ގދ.ފަރެސްމާތޮޑާގައި ތަރައްޤީކުރި ޕިކްނިކް ސަރަހައްދުގެ މަސައްކަތް ނިންމާ އެ ރަށު ކައުންސިލާ ހަވާލުކޮށްފިއެވެ.
ފަރެސްމާތޮޑާގައި ތަރައްޤީކޮށްފައިވާ ޕިކްނިކް ސަރަޙައްދަކީ ކުރިން ކަޅުފަސް އޮތް ބިމެކެވެ. މީގެކުރިން އެތަނަކީ ބޭނުންކުރާތަނެއް ނޫނެވެ. އޭރު އެތަނުގައި ކަޅު ފަސް އޮތްނަމަވެސް މިހާރު އެތަން ވަނީ ދޮންވެލި އަޅާ ހިތްގައިމު ތުނޑިއަކަށް ބަދަލުކޮށްލާފައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެރަށު ކައުންސިލްގެ ރައީސް އަޙްމަދު އިމްތިޔާޒް ވިދާޅުވީ އަލަށް ތަރައްޤީކުރި ޕިކްނިކް ސަރަޙައްދުގައި ބާބަކިއު ގްރިލް އާއި މޭޒާއި ގޮނޑި ބަހައްޓާފައިވާކަމަށެވެ. މި މަސައްކަތަށް ބޭނުންވާ ތަކެތި ފޯރުކޮށްދީފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީއާއި ފެނަކަ ކޯޕަރޭޝަންގެ ސީއެސްއާރްގެ ދަށުންނެވެ. އިމްތިޔާޒް ވިދާޅުވީ ދަތުރު ދާ މީހުން މޫދަށް އެރުމަށްފަހު ފެންވެރުމުގެ އިންތިޒާމުވެސް އެތަނުގައި ޤާއިމްކޮށްފައިވާކަމަށެވެ.
އިމްތިޔާޒް ވިދާޅުވީ އެތަން ތަރައްޤީކޮށްފައިވަނީ ފެތުމުގެ ޕްރޮގްރާމްތަކާއި ސްކޫލް ކުދިންގެ އިތުރު ހަރަކާތްތައްވެސް ހިންގޭ ގޮތަށްކަމަށެވެ. އަދި ކުރިއަށް އޮތްތަނުގައި އެކި ކަހަލަ ހަފްލާތަކާއި، ޕާޓީތައް ބޭއްވުމަށް އެތަން ކުއްޔަށް ދިނުމަކީ ވިސްނުމެއްކަމަށް އޭނާ ވިދާޅުވިއެވެ.
ޕިކްނިކް ސަރަޙައްދަށް ބަލާއިރު އެތަން ތަރައްޤީކޮށްފައިވަނީ ރޭގަނޑުވެސް ބޭނުންކުރެވޭ ގޮތަށެވެ. މިގޮތުން އެ ސަރަހައްދު އަލިކުރެވޭނެ އިންތިޒާމް ވަނީ ހަމަޖައްސާފައެވެ. އަދި އެ ސަރަހައްދު ސާފުތާހިރު ތަނެއްގެ ގޮތުގައި ބޭއްވުމަށްޓަކައި ވަނީ ޑަސްބިންތަކެއްވެސް ބަހައްޓާފައެވެ.
ފަރެސްމާތޮޑާ ޕިކްނިކް ސަރަޙައްދުގެ މަސައްކަތް ފެށީ މިއަހަރުގެ ޖެނުއަރީމަހުގެ ތެރޭގައެވެ. އަދި މަސައްކަތް މިމަހުގެ 10 ވަނަ ދުވަހު ނިންމާ ޑިސެމްބަރ މަހުގެ 13 ވަނަ ދުވަހު ވަނީ ކައުންސިލާ ހަވާލުކޮށްފައެވެ. އެތަން ކައުންސިލާ ހަވާލުކޮށްދެއްވީ މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރަރސްޓްރަކްޗަރ މުޙައްމަދު އަޞްލަމެވެ.