ މައްސަލަތަކުގެ ތެރެއިން ގިނައީ ކުޑަކުދިންނާ ގުޅުހުން ހުރި ތަފާތު މައްސަލަތަކެވެ. މީގެ ތެރޭގައި ކުޑަކުދިންގެ ހައްޤަށާއި ކަރާމާތަށް ގެއްލުންވާ ފަދަ އެތަކެއް މައްސަލަތަކެއް ހިމެނެއެވެ. ބައެއް އަނިޔާތަކީ އެކުދިން އެބަޔަކަށް އެންމެ ބޮޑަށް އިތުބާރުކުރާ އަމިއްލަ ޢާއިލާގެ މެންބަރުންގެ ތެރެއިން ނުވަތަ މައިންބަފައިގެން ފުށުން ލިބޭ އަނިޔާތަކެވެ. އަނެއްބައި އަނިޔާތަކީ ދުރިހިލޭ މީހުންނާއި އަވަށްޓެރިންގެ ކިބައިން ލިބޭ އަނިޔާތަކެވެ.
ކޮންމެއަކަސް މިފަދަ ބޮޑެތި އަނިޔާތަކަކީ އެކުއްޖަކު ހެދިބޮޑުވަމުން އައިސް ފުރާވަރުގެ އުމުރު ހުސްވެ ޒަވާޖީ ހަޔާތެއްފަށާއިރުވެސް އޭގެ އަސަރު ހުންނަ އަނިޔާތެކެކެވެ. މީގެ އިތުރަށް ފަހަކަށް އައިސް ރާއްޖޭގައި ހިންގާ މާރާމާރިތަކާއި މަސްތުވާތަކެތީގެ ވަބާގައިވެސް 18 އަހަރުނުވާ ކުޑަކުދިން އަންނަނީ ޝާމިލުވަމުންނެވެ. އެހެން އިބާރާތަކުން ދަންނަާނަމަ ކުށުގެ ވެށްޓަށް ހުށައެޅޭ ކުދިންގެ ޢަދަދު ގިނަވާން ފަށައިފިއެވެ.
ކުޑަކުދިންނާ ގުޅޭ މިބާވަތުގެ މައްސަލަތަކަކީ ދައުލަތުގެ މުއައްސަސާތަކުން ވަރަށް ސީރިއަސް ގޮތެއްގައި ބަލަންޖެހޭ މައްސަލަތަކެކެވެ. ނަމަވެސް ހިތާމައަކީ މިފަދަ މައްސަލަތައް ބެލިނަމަވެސް މި މުޖުތަމަޢުގެ ތެރެއިން އަދިވެސް މިފަދަ މައްސަލަތައް ފެންމަތިވާކަމެވެ. ކަމާ ބެހޭ ފަރާތްތަކާއެކު މުޅިމުޖުތަމަޢުން މިފަދަ ކަންކަން ހުއްޓުވުމަށް މަސައްކަތް ކުރަން ޖެހެއެވެ.
ކުޑަކުދިންގެ ޙައްޤުތައް ރައްކާތެރިކޮށް، ކުޑަކުދިންނަށް މުޖުތަމަޢުގައި ޚާއްޞަ އުޞޫލަކުން ޢަމަލުކުރުމަށް ދިވެހިރާއްޖޭގެ ޤާނޫނު އަސާސީން ލާޒިމުކުރެއެވެ. މިގޮތުން ކުޑަކުދިންގެ ޙައްޤުތަކާބެހޭ ޤާނޫނެއް ފާސްކޮށް، އެއަށް ރާއްޖޭގައި އަންނަނީ ޢަމަލުކުރަމުންނެވެ. ދަރިން ހެޔޮގޮތުގައި ތަރުބިއްޔަތު ކުރުމަށާއި، ސިއްޙަތު ރަނގަޅު ބައެއްގެ ގޮތުގައި ބެލެހެއްޓުމަކީ މައިންބަފައިންނާއި، ދިވެހި ސަރުކާރުގެ މައްޗަށް މިޤާނޫނު ލާޒިމުކުރާކަމެކެވެ.
ތަޢުލީމީގޮތުން ބަލާއިރު، ކުޑަކުދިން ސްކޫލަށް ފޮނުވައި ތަޢުލީމު އުނގަންނައިދިނުމަކީ މައިންބަފައިން ނުވަތަ ބެލެނިވެރިންނަށް ލާޒިކުރާކަމެކެވެ. ސަރުކާރުގެ އެއްވެސް ކުއްޖަކު ބާކީ ނުކުރުމުގެ ސިޔާސަތުގެ ދަށުން މުޖުތަމުއުގެ ހުރިހާ ކުޑަކުދިންނަށް ތަޢުލީމަށް ވާޞިލުވުމުގެ ފުރުޞަތުވަނީ ހުޅުވާލާފައެވެ. އަދި ތަޢުލީގެ ޤަނޫނުގެ ދަށުންވެސް ސްކޫލްއަށް ނުފޮނުވާ ކުއްޖާވެސް ސްކޫލްއަށް ފޮނުވުމުގެ ބާރު މި ޤާނޫނުން ލިއްބައިދެއެވެ.
ޤައުމުގެ މުސްތަޤުބަލު ބިނާކޮށް، ދިވެހިރާއްޖެ، ދިވެހިވަންތަ އުޞޫލުތަކުގެ މަތީގައި އަންނަން އޮތް ޖީލުތަކަށް ވާސިލްކޮށްދިނުމަށް އަދުގެ ބޮޑެތިވަމުން އަންނަ ދަރިން ރަނގަޅު ގޮތުގައި ތަރުބިއްޔަތުކޮށް، ޤައުމިއްޔަތުގެ ލޯބި އެކުދިންގެ ހިތްތަކުގައި އަށަގެންނުވުމަކީ ނުހަނު ބޭނުންތެރިކަމެކެވެ. އަދި މުޖުތަމަޢުން އެކުދިންނަށް ލިބޭ އަނިޔާތަކުން ސަލާމަތްކޮށް އަނިޔާގެ ޝިކާރައަކަށްވާ ކޮންމެ ކުއްޖަކަށްވެސް އިންސާފު ހޯދުމަށް މަސައްކަތް ކުރަންޖެހެއެވެ.