ދިވެހި ސަރުކާރަށް ދިގު މުއްދަތަކަށް ޚިދުމަތްކޮށްދެއްވާފައިވާ ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢަބްދުއްރަޝީދު ޙުސައިން ލިޔުއްވި "ދިވެހިރާއްޖޭގެ އެހާރުގެ ބައެއް ހަނދާންތައް" ފޮތް ނެރުއްވައިފިއެވެ. މި ފޮތް ނެރެދެއްވީ، ދިވެހި ބަހާއި ދިވެހި އަދަބިއްޔާތު ދިރުވައި އާލާ ކުރުމަށް މަސައްކަތްކުރާ އަމިއްލަ ޖަމިއްޔާއެއްކަމަށްވާ ލިޔުންތެރިންގެ ގުޅުމުގެ ރައީސް، އަދި ދިވެހި ސަރުކާރަށް ދިގު މުއްދަތަކަށް ޚިދުމަތްކޮށްދެއްވާފައިވާ ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢައްބާސް އިބްރާހީމެވެ.
މިފޮތުގައި ރާއްޖޭގެ ތާރީޚުގައި އެކި ދުވަސްވަރުގައި ހިނގާފައިވާ މުހިއްމު ކަންތައްތަކަކާއި، ޚާއްސަކޮށް ރާއްޖެ ހިމެނޭ ސަރަހައްދާއި، ސާކުގެ އުފެދުމާގުޅޭ މުހިއްމު މަޢުލޫމާތުތަކެއް ހިމަނުއްވާފައިވެއެވެ. އަދި ކުރީގެ ބައެއް ފޮޓޯތައްވެސް ފޮތުގައި ހިމަނުއްވާފައިވެއެވެ. މިފޮތަކީ ރާއްޖޭގެ ތާރީޚާއި ބެހޭ މަޢުލޫމާތު އެއްކުރާ މީހުންނާއި، ކިޔަވާ ކުދިންނަށް ބޭނުންތެރި ފޮތަކަށްވާނެކަމަށް ލިޔުންތެރިންގެ ގުޅުމުގެ ފަރާތުން ބުނެފައިވެއެވެ.
މި ފޮތް ނެރެދެއްވުމަށްފަހު ވާހަކަފުޅުދައްކަވަމުން ޢައްބާސް ވިދާޅުވީ، މި ފޮތް ނެރެދެއްވުމުގެ ޝަރަފު އެމަނިކުފާނަށް ލިބިވަޑައިގެންނެވީތީ ވަރަށް އުފާކުރައްވާކަމަށެވެ. އަދި މިފޮތުގައި ހިމެނޭ ބައެއް ވާހަކަތަކަކީ ޚުދު އެމަނިކުފާނުވެސް އަމިއްލަފުޅަށް ތަޖުރިބާކުރެއްވި، ހަނދާނުގައި ހުރި ކަންތައްތަކެއްކަން ފާހަގަކުރެއްވިއެވެ.
ޢައްބާސް ވިދާޅުވީ، މި ފޮތް ލިޔުއްވި ޢަބްދުއްރަޝީދު ޙުސައިނަކީ ރާއްޖޭގައި ކަންކަން ޕްލޭންކުރެވިގެން ހިންގަން ފެށި ދުވަސްވަރު، އެކަންތައްތައް ވަރަށް ގާތުން ބައްލަވާ ތަޖުރިބާކުރައްވާފައިވާ ބޭފުޅެއްކަމުން، މި ފޮތަކީ އަދުގެ ޖީލަށް ބޭނުންތެރި މަޢުލޫމާތުތަކެއް ލިބިގެންދާނެ ފޮތެއްކަމަށެވެ.
