ޑިޕާޓްމަންޓް އޮފް ނޭޝެނަލް ރަޖިސްޓްރޭޝަން، ޑީ.އެން.އާރުގެ ޑިރެކްޓަރ ޖެނެރަލްގެ މަޤާމަށް ކުރިމަތިލުމަށް ސިވިލް ސަރވިސް ކޮމިޝަނުން ހުޅުވާލައިފިއެވެ.
ޑީ.އެން.އާރުގެ ޑިރެކްޓަރ ޖެނެރަލުގެ މަޤާމުގެ މުސާރައިގެ ގޮތުގައި ސަރވިސް އެލެވެންސާއި، ސަޕޯޓިންގ ކޯ އެލަވެންސް ހިމެނޭހެން 17،390 ރުފިޔާ ލިބޭނެއެވެ. އަދި ސިވިލް ސަރވިސްގެ މުވައްޒަފުންނަށް ހަމަޖެހިފައިވާ އުޞޫލުން ބޭސްފަރުވާގެ ޚިދުމަތާއި، ރާއްޖޭގެ ޕެންޝަނާބެހޭ ޤާނޫނުގެ ދަށުން ލިބޭ ޕެންޝަން ކޮންޓްރިބިއުޝް އަދި ސިވިލް ސަރވިސްގެ މުވައްޒަފުންނަށް ހަމަޖެހިފައިވާ އުޞޫލުން އިތުރުގަޑީގެ ފައިސާ ލިބޭނެއެވެ.
މި މަޤާމުގެ މައިގަނޑު މަސްއޫލިއްޔަތުތަކާ ވާޖިބުތަކުގެ ތެރޭގައި ޑީ.އެން.އާރުގެ އެންމެހާ ކަންތައްތައް ޤާނޫނާއި ޤަވާއިދާއި އެއްގޮތަށް ބެލެހެއްޓުމާއި، އެ ޑިޕާޓްމަންޓުގެ މެންޑޭޓާއި ގުޅިގެން ތައްޔާރުކުރުމަށް ބޭނުންވާ ސްޓްރެޓެޖިކް ޕްލޭން އެކުވަލާ އެކްޝަން ޕްލޭން ހެދުމަށް ބޭނުންވާ ފަންނީ ލަފާ ފޯރުކޮށްދިނުން ހިމެނެއެވެ. އަދި ދިވެހި ރައްޔިތުންގެ ކަޑު ހެއްދުމުގެ ނިޒާމު ހަރުދަނާކުރުމަށް ކުރަންޖެހޭ މަސައްކަތްތަކާ، މިދާއިރާގައި މަސައްކަތްކުރާ މީހުންނަށް ބޭނުންވާ ހުނަރުތައް ފާހަގަކޮށް ކަމާބެހޭ ވުޒާރާތަކާ ގުޅިގެން މިކަންކަން ހަރުދަނާކުރުމަށް މަސައްކަތް ކުރުންވެސް ހިމެނެއެވެ.
މި މަޤާމަށް ކުރިމަތިލާ ފަރާތްތަކުގެ ހުންނަންޖެހޭ ޝަރުތުތަކުގެ ތެރޭގައި މަޤާމުގެ މަސައްކަތާ ގުޅޭ ތަޢުލީމީ ރޮނގަކުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 7 ނުވަތަ 8 ގެ ސަނަދެއް ހާޞިލުކޮށްފައިވުމާއި، މަޤާމުގެ މަސައްކަތްތަކުގެ ދާއިރާއެއްގައި މަދުވެގެން 8 އަހަރު ދުވަހުގެ ތަޖުރިބާ ލިބިފައިވުން ހިމެނެއެވެ. ނުވަތަ މަޤާމުގެ މަސައްކަތާ ގުޅޭ ތަޢުލީމީ ރޮނގަކުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 9 އިން ފެށިގެން މަތީ ސަނަދެއް ހާޞިލުކޮށްފައިވުމާއި، މަޤާމުގެ މަސައްކަތްތަކުގެ ދާއިރާއެއްގައި މަދުވެގެން 6 އަހަރު ދުވަހުގެ ތަޖުރިބާ ލިބިފައިވުން ހިމެނެއެވެ.
ޑީ.އެން.އާރުގެ ޑިރެކްޓަރ ޖެނެރަލްގެ މަޤާމަށް ޝަޢުގުވެރިވާ ފަރާތްތަކުން އެ މަޤާމަށް ކުރިމަތިލުމަށް ސިވިލް ސަރވިސް ކޮމިޝަނުން ހުޅުވާލާފައިވަނީ އަންނަ ޑިސެމްބަރުމަހުގެ އެކެއްވާ ބުރާސްފަތި ދުވަހުގެ މެންދުރު 2 ޖެހުމާއި ހަމައަށެވެ. އަދި މި މަޤާމަށް މީހަކު ހޮވުމަށް ބާއްވާ އިންޓަރވިއުއާއި، ޕްރެޒެންޓޭޝަން އަދި އިމްތިޙާނު އަންނަމަހުގެ 6 އާއި 29 އާއ ދެމެދު ކުރިއަށްދާނެކަމަށް ސިވިލް ސަރވިސް ކޮމިޝަނުން ވިދާޅުވެއެވެ.