46 މަސް ދުވަހުގެ މުއްދަތަށް 3 ބިލިއަން އެމެރިކާ ޑޮލަރުގެ މާލީ އެހީގެ ޕްކޭޖެއް މިސްރަށް ދޭން އިންޓަނޭޝަނަލް މަނިޓަރީ ފަންޑް، އައިއެމްއެފްއިން ނިންމައިފިއެވެ.
މިއީ އައިއެމްއެފްގެ އެކްސްޓެންޑެޑް ފަންޑް ފެސިލިޓީ، އީއެފްޓީގެ ދަށުން ދޭން ނިންމާފައިވާ މާލީ އެހީގެ ޕެކޭޖެކެވެ. މި އެހީގެ ދަށުން އަދި ވަގުތުން ވަގުތަށް 347 މިލިއަން އެމެރިކާ ޑޮލަރު މިސްރަށް ދޫކުރާނެއެވެ.
މި ޕްރޮގްރާމުގެ މުއްދަތުގައި މިސްރުގެ ބައިނަލްއަގުވާމީ އަދި ސަރަހައްދީ ޕާޓްނަރުންގެ އަތުން ގާތްގަނޑަކަށް 14 ބިލިއަން އެމެރިކާ ޑޮލަރުގެ ފައިނޭންސިންވެސް ހޯދާނެކަމަށް އައިއެމްއެފްއިން ވަނީ ބުނެފައެވެ.
މި ސްކީމްގެ ދަށުން މިސްރުގެ އިގުތިސާދު ހަމައަކަށް އަޅުވައި ބާޒާރުގެ އަގުތަކާއި ބޭރު ފައިސާގެ މައްސަލަތައް ކޮންޓްރޯލް ކުރުމަށް ބާރުއަޅާނެކަމަށްވެސް އައިއެމްއެފްއިން ބުނެއެވެ.
މިސްރަށް ދިމާވެފައި އޮތް މާލީ ހާލަތުން އަރައިގަތުމަށް މި އެހީގެ ސަބަބުން ފަސޭހަވެގެން ދާނެކަމަށްވެސް އައިއެމްއެފްއިން ބުނެއެވެ. އަދި ޕްރައިވެޓް ސެކްޓަރު ކޮޅަށް ޖަހައި ބާރުވެރި ކުރުމުގައި ދައުލަތުން އެހީތެރިކަން ފޯރުކޮށްދޭ ގޮތަށް މަޝްވަރާ ކުރެވިފައިވާކަމަށްވެސް އައިއެމްއެފްއިން ވަނީ ބުނެފައެވެ.
މީގެކުރިންވެސް ވަރަށް ބޮޑަށް ދަރަނިވެރިވެ، ބޭރު ފައިސާގެ ދަތިކަން ކުރިމަތިވެފައިވާ މިސްރުގެ މާލިއްޔަތު އިތުރަށް ދަށްވެފައިވަނީ ރަޝިޔާ ޔުކްރެއިން ހަނގުރާމައަށް ފަހުއެވެ. މިކަމުގެ ސަބަބުން 20 ބިލިއަން އެމެރިކާ ޑޮލަރުގެ ބޭރުގެ އިންވެސްޓްމެންޓު ވަނީ މިސްރު އަތުން ބީވެފައެވެ.
މިސްރަކީ އަރަބި އެފްރިކާ ގައުމުތަކުގެ ތެރެއިން ބައިނަލްއަގްވާމީ މާލީ އިދާރާތަކުން ވަރަށް ގިނައިން ފަންޑިން ހޯދާ ގައުމެކެވެ. މާލީ އިދާރާތަކުން ބުނާ ގޮތުން މާލީ އިންތިޒާމުތައް މިސްރަށް ހަމަޖައްސައި ދެނީ މިސްރަށް އޮންނަ އިތުބާރަކުންނެވެ. އިންވެސްޓްމަންޓްތައް ކަވަރު ކުރުމުގައި މާލީ އިދާރާތަކުން ބުނާ ގޮތް ހެދުމަކީ މިސްރަށް އެހީ ފޯރުކޮށްދޭން ފަސޭހަވާ ކަމެއްކަމަށްވެސް އިދާރާތަކުން ބުނެއެވެ.