މުސްލިމުންގެ މެދުގައި ދެކޮޅުވެރިކަމާއި، ފިތުނަ ފަސާދަ އުފެއްދުމަކީ، މުޖުތަމަޢު ބައިބައިވާނެ ކަމެއްކަން ފާހަގަކުރައްވާ، އެފަދަ އަމަލުތަކުން ދުރުހެލިވުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
ރާއްޖޭގެ މިސްކިތްތަކުގައި މިއަދު ދިން ހުކުރު ޚުޠުބާ ޚާއްސަކޮށްފައިވަނީ "އިސްލާމް ދީނަކީ އެކުވެރިކަމުގެ ދީން" މި މައުޞޫޢަށެވެ.
މިއަދުގެ ހުކުރު ޚުޠުބާގައި ވިދާޅުވީ، އިސްލާމްދީނަކީ އެއްބައިވަންތަކަމަށް ގޮވާލާދީން ކަމަށާއި އެއްބަޔަކު އަނެއްބަޔަކަ އޯގާތެރިވެ، ރަޙްމު ކުރުމަށް ގޮވާލާ ދީން ކަމަށެވެ. އަދި އުނދަގޫ ކަމެއް ނުވަތަ ހިތާމައެއް ކުރިމަތިވެއްޖެނަމަ، އެކަކު އަނެކަކަށް އެހީތެރިވުމަށާއި، އެކަކު އަނެކެއްގެ ޙައްޤުތަކަށް ރައްކާތެރިވުމަށް އަމުރުކުރާ ދީން ކަމަށެވެ. އިސްލާމީ އުއްމަތުގެ ކޮންމެ ފަރުދަކުވެސް އޭނާގޭ ދުލާއި، އަތް، އެހެން މީހުންނަށް އުނދަގޫވާފަދަ ކަންކަމުން ރައްކާތެރިކުރުމަށް އިސްލާމްދީން ގޮވާލައްވާކަންވެސް ފާހަގާކުރެއްވިއެވެ.
މުއުމިނަކަށް ދަތިޙާލެއް ޖެހިފައިވަނިކޮށް އެކަމަކުން އެމީހަކު ދުރުކޮށް ސަލާމަތްކުރުމަށް މަސައްކަތްކޮށްދީ އެހީތެރިވެއްޖެ މީހަކަށް ހުރި ދަރުމައިގެ ބޮޑުކަމުގެ މައްޗަށް މިއަދުގެ ޚުޠުބާގައި ވަނީ އަލިއަޅުއްވާލައްވާފައެވެ.
"މުސްލިމަކީ އަނެއް މުސްލިމެއްގެ އަޚާ. އޭނާ، އޭނާގެ އަޚާއަށް އަނިޔާއެއްނުކުރާނެ އަދި އޭނާގެ އަޚާ، ދުޝްމަނުންނަކަށް ދޫކޮށް ނުލާނެ އެމީހެއްގެ އަޚާގެ ބޭނުން ފުއްދައިދިނުމުގައި ދެމިހުންނަ މީހާގެ ބޭނުން ފުއްދަވައިދެއްވުމުގައި މާތް ﷲ ވޮޑިގެންވާނެ. އަދި މުސްލިމެއްގެ ކިބައިން ދަތި އުނދަގޫ ކަމެއް ދުކޮށްފި މީހާއަށް ޤިމާޔަތް ދުވަހުގެ ދަތި އުނދަގޫ ކަންތައްތަކުގެ ތެރެއިން ކަމެއް މާތް ﷲ އެމީހެއްގެ ކިބައިން ދުރުކޮށްދެއްވާނެ" ޚުޠުބާގައި ވިދާޅުވިއެވެ.
