މިފްކޯއަށް މަސްކިރުވުމުގައި ހުރި ދަތިތައް ހައްލުކުރުމަށް 12000 މެޓްރިކް ޓަނުގެ ކެޕޭސިޓީއެއް ބޭނުންވާ ކަމަށާއި، މިހާރު ކުރިއަށް ރޭވިފައިވާ މަޝްރޫޢުތަކާއި އެކު އެ މިންވަރަށް ކެޕޭސިޓީ އިތުރުވެގެންދާނެކަމަށް މިނިސްޓަރ އޮފް އިނޮކޮމިކް ޑިވެލޮޕްމަންޓު ފައްޔާޟް އިސްމާޢީލް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މަސްވެރިންގެ ދުވަސް ފާހަގަކުރުމަށް ގދ. ފަރެސްމާތޮޑާގައި ކުރިއަށްދިޔަ ހަރަކާތްތަކުގެތެރެއިން މަސްވެރިންނާއި އެކު ސަރުކާރުގެ އިސްވެރިން ބޭއްވި ބައްދަލުވުމުގައެވެ.
މަސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން އިކޮނޮމިކް މިނިސްޓަރ ފައްޔާޟް އިސްމާޢީލް ވަނީ، ރާއްޖޭގެ މަސްވެރިކަމުގެ ސިނާއަތް ތަރައްޤީކުރުމަށް ގިނަ މަސައްކަތްތަކެއް ކުރަމުންދާކަން ފާހަގަކުރައްވާ، މިފްކޯގެ ކެޕޭސިޓީ އިތުރުކުރުމަށް އިސްކަންދެއްވާކަމަށް ވިދާޅުވެފައެވެ. އެގޮތުން މިހާރު މަސް ކިރުވުމުގައި ހުރި ދަތިތައް ހައްލުކުރުމަށް މިފްކޯގެ ކެޕޭސިޓީ 12000 ޓަނަށް އިތުރުކުރަން ޖެހޭކަމަށް މިނިސްޓަރ ވިދާޅުވިއެވެ.
" މަސައްކަތްކުރީ ފެލިވަރުގައި 4000 ޓަނަށް އިތުރުކޮށްފައި، ކޫއްޑޫ 6000 ޓަނަށް ގެނައުމަށް، ތިނަދޫގައި 1000 ޓަނާއި، މުލަކުގައި 500 ޓަނު އަދި އިހަވަންދޫ ހިސާބު 500 ނޫނީ 1000 ޓަނުގެ މަސައްކަތްކުރެވެމުންދަނީ، މިކަންކަން ކުރެވުނީމައި މި މައްސަލައަށް ހައްލެއް ލިބިގެންދާނެ،" މިނިސްޓަރ ފައްޟާޒް ވިދާޅުވިއެވެ.
ފައްޔާޟް ވިދާޅުވީ ކެޕޭސިޓީ އިތުރުކުރުމަށް ހިންގަ މަޝްރޫޢުތައް ސަރުކާރުގެ ޕްލޭނާއި އެއްގޮތަށް ކުރިއަށްދާކަމަށެވެ. އެހެންނަމަވެސް މި މަސައްކަތްތަކީ ވަގުތު ނަގާނެކަމެއްކަން މިނިސްޓަރ ފާހަގަކުރެއްވިއެވެ.
"ޕްލޭންކޮށްފައި ހުރި ކަންތައްތައް އެބަދޭ ކުރިއަށް، ޤަބޫލުފުޅުކުރަންވާނެ، 4 އަހަރު 5 އަހަރު މިއީ 20 -30 އަހަރު މަޑުމަޑުން ކުރަންޖެހޭ އިންވެސްޓްމަންޓުތަކެއް ކުރަން މި ޖެހެނީ، ފައިސާގެ ދަތިކެއްވެސް ނެތް، އެކަމަކު ކަމެއް ކުރުމަށް ހުންނާނެ ލިމިޓުތަކެއް، އެއްޗަކަށް އޯޑަރުކުރީމައި އަންނާނެ އިރު، ކޮންޓްރެކްޓަރަކަށް އިއުލާންކުރީމައި ނަގާނެ ވަގުތު،" މިނިސްޓަރ ފައްޔާޟް ވިދާޅުވިއެވެ.
މިނިސްޓަރ ފާހަގަކުރެއްވިގޮތުގައި މަސް ދޯނިތައް ތަރައްޤީވެގެންދިޔައިރު، މަސް ގަންނަ ކުންފުނި ތަރައްޤީވެގެން ގޮސްފައި ނުވާ ކަމަށެވެ. އަދި މިހާރު ބިދޭސީންނަށްވެސް މަސްދޯނިތަކުގައި ހަރަކާތްތެރިވެވޭނެ އަދަދު އިތުރުކޮށްފައިވުމުން މަސްދޯނިތަކުގެ އަދަދު ކުރިއަށް އޮތްތަނުގައި \އިތުރުވެގެންދާނެ ކަމަށް ލަފާކުރެވޭ ކަމަށެވެ.
މިފްކޯއަށް މިސްކިރާ ކެޕޭސިޓީ އިތުރުކުރުމަށް ކުރާ މަސައްކަތުގެ ދަށުން ދާދި ފަހުން ވަނީ މަސްކިރަން އިތުރު 3 ބޯޓު ގަނެފައެވެ. ސަރުކާރުން ހާމަކުރައްވާގޮތުގައި މަސްވެރިކަމުގެ ދާއިރާއިން ހިންގާ މަޝްރޫޢުތައް ނިމުމާއެކު، މަސްވެރިން ބާނާ މަހަށް ހަމަ އަގު ލިބިގެންދާނެއެވެ.