ލ.ގަމުގައި އެޅުމަށް ހަމަޖެހިފައިވާ 100 ހައުސިން ޔުނިޓް އެޅުމުގެ ޢަމަލީ މަސައްކަތް ފަށައިފިއެވެ.
މިއަދު ގަމުގައި ބޭއްވި ރަސްމިއްޔާތުގައި ގަމުގައި އިމާރާތްކުރާ ހައުސިންގ ޔުނިޓުތަކުގެ ބިންގާ އަޅުއްވައިދެއްވީ ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން އާއި ގަމު ދާއިރާގެ މެމްބަރު މުހައްމަދު ވިސާމް އަދިި އެ ރަށު ކައުންސިލް މެމްބަރުންނެވެ.
އާބާދީ އިތުރުވަމުން އަންނަ ރަށްރަށަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ސަރުކާރުން ކުރައްވާ މަސައްކަތުގެ ތެރެއިން، ގަމުގައި 100 ހައުސިން ޔުނިޓް ހަދަން އެސްޖޭ ކޮސްޓްރަކްޝަނާއި ޙަވާލުކުރައްވާފައި ވަނީ މިއަހަރުގެ މެއި މަހުއެވެ.
ގަމުގައި ކުރިއަށްގެންދާ ހައުސިން މަޝްރޫޢުގައި ހިމެނެނީ މުޅިންވެސް 3 ކޮޓަރީގެ އެޕަރޓްމަންޓްތަކެވެ. މިއީ 1000 އަކަފޫޓުގެ ހައުސިން ޔުނިޓްތަކެކެވެ. އެގޮތުން ކޮންމެ އެޕަރޓްމަންޓެއްގައި 3 ކޮޓަރިއާއި، 3 ފާހަނައާއި، ސިޓީންރޫމް، ބަދިގެ އަދި ލޯންޑްރީއާއި ސްޓޯ ރޫމެއް ހުންނާނެއެވެ.
ލ. ގަމުގައި އިމާރާތް ކުރާ 100 ހައުސިންގ ޔުނިޓުގެ ބިންގާ އަޅައިފި. pic.twitter.com/yES3rvChPH
— Min.of National Planning, Housing & Infrastructure (@MoNPHImv) December 21, 2022
އެސްޖޭ ކޮންސްޓްރަކްޝަނުން ވަނީ މިިދިޔަ ޖުލައިމަހު މިމަޝްރޫއުގެ ޢަމަލީ މަސައްކަތަށް ބޭނުންވާ ބަރު ވެހިކަލާއި އެހެނިހެން ސާމާނު ރަށަށް ގެންގޮސްފައެވެ. އަދި މިހާރު މިވަނީ ހައުސިން ޔުނިޓްތަކުގެ ބިންގާ އަޅާފައެވެ.
މި މަޝްރޫޢުގައި ހިމަނައިގެން، ހައުސިން ޔުނިޓްތައް ހަދާ ސަރަޙައްދަށް ބޭނުންވާ ބައެއް އާއްމު ޚިދުމަތްތައް ޤާއިމުކުރުން ހިމެނެއެވެ. އެގޮތުން ހައުސިން ޔުނިޓްތައް ހިމެނޭ ސަރަޙައްދު އަލިކުރުމަށް ލައިޓް ޖެހުމާއި، ވެހިކަލް ޕާކުކުރާނެ އޭރިއާއެއް ހެދުން ހިމެނެއެވެ. މީގެއިތުރުން ހައުސިން ޔުނިޓްތަކަށް ދިރިއުޅުން ބަދަލުކުރާ އާއިލާތަކަށް ހިތްފަސޭހަ މާޙައުލެއް ޤާއިމުކޮށްދިނުމަށް، އެތަނުގައި ޕާކެއް ހެދުންވެސް އެއްބަސްވުމުގައި ހިމެނެއެވެ.
ސަރުކާރުގެ ޕީއެސްއައިޕީ ބަޖެޓުގެ ތެރޭގައި ހިމަނައިގެން ކުރިއަށްގެންދާ މި މަޝްރޫޢުއަކީ 84 މިލިއަނަށްވުރެ ގިނަ ރުފިޔާގެ މަޝްރޫޢުއެކެވެ. މި މަސައްކަތް އެސްޖޭ ކޮންސްޓްރަކްޝަންއާއި ހަވާލުކޮށްފައިވަނީ އެއް އަހަރު ދުވަހުގެ މުއްދަތުގައި މަސައްކަތް ނިންމާ ގޮތަށެވެ.
ލ.ގަމަކީ ރާއްޖޭގެ އެންމެ އާބާދީ ބޮޑެތި ރަށްތަކުގެ ތެރެއިން ރަށެކެވެ. ގަމުގައި ރަޖިސްޓްރީވެފައިވާ އާބާދީ 4800 އަށްވުރެ އިތުރެވެ.