ރާއްޖެއަށް އެތެރެކުރާ އެލްމިނިއަމް ފަތިން ނަގާ އިމްޕޯޓް ޑިއުޓީ ބޮޑުކޮށްފައި ނުވާކަމަށް މޯލްޑިވްސް ކަސްޓަމްސް ސަރވިސްއިިން ވިދާޅުވެއްޖެއެވެ.
މޯލްޑިވްސް ކަސްޓަމްސް ސަރވިސްއިން މިހެން ވިދާޅުވީ ރާއްޖެ އެތެރެކުރާ އެލްމިނިއަމް ފަތިން ނަގާ ޑިއުޓީ ބޮޑުކޮށްފައިވާކަމަށް ބުނެ ރާއްޖޭގައި ވިޔަފާރިކުރާ ކުންފުންޏަކުން ހަގީގަތާއި ހިލާފް ވާހަކަތަކެއް ފެތުރުމާއި ގުޅިގެނެވެ.
ރާއްޖެއަށް އެތެރެކުރާ އެލްމިނިއަމް ފަތިން ނަގާ އިމްޕޯޓް ޑިއުޓީ ރޭޓް ބޮޑުކޮށްފައި ނުވާކަން ފާހަގަކޮށް ކަސްޓަމްސްއިން ނެރުނު ބަޔާނުގައި ވިދާޅުވީ ސެލްބީ އިންވެސްޓްމެންޓްއިން އެތެރެކުރުމަށް ރާއްޖެއަށް ގެނެސްފައިވާ ޝިޕްމެންޓަށް ހުށަހަޅާފައިވާ ގުޑްސް ޑިކްލަރޭޝަންގައި އެލުމިނިއަމް ފަތިކަމަށް ބަޔާންކޮށްފައިވީނަމަވެސް، ހުށަހަޅާފައިވާ ލިޔެކިޔުންތަކުގައި އެ ޝިޕްމެންޓްގައި ހުރީ އެލުމިނިއަމް ދޮރާއި އަދި ވިންޑޯ ފްރޭމްކަމަށެވެ. އަދި ޝިޕްމެންޓްގައި ހިމެނެނީ ފަތިތޯ ނުވަތަ ފްރޭމްތޯ ޔަޤީންކޮށް އެޗް.އެސް ކޯޑު އިސްލާޙްކުރުމަށް އެފަރާތަށް އެންގިކަމަށް ކަސްޓަމްސްގެ ބަޔާނުގައިވެއެވެ. ނަމަވެސް ކޯޑު އިސްލާޙްކޮށްފައިވެސް ހުށަހަޅާފައިވަނީ، ޑޯރ ފްރޭމްގެ ގޮތުގައިކަމަށާއި ކަސްޓަމްސްއިން މުދަލުގެ ޑިކްލަރޭޝަން ނިންމާފައިވަނީ އެކުންފުނީގެ ފަރާތުން ހުށަހަޅާފައިވާ މައުލޫމާތުގެ މައްޗަށް ބިނާކޮށްކަމަށްވެސް ކަސްޓަމްސްއިން ވިދާޅުވެއެވެ.
ކަސްޓަމްސްއިން ވިދާޅުވީ ސެލްބީ އިންވެސްޓްމެންޓްގެ ފަރާތުން ގެނެސްފައިވާ ޝިޕްމެންޓަކީ ކަސްޓަމްސްއިން ބަލައި ފާސްކޮށް ދޫކުރުމުގެ މަރުޙަލާ ފުރިހަމަވެފައިވާ ތަކެތިކަމަށް ނުވާތީ އެތަކެތި އަދިވެސް ހުރީ މާލޭ ކޮމާޝަލް ހާބަރުގައިކަމަށެވެ.
ކަސްޓަމްސް އާ ގުޅޭގޮތުން ދޮގުމަޢުލޫމާތު ހިމަނައި "ސެލްބީ އިންވެސްޓްމެންޓް" އިން ކޮށްފައިވާ ޕޯސްޓާއިގުޅޭ. @MariyaDidi @faya_i @AbdullaSh4reef pic.twitter.com/P1JrBgCx3v
— Maldives Customs (@CustomsMv) December 13, 2022
ދިވެހިރާއްޖޭގެ އެކްސްޕޯޓް/އިމްޕޯޓް ޤާނޫނުގައި އެލުމިނިއަމް ވިންޑޯ ފްރޭމްއަށް 2020 ވަނަ އަހަރުން ފެށިގެން ޑިއުޓީގެ ގޮތުގައި %10 ނަގަން ކަނޑައަޅާފައިވެއެވެ. ނަމަވެސް އެލްމުނިއަމް ފަތިން ނަގާ ޑިއުޓީ ވަނީ ކަނޑާލާފައެވެ.
ކަސްޓަމަސްއިން ވިދާޅުވީ ސެލްބީ އިންވެސްޓްމެންޓްގެ ފަރާތުން ރާއްޖެއަށް ގެނެސްފައިވާ މުދާ ޝިޕްމެންޓް ބަލައިފާސްކޮށް ދޫކުރާއިރު، ޝިޕްމެންޓްގައި ހިމެނެނީ އެލްމިނިއަމް ފަތިކަމަށްވާނަމަ، އެފަރާތުން ޑިއުޓީގެ ގޮތުގައި އިތުރަށް ދައްކާފައިވާ ފައިސާ ރިފަންޑްކުރެވޭނެކަމަށެވެ.
ކަސްޓަމްސްއިން ވަނީ ސެލްބީ އިންވެސްޓްމެންޓް ފަދަ ރާއްޖޭގައި ދިގު މުއްދަތަކަށް، ފުޅާދާއިރާއެއްގައި އިމްޕޯޓްކުރުމުގައި ހަރަކާތްތެރިވާ ކުންފުންޏަކުން ރައްޔިތުންނަށް ހަޤީގަތް އޮޅޭގޮތަށް މަޢުލޫމާތުދިނުމުގެ ސަބަބުން އެކަން ކުށްވެރިކޮށްފައެވެ. އަދި މިފަދަ ޢަމަލުތައް ހިންގާ ފަރާތްތަކާމެދު ޤާނޫނީގޮތުން މިމުއައްސަސާއިން އަޅަންޖެހޭ ފިޔަވަޅު އެއްވެސް ފަސްޖެހުމެއްނެތި އަޅާނެކަމަށްވެސް ކަސްޓަމްސްއިން ވިދާޅުވެއެވެ.