ފޮތްތެރިކަން ޔުނިވަރސިޓީގެ މުވައްޒަފުންނާއި ދަރިވަރުންގެ މެދުގައި އާލާކޮށް ދިރުވުމަށް، "ބުކް ރައިޓިންގ ގްރާންޓްސް" އާއި "ރިސަރޗް ގްރާންޓްސް" 7 މީހަކަށް ހަވާލް ކޮށްފިއެވެ.
މިގޮތުން ބުކް ރައިޓިންގ ގްރާންޓް ވަނީ 4 މީހަކަށް ލިބިފައެވެ. އަދި ރިސަރޗް ގްރާންޓްވެސް 4 މީހަކަށް ލިބުނެވެ. މީގެތެރެއިން އެކަކަށް ދެ ދާއިރާއަކުންވެސް ގްރާންޓް ލިބުނެވެ.
މިފަހަރުގެ ބުކް ގުރާންޓްގައި ޖުމްލަ 183000 ރުފިޔާ ގްރާންޓްގެ ގޮތުގައި ވަނީ ކަނޑައަޅާފައެވެ.
ބުކް ގްރާންޓްސް ލިބުނު ފަރާތްތައް
- އަޙްމަދު ޝަރީފް
- ޑރ. ޢާއިޝަތު ޝަނޫރާ
- މަރިޔަމް އިފްޝާން
- މައުމޫނާ ޢަބްދުﷲ
ރިސަރޗް ގްރާންޓްސް ލިބުން ފަރާތްތައް
-ޑރ. ޝައިކް ސައިދް ޢަލީ ޕަކީރް
- ޝިޒްނާ މުޙައްމަދު
- ޑރ. ޒޭބާ އަން ނަހެރް
- ޑރ. ޢާއިޝަތު ޝަނޫރާ
އެމްއެންޔޫގެ ރިސާރޗް ގްރާންޓްއަކީ ޔުނިވަރސިޓީގައި ރިސާރޗް މާހައުލެއް ޤާއިމް ކުރުމަށާއި، އެކެޑެމިކް މުވައްޒަފުންނަކީ ރިސާރޗަށް އަހުލުވެރި ބަޔަކަށް ހެދުމަށް އެހީތެރިވުމުގެ ގޮތުން ޔުނިވަރސިޓީގެ ބަޖެޓްގައި ހިމަނައިގެން 2014 ވަނަ އަހަރުން ފެށިގެން ދިނުމަށް ނިންމާފައިވާ ގްރާންޓްއެކެވެ.
ޔުނިވަރސިޓީގެ ކޮންމެ މުވައްޒަފަކަށްވެސް އެމީހަކު ހިންގަން ބޭނުންވާ ރިސާރޗް ޕްރޮޖެކްޓަކަށް ފައިސާގެ އެހީ ހޯދުމަށް އެދެވިދާނެކަމަށް އެމްއެންޔޫއިން ވިދާޅުވެއެވެ. އަދި މަތީ ޑިގްރީއަށް ކިޔަވާ ފުލްޓައިމް ދަރިވަރުންނަށްވެސް ފައިސާގެ އެހީއަށް އެދެވިދާނެއެވެ.
ރިސާރޗް ގްރާންޓް ދެވޭނީ ހުށަހަޅާ ޕްރޮޕޯޒަލްތައް ރިސާރޗް ގްރާންޓްސް ކޮމިޓީން، ކަނޑައެޅިފައިވާ މިންގަނޑުތަކަށް ބިނާކޮށް، ފެންވަރު ވަޒަން ކުރުމަށްފަހު ހޮވޭ ޕްރޮޖެކްޓްތަކަށެވެ. މިފަހަރުގެ ރިސާރޗް ގްރާންޓްއަށް ޖުމްލަ 1،560،360 ރުފިޔާ ގްރާންޓްގެ ގޮތުގައި ވަނީ ކަނޑައަޅާފައެވެ.