ދިވެހި ރައްޔިތެއްކަން އަންގައިދޭ ކާޑުގެ ޑިޒައިނަށް ބަދަލުގެނެސް އައު ޑިޒައިނެއް ފަރުމާ ކޮށްދޭނެ މީހަކު ހޯދަން ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް)އިން އަލުން ހުޅުވާލައިފިއެވެ.
މިހާރު ބޭނުންކުރާ އައިޑީ ކާޑަކީ 1980 އަހަރު ބޭނުންކުރަންފެށި އައިޑީ ކާޑެކެވެ.
މިހާރު ބޭނުންކުރާ ދިވެހި ރައްޔިތެއްކަން އަންގައިދޭ ކާޑުގެ ޑިޒައިނަށް ބަދަލުގެނެސް، ސަލާމަތީގޮތުން ފުރިހަމަ އިތުބާރާ ޔަޤީންކަން އޮންނަ ޒަމާނީ ސެކިއުރިޓީ ފީޗާރސްތަކާއިއެކު ސްމާޓް އައި.ޑީ ކާޑެއް ތަޢާރަފުކުރުމަށް ޑީއެންއާރް އިން ވަނީ ނިންމާފައެވެ. އެ ފީޗާތަކާއެކު އައިޑީކާޑު ފަރުމާކުރަން ބޭނުންވާ ފަރާތްތަކުން ޕްރޮޕޯސަލް ހުށައެޅުމަށް އެންމެ ފުރަތަމަ ހުޅުވާލީ މިއަހަރުގެ ޖޫން ނަމަހުގައެވެ. ނަމަވެސް އެކަށީގެންވާވަރަށް ޕްރޮޕޯސަލް ނުލިބުމުގެ ސަބަބުން އަނެއްކާވެސް ވަނީ ޕްރޮޕޯސަލް ހުށައެޅުމަށް ހުޅުވާލާފައެވެ. މި ފުރުޞަތު މިހާރު ހުޅުވާލާފައިވަނީ އަންނަމަހުގެ 1 ވަނަ ދުވަހާއި ހަމައަށެވެ.
އައި.ޑީ ކާޑު ފަރުމާކުރާނެ ފަރާތެއް ހޮވަނީ އެފަރާތުގެ ފަންނީ ޤާބިލުކަމާއި، ހުށަހަޅާ ކޮންސެޕްޓްގެ ފުރިހަމަކަމަށް ބެލުމަށްފަހުގައެވެ. އައިޑީކާޑު އެންމެ ފުރިހަމައަށް ފަރުމާކުރާ މީހަކަށް ދެލައްކަ ރުފިޔާގެ ފައިސާގެ އިނާމެއް ދިނުމަށްވެސް ޑީއެންއާރުން ވަނީ ނިންމާފައެވެ. ޑީއެންއާރްއިން ވިދާޅުވީ، އައިޑީ ކާޑު ފަރުމާކުރުމަށް ޝޯޓްލިސްޓްވާ ތިން ފަރާތަށް އަގުވަޒަންކުރުމުގެ ރަސްމީ ލިޔުމެއް ލިބޭނެކަމަށެވެ. އަދި ހުށަހަޅާފައިވާ އައިޑީ ކާޑުގެ ކުރެހުންތައް އާންމުކޮށް ހުޅުވާލާ މައުރަޒެއްގައި ދައްކާ، އެ ކުރެހުންތައް ރަސްމީކޮށް އާންމު ކުރެވޭނެ ކަމަށް ވެސް ޑީއެންއާރުން ވިދާޅުވިއެވެ.
އައީޑކާޑުގެ ކޮންސެޕްޓްގައި ހިމެނޭ ބައެއް ކަންކަމުގެ ތެރޭގައި އައި.ޑީ ކާޑު އަދި ހޮލޮގްރާމް ބޭނުން ސައިޒަކަށް ކުރެހިނަމަވެސް ކާޑުގެ ސައިޒަކީ ފުޅާ މިނުގައި 54 މިލިމީޓަރު އަދި ދިގު މިނުގައި 85 މިލިމީޓަރެވެ. އަދި ކުރެހުންތައް ހުންނަންވާނީ އިސްލާމީ އުޞޫލުތަކާއި ރާއްޖޭގެ ޤާނޫނުތަކާއި ޢާއްމުކޮށް ދިވެހިން ޤަބޫލުކުރާ އިޖްތިމާޢީ މިންގަނޑުތަކާއި ޚިލާފުނުވާ ގޮތަށެވެ. މީގެ އިތުރަށް، ކުރެހުމުގައި ދިރިހުރި ނުވަތަ މަރުވެފައިވާ މީހެއްގެ ސޫރަ ހިމަނައިގެން ނުވާނެކަމަށް ޑީއެންރުން ވިދާޅުވިއެވެ.
އެންމެ މޮޅު ކޮންސެޕްޓެއް ހުށަހަޅާފައިވާ ފަރާތެއް ހޮވާނީ ޑީއެންއާރުން މިކަމަށް އެކުލަވާލާފައިވާ ލަފާދޭ ކޮމިޓީއިންނެވެ. އެގޮތުން ހުށަހަޅާ ޕޯޓްފޯލިއޯއަށް ބިނާކޮށް، އެފަރާތުގެ ފަންނީ ޤާބިލުކަމާއި ކޮށްފައިވާ މަސައްކަތްތަކުގެ ފެންވަރުގެ އިތުރުން، ހުށަހަޅާފައިވާ ކޮންސެޕްޓްގެ ފެންވަރާއި ފުރިހަމަކަމަށް ބަލާނެކަމަށް އެ ޑިޕާޓުމަންޓުން ވިދާޅުވިއެވެ. އޭގެ އިތުރުން، ކޮންސެޕްޓް ބިނާކޮށްފައިވާ ފިކުރުގެ އަމިއްލަވަންތަކަމާއި ފުރިހަމަކަމާއި، ކޮންސެޕްޓުން ދިވެހިންނާއި ދިވެހިރާއްޖެ ރަމްޒުކޮށްދީފައިވާ މިންވަރަށްވެސް ބަލާނެއެވެ.
ދިވެހި ރައްޔިތެއްކަން އަންގައިދޭ ކާޑު ގެ ޑިޒައިނަށް ބަދަލުގެނައުމަށް ނިންމާފައިވާއިރު ސަރުކާރުން ވަނީ ރާއްޖޭގައި ޑިޖިޓަލް އައިޑީކާޑު ބޭނުންކުރަންވެސް ނިންމާފައެވެ. ޑިޖިޓަލް އައިޑެންޓިޓީ ޕްރޮޖެކްޓްގެ ތެރެއިން ޙާޞިލުވާނެ ކަންކަމުގެ ތެރޭގައި ޑިޖިޓަލް އައިޑެންޓިޓީ ޕްލެޓްފޯމެއް ޤާއިމުކުރުމާއި ސްމާޓް ފޯނުތަކުގައި ބޭނުންކުރެވޭ ޑިޖިޓަލް އައިޑެންޓިޓީ އެޕްލިކޭޝަނެއް ތަޢާރަފުވުމާއި ބަޔޯ މެޓްރިކް އައިޑެންޓިޓީގެ ނިޒާމެއް ޤާއިމުކުރުމާއި، ކޮންޓެކްޓްލަސް ސްމާޓް އައިޑެންޓިޓީ ކާޑެއް ތަޢާރަފުކުރުން ހިމެނެއެވެ.