ރޮބޮޓިކް ލެބެއް ހިމެނޭހެން ހުޅުމާލޭގައި އަމިއްލަ ސްކޫލެއް އެޅުމަށް ނިންމާ އެކަމުގެ އެއްބަސްވުމުގައި ސޮއިކޮށްފިއެވެ. ގްރޭޑް 1 އިން 12 އާއި ހަމައަށް ކިޔަވައިދޭ މި ސްކޫލު އެޅުމަށް ހައުސިންގ ޑިވެލޮޕްމަންޓް ކޯރޕަރޭޝަނުން ޙަވާލުކޮށްފައިވަނީ ވިލާ އެޑިއުކޭޝަނަލް ސަރވިސަސް ޕްރައިވެޓް ލިމިޑެޓާއެވެ.
އެޗް.ޑީ.ސީގައި ބޭއްވި ޚާއްސަ ރަސްމިއްޔާތެއްގައި މިކަމުގެ އެއްބަސްވުމުގައި އެޗް.ޑީ.ސީގެ ފަރާތުން ސޮއިކުރެއްވީ، މެނޭޖިންގ ޑިރެކްޓަރ އަޙްމަދު އާތިފެވެ. އަދި ވިލާ އެޑިއުކޭޝަންގެ ފަރާތުން ސޮއިކުރެއްވީ ވިލާ ކޮލެޖުގެ ރެކްޓަރ އަޙްމަދު އަންވަރެވެ.
ވިލާ އެޑިއުކޭޝަންގެ ފަރާތުން ހުޅުމާލެގައި ބިނާކުރުމަށް ހަމަޖެހިފައިވާ މި ސުކޫލު ހުންނާނީ ހުޅުމާލެ ފޭސް 1 ގައެވެ. މިއީ 6 ފަންގިފިލާގެ ސްކޫލެކެވެ. މި ސްކޫލުގައި 20 ކްލާސްރޫމު ހުންނާނެކަމަށާއި، މިއީ ގާތްގަނޑަކަށް 761 ކުދިންގެ ޖާގައިގެ ސްކޫލެއް ކަމަށް އެޗް.ޑީ.ސީން ވިދާޅުވެއެވެ.
ގްރޭޑް 1 އިން 12 އާއި ހަމައަށް ކިޔަވައިދޭ މި ސްކޫލުގައި ޚާއްސަ އެހީއަށް ބޭނުންވާ ކުދިންނަށްވެސް ފަސޭހައިން ކިޔަވައިދޭނެ އިންތިޒާމް ހަމަޖެހިފައި ހުންނާނެކަމަށް އެޗް.ޑީ.ސީން ވިދާޅުވެއެވެ. އަދި ސްކޫލުގެ އެންމެ ޚާއްސަ އެއްކަމެއްގެ ގޮތުގައި ރޮބޮޓިކް ލެބެއްވެސް މި ސުކޫލުގައި ޤާއިމްކުރެވިފައި ހުންނާނެކަމަށް އެ ކޯރޕަރޭޝަނުން ވިދާޅުވެއެވެ.
ވިލާ އެޑިއުކޭޝަންގެ ފަރާތުން ހުޅުމާލޭގައި ތަރައްޤީކުރާ ސްކޫލާއެކު ވަޒީފާގެ އިތުރު ފުރުޞަތުތަކެއްވެސް ފަހިވެގެންދާނެކަމަށް އެޗް.ޑީ.ސީން ވިދާޅުވެއެވެ. އެގޮތުން އެޑްމިނިސްޓްރޭޓިވް ދާއިރާއިންނާއި، އެކެޑެމިކް ދާއިރާއިން 100 ވަރަކަށް ވަޒީފާގެ ފުރުޞަތު ލިބިގެންދާނެކަން އެޗް.ޑީ.ސީން ފާހަގަކުރެއެވެ.
އެޗް.ޑީ.ސީން އަންނަނީ ހުޅުމާލޭގައި ފެންވަރު ރަނގަޅު ތަޢުލީމީ ޖީލެއް ބިނާކުރެވޭނެ ފަދަ ގިނަ ވަޞީލަތްތަކެއް ޤާއިމުކުރުމުގެ މަސައްކަތް ކުރަމުންނެވެ. އެގޮތުން ހުޅުމާލޭ ދެވަނަ ފިޔަވަހީގައި ސަރުކާރުން ތަރައްޤީކުރާ 4 ސްކޫލާކާއި، އަމިއްލަ ފަރާތަކުން ތަރައްޤީކުރާ ސްކޫލެއް އެޅުމަށް ބޭނުންވާ ބިން މިމަހުގެ ތެރޭގައި އެޗް.ޑީ.ސީން ވަނީ ޙަވާލުކޮށްފައެވެ. ހުޅުމާލޭގައި ތަޢުލީމީ ކަންކަން ކުރިއެރުވުމަށް އެޗް.ޑީ.ސީން ކުރާ މަސައްކަތުގައި ސަރުކާރާއި އަމިއްލަ ކުންފުނިތަކުން ދެމުންދާ އެއްބާރުލުން އެކޯރޕަރޭޝަނުން ފާހަގަކުރެއެވެ.