މިއަދުގެ ޚުޠުބާގައި މުސްލިމުން އުޅެންވީ ގޮތާއި، އެއުރެންގެ މެދުގައި މުޢާމަލާތު ކުރަންވީ ރީތި ގޮތްތައް މާތް ﷲ އާއި، އެކަލާނގެ ރަސޫލާ އަންގަވާފައިވާކަން ފާހަގަކުރައްވާ، އެގޮތްތަކުގައި ހިފެހެއްޓުމުން އެކަމުގެ ލާބަޔާއި މަންފާހުރީ ހަމަ އެއުރެންނަށްކަމަށް ވިދާޅުވިއެވެ. އަދި އެގޮތްތައް ދޫކޮށްލައި ދުރަށް ދިޔުމުން، އެކަމުގެ ގެއްލުމާއަި ހަލާކު ހުރީވެސް ހަމަ އެއުރެންނަށްކަން ފާހަގަކުރެއްވިއެވެ.
އެހެންކަމުން މުސްލިމުންގެ މެދުގައި ދެކޮޅުވެރިކަމާއި، ފިތުނަ ފަސާދަ އުފެއްދުމަކީ، މުޖުތަމަޢު ބައިބައިވާނެ ކަމެއްކަމަށް ޚުޠުބާގައި ވިދާޅުވިއެވެ. އަދި އެއީ އެކަކު އަނެކަކަށް، އެއް ބަޔަކު އަނެއް ބަޔަކަށް ނަފްރަތުވެ، އެކުވެރިކަމުގެ ގުޅުން ކެނޑޭނެކަމެއްކަމަށާއި، އެއީ އިސްލާމް ދީން ހުއްދަކުރާކަމެއް ނޫންކަމަށް ވިދާޅުވިއެވެ.
އެއްބަނޑު އެއްބަފާކަމުގެ ގުޅުމާއި އިސްލާމީ އުޚުވަތްތެރިކަމުގެ ގުޅުން ދެމެހެއްޓުމަށާއި، ނަފްރަތާއި، ދެކޮޅުވެރިކަމުގެ މަގުން އެއްކިބާވުމަށް އެންމެހާ މުސްލިމް އަޚުންނަށް މިއަދުގެ ޚުޠުބާގައި ވަނީ ގޮވާލައްވާފައެވެ.
"މުސްލިމް އަޚުންނޭވެ. އިސްލާމީ އަޚުވަންތަކަމަކީ ނުވަތަ އެކުވެރިކަމަކީ ވަރަށް މާތް ލަނޑުދަނޑިތަކެއް ހިމެނޭކަމެއް. ދީނީ މުހިއްމު މަޤްޞަދުތަކެއް ހިމެނޭކަމެއް. މީގެތެރެއިން އެންމެ މުހިއްމުކަމަކީ އެއް މުސްލިމަކު އަނެއް މުސްލިމަކަށް ހެޔޮ ކަންކަމުގައި ވާގިވެރިވުން. މާތް ﷲ އަށް ތަޤްވާވެރިވެ، ހެޔޮ ޢަމަލުކުރުމުގެ މައްޗަށް ބާރުއެޅުން. ފާފަކުރުމާއި، ނުބައިކަންކަމުން އެއްކިބާވެ، އިޞްލާހުކުރުމަށް ބާރުއެޅުން" ޚުޠުބާގައި ވިދާޅުވިއެވެ.
މުސްލިމުންގެ މުޅި ޙަޔާތުގެ މޮޓޯއަކަށް ވާންޖެހޭނީ ހެޔޮ ކަންކަން ކުރުމާއި، ނުބައިކަންކަމުން ދުރުހެލިވެ ރައްކާތެރިވުމުގެ މައްޗަށް ބާރުއެޅުންކަމަށް މިއަދުގެ ހުކުރު ޙުޠުބާގައި ވިދާޅުވިއެވެ. އަދި އާޚިރަތުގެ ބާއްޖަވެރިކަން އޮތީ އެގޮތުގައިކަމަށާއި، މި މަޤްޞަދު ނެތިވެ، އެކުވެރިކަމަކީ ހަމައެކަނި ދުންޏަވީ ބޭނުންތަކެއް ނުވަތަ ނަފްސުގެ އެދުންތަކެއް ޙާޞިލުކުރުމަށް ބާރުއަޅާ ގުޅުމަކަށްވެއްޖެނަމަ، އެ އެކުވެރިކަން އާޚިރަތުގައި ވެގެންދާނީ އަބާއްޖަވެރިކަމެއްގެގޮތުގައި ފާހަގަކުރެއްވިއެވެ.