ސަމަރުބްލޫ އިބްރާހީމް މަނިކު އަވަހާރަވެއްޖެ

ދިވެހި ސަރުކާރަށާއި، ދިވެހިރާއްޖޭގެ ބްރޯޑްކާސްޓިންގ ދާއިރާއަށް ދިގު މުއްދަތަކަށް، އަގުހުރި ޚިދުމަތްކޮށްދެއްވާފައިވާ ސަމަރުބްލޫ އިބްރާހީމް މަނިކު އަވަހާރަވެއްޖެއެވެ.

ސަމަރުބްލޫ އިބްރާހީމް މަނިކު އަވަހާރަވީ ވަރަށް ގިނަ ދުވަހު އާލާސްކަންފުޅާ އުޅުއްވުމަށްފަހު އިންޑިއާގައި ފަރުވާ ހޯދަމުން ދަނިކޮށް މިއަދު ހެނދުނެވެ. އެމަނިކުފާނު އަވަހާރަވިއިރު އުމުރުފުޅަކީ 72 އަހަރެވެ.

ސަމަރުބްލޫ އިބްރާހިމް މަނިކު ވަނީ 1974 އިން ފެށިގެން 2006 އާ ހަމައަށް ދިވެހިރާއްޖޭގެ ބްރޯޑްކާސްޓިންގ ދާއިރާގައި ވަރަށް އަގުނުކުރެވޭ ފަދަ ޚިދުމަތްތަކެއް ކޮށްދެއްވާފައެވެ. އަދި އެ ދާއިރާއަށް ގިނަ ބަޔަކު ނެރެދެއްވާފައެވެ.

އިބްރާހިމް މަނިކު ބްރޯޑްކާސްޓިން ޚިދުމަތާއި ގުޅިވަޑައިގެންނެވީ ކުރީގެ ރައީސް އިބްރާހިމް ނާސިރުގެ ވެރިކަމުގައި 1974 ވަނަ އަހަރުއެވެ. ދިވެހި ރާއްޖޭގެ އަޑަކީ މުޅި ރާއްޖޭގެ އެންމެހައި ކަންކޮޅުތަކަށް ވަގުތުން ވަގުތަށް ޚިދުމަތް ލިބެންފެށި ހަމައެކަނި މީޑިއާއެވެ.

ރާއްޖޭގެ އެންމެ ދުވަސްވީ ރޭޑިއޯ ދިވެހި ރާއްޖޭގެ އަޑާއި އިބްރާހިމް މަނިކު ގުޅިވަޑައިގެންނެވީ އިނގިރޭސި ސެކެޓްރީއެއްގެ ގޮތުގައެވެ. އެއަށްފަހު އެމަނިކުފާނުވަނީ ދިވެހި ރާއްޖޭގެ އަޑުން އުފެއްދި ދިވެހިންގެ މަޤުބޫލުކަން ހޯދި އެތައް ޕްރޮގުރާމެއް އުފައްދައި ހުށަޅައި ދެއްވާފައެވެ.

އެމަނިކުފާނުގެ މަޤުބޫލުކަން ލިބިގެންދިޔަ ޕްރޮގުރާމުތަކުގެ ތެރޭގައި "ބާއްޖަވެރި ހެނދުނެއް" ޕްރޮގުރާމާއި، ކުޑަކުދިންނަށް ޚާއްސަކޮސްގެން ރޯދަމަހު ގެނެސްދިން ރޯދަ ކުރުރުން ޕްރޮގުރާމާއި، "ނެގި ގާގަނޑެއް" ޑްރާމާ ހިމެނެއެވެ. މި ޕްރޮގުރާމުތައް އުފައްދައި ހުށަހަޅުއްވަމުން ގެންދެވިއިރު ސީދާ އިބްރާހިމް މަނިކުގެ ބެއްލެވުމުގެ ދަށުންވެސް އަޑުގެ ހިންގުމަށާއި ތަރައްޤީއަށް ގިނަ މަސައްކަތްތަކެއް ވަނީ ކުރައްވާފައެވެ.

އިބްރާހިމް މަނިކަކީ ރޭޑިއޯގެ ޚިދުމަތުގައި އުޅުއްވަމުން ޤައުމީ އެކި ކަންކަމުގައިވެސް ބައިވެރިވެވަޑައިގެން މަސައްކަތް ކުރެއްވި ޚިދުމަތްތެރިއެވެ. އެކިއެކި މުނާސަބަތުތަކާއި ގުޅިގެން ޤައުމީ ލަވަ ހެއްދެވުމާއި، ޤައުމީ އެކި މުނާސަބަތާއި ގުޅޭ ޕްރޮގުރާމު އުފެއްދުމަކީވެސް އިބްރާހިމް މަނިކު ޚާއްސަ އިސްކަމެއް ދެއްވި މަސައްކަތްތަކެކެވެ. އިބްރާހިމް މަނިކަކީ މިޔުޒިކާއި ލަވަކިޔުން ކުރިއެރުމުގެ ރޮނގުން 1996 ވަނަ އަހަރު ޢާންމު ޚިދުމަތުގެ ހިތްވަރު ދިނުމުގެ އިނާމުވެސް ލިބަޑައިގެންފައިވާ ބޭފުޅެކެވެ.

މީގެ އިތުރުން ކުޑަކުދިން ކިޔާ ހިތްވާކަހަލަ ފޮތެއް ސަރުކާރުން ގަބޫލުކުރައްވާ ފެންވަރަކަށް ދިވެހި ބަހުން އެކުލަވާލައްވައިގެން ސަރުކާރުންދޭ އިނާމު 1999، 2000 އަދި 2001 ވަނަ އަހަރު އިބްރާހިމް މަނިކަށް ވަނީ ލިބިވަޑައިގެންފައެވެ.