"19 ވަނަ ޤަރުނުގެ މެދުތެރޭގައި ރާއްޖެއަށް ޒިޔާރަތްކުރި ފުރަތަމަ ބޭރުގެ އަންހެންމީހާއަށްވެސް ވެދާނެ، އޭނާ ލިޔެފައިހުރި ވާހަކަތަކާއި، އޭރު ރާއްޖޭގެ މީހުން ލާއުޅުނު ހެދުމާއި، އުޅުނުގޮތާއި، ހަރަކާތްތަކާއި މިހުރިހާ ކަމެއް މިފޮތުގައި ވަރަށް ރަނގަޅަށް ލިޔުއްވާފައި އެބަހުރި. އޭގެ އިތުރަށް ރާއްޖޭގެ ވިޔަފާރިއަށް އައިސްފައި ހުރި ބަދަލު، ބޭރު މީހުންގެ އަތުން ދިވެހިންގެ އަތްމައްޗަށް ވިޔަފާރި ބަދަލުވެގެން އައިގޮތާބެހޭ ކަންތައްތަކެއް ލިޔުއްވާފައި އެބަހުރި. ހަމައެހެންމެ ރާއްޖޭގެ މިހާރު އަޅުގަނޑުމެން މިދެކޭ ތަރައްޤީގެ ފެށުން އައިގޮތް، ކަންތައްތައް ރޭވިގެން އައިގޮތް، އެކަމުގެ ބިންގާ އެޅުނު ގޮތް ވަރަށް ރަނގަޅަށް ލިޔުއްވާފައިވޭ" ޢައްބާސް އިބްރާހީމް ވިދާޅުވިއެވެ.
މި ފޮތް ނެރެދެއްވުމަށްފަހު ވާހަކަފުޅުދައްކަވަމުން ޢައްބާސް ވަނީ ދިވެހި ލިޔުންތެރިންނަށް މުހިއްމު އިލްތިމާސްއެއް ކުރައްވާފައެވެ. އެގޮތުން ކޮންމެ ބޭފުޅަކުވެސް އެބޭފުޅެއްގެ ހަނދާންތައް ރާއްޖެއާއި ގުޅުވައިގެން އެހާރުގެ އަދި މިހާރުގެ ހަނދާންތައް ލިޔުއްވުމަށެވެ. އަދި އަޅުގަނޑުމެންނަކީ ކޮން ބައެއްކަން، ކިހިނެއް އުޅުނު ބައެއްކަން، މިޒަމާނުގެ މީހުންނަށް އަދި ދެން އަންނަން އޮތް ޖީލަށްވެސް ވިސްނޭނީ އޭރުންކަމަށް ޢައްބާސް ވިދާޅުވިއެވެ.
މި ފޮތާގުޅޭގޮތުން ވާހަކަފުޅުދައްކަވަމުން ޢަބްދުއްރަޝީދު ޙުސައިން ވިދާޅުވީ، މިފަދަ ފޮތެއް ލިޔުއްވުމުގެ އެންމެ މުހިއްމު ބޭނުމަކީ އަޅުގަނޑުމެންގެ ޤައުމަށް އަންނަމުންދާ ބަދަލުތަކާއި، އަންނަމުންދާ ކުރިއެރުންތަކުގެ ވާހަކަތައް ފަހަށް ރައްކާކުރުންކަމަށެވެ. އެގޮތުން ވަރަށް ދުރު ހަނދާންތަކުގެ ވާހަކަތަކާއި، ބޮޑުތަކުރުފާނު ރާއްޖޭގައި އިސްލާމްދީން ގެއްލެމުންދަނިކޮށް، އިސްލާމްދީން ގެނެސްދެއްވިގޮތާއި، 1960 ގެ އަހަރުތަކުގައި ދިވެހިންގެ ދިރިއުޅުމުގެ ޙާލަތު ހުރިގޮތް މި ފޮތުން އެނގިވަޑައިގަންނަވާނެކަމަށް ޢަބްދުއްރަޝީދު ޙުސައިން ވިދާޅުވިއެވެ.
