ދިވެހިރާއްޖެއަށް އެތެރެކޮށް ވިއްކާ ކެމިކަލްތަކުގެ މަޢުލޫމާތުތައް ހިމެނޭ ރިޕޯޓް 2 މަސްދުވަހުގެ ތެރޭގައި ހުށައެޅުމަށް މިނިސްޓްރީ އޮފް ޑިފެންސްއިން އަންގަވައިފިއެވެ.
2019 ވަނަ އަހަރު އެކުލަވައިލި ނުރައްކާތެރި ކެމިކަލާއިބެހޭ ގަވާއިދު 7 ވަނަ މާއްދާ ދަށުން ދިވެހިރާއްޖެއަށް ކެމިކަލް އެތެރެކުރާ ފަރާތްތަކުން، އެތެރެކުރާ ކެމިކަލް ވިއްކަން ޖެހެނީ ޑިފެންސް މިނިސްޓްރީގެ "ކެމިކަލް ވިއްކުމުގެ ހުއްދަ" ނަގައިގެންނެވެ.
ޑިފެންސް މިނިސްޓްރީން ވިދާޅުވީ، މި ޤަވައިދުގެ ދަށުން ކެމިކަލް ވިއްކާ ފަރާތްތަކުން ކެމިކަލް ވިއްކާގޮތުގެ ތަފްޞީލު ބަލަހައްޓަން ޖެހޭނެކަމަށެވެ. މި ގަވާއިދުގެ 15 ވަނަ މާއްދާގެ ދަށުން މި ރިކޯޑުތަކުގެ ކޮޕީ ހިމެނޭ ރިޕޯޓެއް ކޮންމެ 6 މަހަކުން އެއް ފަހަރު މިނިސްޓްރީއަށް ފޮނުވަންޖެހެއެވެ.
ޑިފެންސް މިނިސްޓްރީން ވަނީ ރާއްޖެއަށް ކެމިކަލް އެތެރެކުރާ ފަރާތްތަކުން، އެތެރެކުރާ ކެމިކަލް ވިއްކުމަށްޓަކައި "ކެމިކަލް ވިއްކުމުގެ ހުއްދަ" ނެގުމަށާއި ވިއްކާ ކެމިކަލްގެ މަޢުލޫމާތު ހިމެނޭ ރިޕޯޓް 60 ދުވަހުގެ ތެރޭގައި ޑިފެންސް މިނިސްޓްރީއަށް ހުށައެޅުމަށް އަންގަވާފައެވެ.
2019 ވަނަ އަހަރުގެ ސެޕްޓެމްބަރު މަހުގެ 20 ވަނަ ދުވަހު މާލޭގައި ހިނގާދިޔަ ނުރައްކާތެރި އަލިފާނުގެ ޙާދިސާއާއި ސެޕްޓެމްބަރު މަހުގެ 30 ވަނަ ދުވަހު ހިނގައިދިޔަ އަލިފާނުގެ ހާދިސާއާ ގުޅިގެން ރާއްޖެއަށް ނުރައްކާތެރި ކެމިކަލް އެތެރެ ކުރުމުގެ ހުއްދަ ދޫކުރުން ވަގުތީ ގޮތުން ހުއްޓާލިއެވެ. އަދި މީހުން ދިރިއުޅޭ ޢިމާރާތްތަކުގައި ކެމިކަލް ގުދަންކުރުމަކީ މަނާކަމެއްގެ ގޮތުގައި ކަނޑައަޅައި "ނުރައްކާތެރި ކެމިކަލާބެހޭ ޤަވާއިދު" އެކުލަވާލައި 2019 އަހަރުގެ ސެޕްޓެމްބަރު މަހުގެ 23 ވަނަ ދުވަހު އަމަލުކުރަންފެށިއެވެ.
އެއަށްފަހު ރައްކާތެރިކަމުގެ ގޮތުން އަޅަންޖެހޭ ޚާއްސަ ފިޔަވަޅުތަކެއް އެޅުމުގެ އިންތިޒާމު ހަމަޖައްސައި މާލެ ފިޔަވައި އެހެން ރަށްރަށުގައި ގުދަންކުރަން ކެމިކަލް އެތެރެކުރަން ހުއްދަ ދޫކުރަން ފެށިއެވެ.
ނުރައްކާތެރި ކެމިކަލްގެ ބާވާތްތައް މާލޭގެ ގަރާޖްތަކުގައި ބެހެއްޓުމުގެ ސަބަބުން ހިތާމަވެރި އެތަކެއް ހާދިސާތަކެއް ހިނގަމުން އަންނާތީ ސަރުކާރުން ވަނީ ކެމިކަލް ގުދަންތައް ތިލަފުއްޓަށް ބަދަލުކޮށްފައެވެ.