އިބްރާހިމް މަނިކަކީ އަދަބީ ފަންނީ އަދި ޤައުމީ މަސައްކަތުގެ އެކި ދާއިރާތަކުން ފާހަގަކޮށްލެވޭ ޚިދުމަތްތަކެއް ކުރައްވާފައި ބޭފުޅެވެ. އެމަނިކުފާނުވަނީ 2000 ގެ އަހަރުތަކުގައި ފުޓުބޯޅަ އެސޯސިއޭޝަން އޮފް މޯލްޑިވަސް (އެފްއޭއެމް)ގެ ޗެއާރމަންކަމުގެ މަޤާމުވެސް ފުރުއްވާފައެވެ.

އިބްރާހީމް މަނިކަކީ ދިވެހިރާއްޖޭގެ ބްރޯޑުކާސްޓު ދާއިރާގެ އެންމެ ޚިދުމަތްތެރި ތަޖުރިބާކާރު އެއް ބޭފުޅާއެވެ. މި ދާއިރާއިން އެމަނިކުފާނުގެ ޚިދުމަތްތަކަށް ބަލާލާއިރު، 1980 އިން 1989 އަކާއި ހަމައަށް ދިވެހިރާއްޖޭގެ އަޑުގެ ޑެޕިއުޓީ ޑިރެކްޓަރކަމާއި ޑިރެކްޓަރކަމުގެ މަޤާމު ފުރުއްވާފައިވެއެވެ. އަދި 1989 އިން 1993 އަކާއި ހަމައަށް ޑިރެކްޓަރ ޖެނެރަލް އޮފް ބްރޯޑްކާސްޓިންގ ހައިސިއްޔަތުން ދަޢުލަތުގެ ރޭޑިއޯއާއި ޓީވީ ހިންގެވުމުގައި އިސް ދަޢުރެއް އަދާކުރައްވާފައިވެއެވެ.

އެމަނިކުފާނުގެ މޭސްތިރިކަމުގެ ދަށުން ރާއްޖެއާ ދުނިޔޭގެ ޚަބަރާ މަޢުލޫމާތާއި، ދީނީ، ޤައުމީ، ތަޢުލީމީ، ޞިއްޚީ، އިޖުތިމާއީ، ބަހަވީ، އަދަބީ، ސަޤާފީ، އަދި ކުޅިވަރާއި މުނިފޫހިފިލުވުމުގެ ރޮނގުތަކުން ދިވެހިރާއްޖޭގެއަޑުން ކޮށްފައިވާ ޤައުމީ ޚިދުމަތްތަކާއި އަދާކޮށްފައިވާ ޤައުމީ ދައުރަކީ ދިވެހި ތާރީޚުގައި ލާމަސީލު ނަމޫނާއެކެވެ.

އިބްރާހިމް މަނިކުގެ މަސައްކަތް ބްރޯޑްކާސްޓިންގ ދާއިރާއާއި ހަމައިން ނުނިމެއެވެ. އަޑުގައި މަސައްކަތް ކުރެއްވުމަށްފަހު ލިބިވަޑައިގެންނެވި ފުރުޞަތުގައި ދައުލަތުގެ އެކި ވުޒާރާތަކުގެ ވަޒީރުކަންވެސް ވަނީ ކުރައްވާފައެވެ. އިބްރާހިމް މަނިކަކީ ވަޒީރު ކަމުގައި 15 އަހަރު ސަރުކާރަށް ޚިދުމަތް ކުރައްވާފައިވާ ބޭފުޅެކެވެ. 1993 ވަނަ އަހަރުން 1996 ވަނަ އަހަރަށް މިނިސްޓަރ އޮފް އިންފޮމޭޝަން އެންޑް ކަލްޗަރގެ މަޤާމު ވަނީ ފުރުއްވާފައެވެ. އަދި 1996 ވަނަ އަހަރުން 2004 ވަނަ އަހަރާއި ހަމައަށް މިނިސްޓަރ އޮފް އިންފޮމޭޝަން، އާޓްސް އެންޑް ކަލްޗަރގެ މަޤާމުވެސް ވަނީ ފުރުއްވާފައެވެ.

އެމަނިކުފާނު ވަނީ 2004 އިން 2005 ވަނަ އަހަރުގެ ނިޔަލަށް މިނިސްޓަރ އޮފް ޔޫތު އެންޑް ސްޕޯޓްސްގެ މަޤާމުވެސް ފުރުއްވާފައެވެ. އަދި 2005 ވަނަ އަހަރުން 2008 ވަނަ އަހަރާއި ހަމައަށް ކޮމިއުނިޓީ އޯގަނަައިޒޭޝަން ޑިވެލޮޕްމަންޓް ކައުންސިލްގެ ޗެއަރމަން ކަމުގެ މަޤާމުވެސް އިބްރާހިމް މަނިކު ވަނީ ފުރުއްވާފައެވެ.

މީގެ އިތުރުން ސަމަރުބްލޫ އިބްރާހިމް މަނިކު ވަނީ 2000 ވަނަ އަހަރުން ފެށިގެން 2010 ވަނަ އަހަރާއި ހަމައަށް ރައްޔިތުންގެ މަޖިލީހުގެ ތިލަދުންމަތީ އުތުރުބުރީގެ މެންބަރުކަން 2 ދައުރު ވަންދެން ކުރައްވާފައެވެ.