މިއަހަރު ޕާކިސްތާނަށް ކުރިމަތިވި ފެންބޮޑުވުމުގެ ކާރިސާގައި ހާލުގައި ޖެހުނު އަންހެނުންނަށް އެހީތެރިކަން ފޯރުކޮށްދިނުމަށް ބްރިޖިންގ ދަ ކޮމިއުނިޓީސް މޯލްޑިވްސް (ބީސީއެމް)ގެ ފަރާތުން ޕާކިސްތާނުގެ ސަޤާފަތް ދައްކުވައިދޭ ފަންޑް ރައިޒިންގ އިވެންޓެއް ބޭއްވުމަށް ނިންމައިފިއެވެ.
މި ހަރަކަރާތް ބޭއްވުމަށް ހަމަޖެހިފައިވަނީ މިމަހުގެ 5 ވާ ހޯމަ ދުވަހުގެ ރޭ 8:45 ގައި މެންހެޓަން ބިޒްނަސް ހޮޓެލުގައެވެ. މި އިވެންޓުގެ ތެރޭގައި އިންޑިއަން ސަބްކޮންޓިނެންޓްގެ ރަހަތައް ހިމެނޭ ކެއުމެއް އިންތިޒާމްކުރުމުގެ އިތުރުން ޕާކިސްތާނުގެ ސަޤާފަތް ދައްކުވައިދޭ ތަކެތި ޝޯވކޭސްކުރުމަށް ވަނީ ހަމަޖެހިފައެވެ. އަދި މި ހަރަކާތުގެ ތެރެއިން، އުރުދޫ މިއުޒިކާއި، ލަވަތައް ހުށަހަޅައިދިނުން އޮންނާނެއެވެ. ހަމައެހެންމެ މި ހަރަކާތުގެ ތެރެއިން ޕާކިސްތާނުގެ ސަޤާފީ އެކި ކަހަލަ ހެދުންތައްވެސް ފެނިގެންދާނެއެވެ.
Join our Fundraising Dinner Night to Help the Victims of Pakistani Flood. @PakinMaldives pic.twitter.com/NXhq3tArek
— Bridging the Communities Maldives (@Bc_Maldives) November 29, 2022
"ޕާކިސްތާން ކަލްޗަރަލް ނައިޓް" އިންތިޒާމްކުރާ ބީ.ސީ.އެމުން ބުނީ މި ހަރަކާތުގައި ޕާކިސްތާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވައިސް އެޑްމިރަލް ރިޓަޔާޑް މުޙައްމަދު ފައްޔާޒް ގިލާނީއާއި، ޕާކިސްތާން ހައިކޮމިޝަންގެ ބައެއް އިސްވެރިން ބައިވެރިވެވަޑައިގަތުމަށް ހަމަޖެހިފައިވާކަމަށެވެ.
މި ހަރަކާތުގައި ބައިވެރިވުމަށް އާއްމުންނަށް ހުޅުވާލާފައިވަނީ ޓިކެޓް ގަނެގެންނެވެ. މި ޓިކެޓް ވިއްކުމަށް ބީސީއެމްއިން ނިންމާފައިވަނީ 350 ރުފިޔާއަށެވެ. މި ހަރަކާތުން އެއްކުރެވޭ ފައިސާ ހަދިޔާކުރުމަށް ހަމަޖެހިފައިވަނީ ޕާކިސްތާނުގައި ހާލުގައި ޖެހިފައިވާ އަންހެނުންނަށް ބޭނުންވާ ބޭހާއި، ކާބޯތަކެތި ފޯރުކޮށްދިނުމަށްކަމަށް ބީ.ސީ.އެމުން ބުނެއެވެ.
ޕާކިސްތާނުގެ ރައްޔިތުންނަށް އެހީވުމަށް ބީ.ސީ.އެމުން ޚާއްސަ ހަރަކާތެއް ހިންގުމަށް ތައްޔާރުވަމުންދާއިރު، ޕާކިސްތާނަށް އެހީތެރިވުމުގެގޮތުން ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަނުން އިސްނަގައިގެން ޕަބްލިކް ސަރވިސް މީޑިއާއާއި ރާއްޖޭގެ ބައެއް މީޑިއާތައް ގުޅިގެން މިދިޔަ އޮކްޓޫބަރުމަހުގެ 2 ވަނަ ދުވަހު ވަނީ ޚާއްސަ ޓެލެތޯން އެއް ކުރިއަށް ގެންގޮސްފައެވެ. މި ޓެލެތޯނަށް އެހީގެ ގޮތުގައި 3.8 މިލިއަން ރުފިޔާ ނުވަތަ 54 މިލިއަން ޕާކިސްތާން ރުޕީސް ލިބިފައިވެއެވެ.