ދިވެހިރާއްޖޭގެ ޤައުމީ ދާރުލްއާސާރަށް 70 އަހަރު ފުރުމުގެ މުނާސަބަތުގައި، ދާރުލްއާސާރަށް މާދަމާ ހިލޭ ވަދެވޭގޮތަށް ހަމަޖައްސައިފިއެވެ.
ޤައުމީ ދާރުލްއާސާރު އާއްމުކޮށް އެންމެނަށް ހިލޭ ވަނުމަށް ހުޅުވާލަނީ، ހޮނިހިރު ދުވަހުގެ ހެނދުނު، 10:00 އިން އެދުވަހުގެ އިރުއޮއްސި 18:00 ހަމައަށެވެ.
ޤައުމީ ދާރުލްއާސާރަށް ވަނުމުގެ ފުރުޞަތު އާއްމުކޮށް އޮންނަނީ ޚާއްސަ ޓިކެޓެއް ގަނެގެންނެވެ. އެގޮތުން ކިޔަވާ ކުދިންނަށާއި، އާއްމުންނަށާއި، ބިދޭސީންނަށް ޓިކެޓް ވިއްކާ ރޭޓުތައް ތަފާތެވެ. ދިވެހި ކިޔަވާ ކުދިންނަށް ޓިކެޓް ވިއްކަނީ 15 ރުފިޔާ އަދި ބިދޭސީ ކިޔަވާ ކުދިންނަށް 31 ރުފިޔާއަށެވެ. ކުޑަކުދިންނަށް 20 ރުފިޔާ އަދި ބޮޑެތި މީހުންނަށް 25 ރުފިޔާއަށް ޓިކެޓެއް ލިބޭނެއެވެ. އަދި ބިދޭސީންގެ ތެރެއިން ކުޑަކުދިންނަށް 78 ރުފިޔާ އަދި ބޮޑެތި މީހުންނަށް ޓިކެޓް ވިއްކަނީ 155 ރުފިޔާއަށެވެ.
2022 ނޮވެންބަރު 26 ގައި ގައުމީ ދާރުލްއާސާރަށް ހިލޭ ވަނުމުގެ ފުރުޞަތު
— Maldives National Museum (@NatMuseumMV) November 23, 2022
ހެނދުނު 10:00 ން ހަވީރު 6:00 އަށް
ޒިޔާރަތްކޮށްލައްވާ! pic.twitter.com/Y2Qp4QO8hm
ޤައުމީ ދާރުލްއާސާރަށް 70 އަހަރު ފުރިފައި ވަނީ މި ނޮވެމްބަރު މަހުގެ 19 ވަނަ ދުވަހުގައެވެ. ދިވެހިރާއްޖޭގައި ފުރަތަމަ ޤައުމީ ދާރުލްއާސާރެއް ހުޅުވާފައިވަނީ 1952 ވަނަ އަހަރުގެ ނޮވެންބަރު މަހުއެވެ. މިހާރު ބޭނުންކުރަމުންދާ ޤައުމީ ދާރުލްއާސާރަކީ 2008 ވަނަ އަހަރު ބިންގާ އަޅާ، 2010 ވަނަ އަހަރުގެ ޖުލައި މަހުގެ 26 ވަނަ ދުވަހު ހުޅުވާ ބޭނުން ކުރަން ފެށި ދާރުލްއާސާރެވެ. ދާރުލްއާސާރު މިހާރު ހިންގަމުން އަންނަ އިމާރާތަކީ ޗައިނާ ސަރުކާރުގެ އެހީގައި އަޅާފައިވާ ތަނެކެވެ.
ދިވެހިރާއްޖޭގެ ޤައުމީ ދާރުލްއާސާރަކީ ދިވެހިރާއްޖޭގެ ތާރީޚާއި ތަރިކައާއި ސަޤާފަތާއި ބެހޭ ހުރިހާ މަޢުލޫމާތެއް އެއް ފުރާޅެއްގެ ދަށުން ލިބޭނެ ފުރުޞަތު ފަހިކޮށްދީފައިވާ ތަނެކެވެ. އެންމެ އެވޭލާ ޒަމާނުގެ ތާރީޚުން ފެށިގެން، ރާއްޖެއަށް އަންނަމުންދިޔަ ބަދަލުތަކާއި، ތަރައްޤީގެ މަރުޙަލާތަކާއި، ރަސްރަސްކަލުންގެ ރަސްކަމުގެ ދައުރުތަކާއި، ރާއްޖޭގައި ފާހަގަކޮށްފައިވާ ޚާއްސަ ކަންތައްތަކުގެ މަޢުލޫމާތުވެސް ދާރުލްއާސާރުގައި ރައްކާކޮށްފައިވެއެވެ. އަދި އެކި ދުވަސްވަރު ދިވެހިންގެ ދިރިއުޅުން ދައްކުވައިދިން ވަރަށް ގިނަ ތަކެތި ފެންނަންހުރީ މި ދާރުލްއާސާރުގައެވެ. މީގެތެރޭގައި ދިވެހިންގެ ސަޤާފަތާއި ތަރިކަ އަދި ފަންނުވެރިކަން ދައްކުވަދޭ ތަކެތި ހިމެނެއެވެ.
ދާރުލްއާސާރުގައި ހިމެނޭ ބައެއް ކަލެކްޝަންތަކަށް ބަލާލާއިރު، އިސްލާމްދީނުގެ އަލިކަން އައުމުގެ ކުރިޔަށް ނިސްބަތްވާ އާސާރުތަކާއި، އިސްލާމްދީނުގެ އަލިކަން އައުމުގެ ފަހަށް ނިސްބަތްވާ އާސާރުތަކާއި، ކުރީގެ ރަހުންނާއި ރަނިންގެ ގަނޑުވަރު ތަޅާލުމާއި ގުޅިގެން ގެނެވިފައި ހުރި ބައެއް އާސާރުތައް ހިމެނެއެވެ. އަދި އެކި ދުވަސްވަރުގެ މަތިން ބޭނުންކޮށްފައިވާ ފައިސާ އާއި ނޫޓާއި، އަކުރުތަކުގެ ކަލެކްޝަނާއި، ޤުރުއާނުގެ ކަލެކްޝަނާއި، ލިޔެލާޖެހި އާސާރުތަކާއި، ކަނޑުދަތުރުފަތުރު ކުރަން ބޭނުން ކުރެވުނު އޮޑިދޯނިފަހަރުތަކުގެ ކަލެކްޝަން ހިމެނެއެވެ. ހަމައެހެންމެ ދިވެހި ފުލުހުންގެ ޚިދުމަތުގެ ޚާއްސަ މިއުޒިއަމެއްވެސް މިތަނުގައި ހުރެއެވެ.