"42 ބިލިއަން ރުފިޔާއަށް އެބަ އަރާ 2023 ވަނަ އަހަރަށް މި ހަދާ ބަޖެޓް. 1960 ވަނަ އަހަރު ދައުލަތުގެ ބަޖެޓަކީ ނަވާރަ މިލިއަން ހަ ސަތޭކަ އެކާވީސް ހާސް ދުއިިސައްތަ ރުފިޔާ. 1964 ގައި ރާއްޖޭގެ މީހުންގެ ޢަދަދަކީ ނުވަދިހަ ހަތަރު ހާސް ފަސްސަތޭކަ ހަތާވީސް. މިހާރު ރާއްޖޭގައި ތިބި ބިދޭސީންގެ ޢަދަދުވެސް މިއަށްވުރެ އިތުރުވާނެ. ރާއްޖެއަށް އެތެރެކުރަނީ ފުށްކޮޅަކާއި ހަނޑޫކޮޅަކާއި ހަކުރު ކޮޅެއް. ރޯމަހުގެ ބާވަތްތައް ރާއްޖޭން ބޭރުކުރެވޭނެ ގޮތެއް ނޯވޭ. އެއީ އޭރު އަޅުގަނޑުމެންގެ ޙާލަކީ. އާމްދަނީވެސް ކުޑަ. ބޭންކެއް ނުހުރޭ މިތާކު އޭރު. މިހިރަ މަޢުލޫމާތު ލިބިވަޑައިގަންނަވާނެ މިފޮތުން" ޢަބްދުއްރަޝީދު ޙުސައިން ވިދާޅުވިއެވެ.
ޢަބްދުއްރަޝީދު ޙުސައިނަކީ ދިވެހި ދައުލަތަށާއި ދިވެހި ރައްޔިތުންނަށް ވަރަށް އިޚްލާޞްތެރި ޚިދްމަތްތަކެއް ކޮށްދެއްވާފައިވާ ބޭފުޅެކެވެ. ރާއްޖޭގެ މިޒަމާނުގެ ތަރައްޤީގައި ވަރަށް މުހިންމު ދައުރެއް އަދާކުރައްވައި ޤައުމީ ގޮތުން ފާހަގަކުރެވޭ ހަރުދަނާ ޝަޚްޞިއްޔަތެކެވެ. ދިވެހި އަދަބިއްޔާތަށް ކުރައްވާފައިވާ ޚިދުމަތްތައް ފާހަގަކުރައްވައި، ދިވެހި އަދަބިއްޔާތަށް ޚިދުމަތް ކުރުމުގެ ޢާންމު ޚިދުމަތުގެ ޝަރަފުވެރިކަމުގެ އިނާމު 2006 ވަނަ އަހަރު ޢަބްދުއްރަޝީދު ޙުސައިނަށް ވަނީ ލިބިވަޑައިގެންފައެވެ. އެމަނިކުފާނަށް ނިޝާން ޢިއްޒުއްދީންގެ ޢިއްޒަތުގެ ވެރިކަން ދިވެހި ދައުލަތުން އަރުވާފައިވަނީ 2013 ވަނަ އަހަރުގައެވެ.
މިއީ ލިޔުންތެރިންގެ ގުޅުމުގެ ފަރާތުން ޝާއިޢުކުރި ޢަބްދުއްރަޝީދު ޙުސައިނުގެ ދެވަނަ ފޮތެވެ. މީގެކުރިން "ޤައުމީ ތަރާނާ"ގެ ނަމުގައި އެމަނިކުފާނު ލިޔުއްވާފައިވާ ޤައުމީ ޅެންތައް ހިމެނޭ ފޮތެއް ނެރެފައިވެއެވެ. ޢަބްދުއްރަޝީދު ޙުސައިން ވަނީ ލިޔުންތެރިންގެ ގުޅުމުގެ ރައީސްކަން 10 އަހަރު ވަންދެން ކުރައްވާފައެވެ.