ލައިބީރިއާގެ ދިދައިގަައި ހުރްމުޒް ކަނޑުއޮޅިން ދަތުރުކުރަމުން ދިޔަ ތިން ތެޔޮ ޓޭންކަރަކަށް ހަމަލާތަކެއް އަމާޒުވެއްޖެއެވެ.
ސެޕްޓެމްބަރު މަހުގެ 29ވަނަ ދުވަހު ދިން ކަމަށް ރިޕޯޓުކޮށްފައިވާ މި ހަމަލާ އުޅަނދުތަކަށް ދިން އިރު، އެ ތެޔޮ ޓޭންކަރުތައް ދަތުރުކުރަމުން ދިޔައީ ހަަމަލާއަކަށް ހުށިޔާރުވެ ތިބުމުގެ ގޮތުން އޮޓޮމެޓިކް އައިޑެންޓިފިކޭޝަން ސިސްޓަމް (އޭއައިއެސް) ޓްރާންސްޕޮންޑަރު ނިއްވާލައިގެންނެވެ. ހަމަލާ އަމާޒުވެފައި ވަނީ އަލް ރުވައިސްއާއި މަރސިން ޕްރޮސްޕެރިޓީއާއި ސިންބާދު ކިޔާ އުޅަނދުތަކަކަށެވެ. އެ އުޅަނދުތަކަށް ހަމަލާ ދީފައި ވަނީ ކޮން ބައެއް ކަމެއް މިހާތަނަށް އެނގިފައެއް ނުވެއެވެ.
އަލް ރުވައިސްއާ ގުޅޭ ގޮތުން ލިބެން ހުރި އެންމެ ފަހުގެ މަޢުލޫމާތުން ދައްކާ ގޮތުގައި ސެޕްޓެމްބަރު މަހުގެ ފަހުކޮޅު އެ އުޅަނދު ވަނީ އޮމާންގެ ސޮހަރްގެ ބޭރުން ބޯޓުން ބޯޓަށް ޑީސެލް ތެެޔޮ ބަދަލުކޮށްފައެވެ. މަރސިން ޕްރޮސްޕަރިޓީއިން ވެސް ސެޕްޓެމްބަރު މަހުގެ މެދުތެރޭގައި ދެ މިލިޔަން ފީފާގެ ތެޔޮ ހަމަ އެ ސަރަޙައްދުގައި ބަދަލުކޮށްފައިވެއެވެ. ސެޕްޓެމްބަރު މަހުގެ ކުރީކޮޅު ސިންބާދަށް ވަނީ ސަޢުދީ ޢަރަބިއްޔާގެ ޖުބައިލް ސިނާޢީ ޕޯޓުން ތެލުގެ ބައެއް އުފެއްދުންތައް ބަރުކޮށްފައެވެ.
ހަމަލާއާ ގުޅޭގޮތުން މަރސިން ޕްރޮސްޕަރިޓީއާއި އަލް ރުވައިސްގެ އޭޖެންޓު، އެޑްނޮކް ލޮޖިސްޓިކްސް އެންޑް ސާވިސަސްއިން އެއްޗެއް ބުނުމަށް ވަނީ ދެކޮޅުހަދައިފައެވެ. ސިންބާދުގެ އޭޖެންޓު، އެންގްލޯ-އީސްޓަން ޓޭންކަރ މެނޭޖްމަންޓުން މިހާތަނަށް އެއްޗެއް ބުނެފައެއް ނުވެއެވެ.
ހުރްމުޒް ކަނޑުއޮޅިއަކީ ދުނިޔެއަށް ބޭނުންވާ ތެލުގެ ފަސްބައި ކުޅަ އެއްބައި އުފުލުމަށް ބޭނުންކުރާ މައި މަގެކެވެ. މި އަހަރުގެ ފެބްރުއަރީ މަހުގެ 28ވަނަ ދުވަހު އެެމެރިކާއިން އިސްވެ އީރާނަށް ހަމަލާ ދިނުމުން ފެށުނު މެދުއިރުމަތީގެ ހަނގުރާމައިގައި އީރާނުން ދަނީ އެ ކަނޑުއޮޅި ބޭނުން ކުރުމަށް ހުރަސްއަޅަމުންނެވެ. އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ)އިން ވަނީ ސެޕްޓެމްބަރު މަހުގެ 24ވަނަ ދުވަހާ ހަމައަށް ހުރްމުޒް ކަނޑުއޮޅިއާއި މެދުއިރުމަތީގެ ސަރަޙައްދުން އުޅަނދު ފަހަރު ހިމެނޭ 85 ހާދިސާއެއް ހިނގާފައިވާ ކަމަށް ބުނެފައެވެ. އޭގެ ތެރޭގައި ފާއިތުވި ސެޕްޓެމްބަރު މަހުގެ ތެރޭގައި ތެޔޮ ޓޭންކަރުތަކަށް އަމާޒުވެފައިވާ ހަމަލާތައް ހިމެނެއެވެ.