ގއ. ދާންދޫއަށް އިތުރު ކުރި ބިމުގައި ސަރުކާރުން ހައުސިން މަޝްރޫއެއް ކުރިއަށްގެންދިޔުމަށް ނިންމަވާފައިވާކަމަށް މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފަރސްޓްރަކްޗަރ މުޙައްމަދު އަޞްލަމް ވިދާޅުވެއްޖެއެވެ.
މިނިސްޓަރ އަޞްލަމް މިފަދައިން ވިދާޅުވީ ގއ.ދާންދޫއަށް އަލަށް ހިއްކި 25 ހެކްޓަރުގެ ބިން ކައުންސިލާ ހަވާލުކުރުމަށް ބޭއްވި ރަސްމިއްޔާތުގައެވެ.
ދެހާހަށްވުރެ ބޮޑު އާބާދީއެއް އޮންނަ ގއ.ދާންދޫގެ ބިން ފުރި ޢާއްމު އިޖުތިމާޢީ ބޭނުންތަކަށާއި އިޤްތިޞާދީ އަދި ސިނާޢީ މަސައްކަތްތަކަށް ބޭނުންވާ ބިން ނެތުމުގެ ސަބަބުން މީގެ ކުރިންވެސް އެރަށުގެ ފަޅުން ބައެއް ވަނީ ހިއްކާފައެވެ. އެހެންނަމަވެސް އިތުރުވަމުންދާ އާބާދީއާއި ރަށަށް ގެންނަން ބޭނުންވާ ތަރައްޤީއަށް ބޭނުންވާ ބިން އެރަށުގައި އަނެއްކާވެސް ފުރިފައިވާކަމަށް ދަންދޫ ކައުންސިލުން ވިދާޅުވެއެވެ. އެހެންކަމުން ކައުންސިލާއި ރައްޔިތުންގެ އެދުމުގެ މަތިން އެރަށު ބިން ހިއްކުމަށް ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓރެކްޓިންގ ކޮމްޕެނީއާ ހަވާލުކުރީ 2020 ވަނަ އަހަރުގެ ތެރޭގައެވެ.
ދާންދޫ ބިން ހިއްކުމުގެ މަސައްކަތް ނިންމާ ކައުންސިލާ ހަވާލުކުރުމަށް ބޭއްވި ރަސްމިއްޔާތުގައި މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރަރސްޓްރަކްޗަރ މުޙައްމަދު އަޞްލަމް ވިދާޅުވީ ދާންދޫގައި އަލަށް ހިއްކި 25 ހެކްޓަރު ބިމުގައި މަދުވެގެން 700 ގޯތި ދޫކުރެވޭނެ ޖާގަ ލިބިގެންދާނެކަމަށެވެ.
މިނިސްޓަރ ވިދާޅުވީ ބޯހިޔާވަހިކަމުގެ މައްސަލައަށް ހައްލު ހޯދުމަށް ސަރުކާރުން މަޝްރޫއުތަކެއް ކުރިއަށްގެންދަވާކަމަށެވެ. އަދި ކުރިއަށް އޮތް އަހަރުގައިވެސް އެފަދަ މަޝްރޫޢުތައް ކުރިއަށްގެންދަވާނެކަމަށާއި، އެގޮތުން ދާންދޫގެ ހިއްކި ބިމުގައިވެސް ރަށުގެ ރައްޔިތުންނަށް ޚާއްސަކޮށްގެން ހައުސިން ޕްރޮގްރާމެއް ކުރިއަށްގެންދަވަން ނިންމަވާފައިވަކަމަށް އަސްލަމް ވިދާޅުވިއެވެ.
"ކުރިއާ އަޅާބަލާއިރު ބިންހިއްކުމުގެ މަޝްރޫއުތައް ބާރުދުވެލީގައި ކުރިއަށްދޭ. ހިއްކި ބިމަކީ ދާންދޫގައި މިހާރު އޮތް ބިމުގެ 80 އިންސައްތަ ބިމެއް. ބިން ރަނގަޅު ގޮތުގައި ޕްލޭންކުރާނެކަމަށް އުއްމީދުކުރަން." މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރަރސްޓްރަކްޗަރ މުޙައްމަދު އަޞްލަމް ވިދާޅުވިއެވެ.
ދާންދޫ ބިން ހިއްކުމުގެ މަޝްރޫއު ކުރިއަށްގެންދިޔަ އެމްޓީސީސީގެ ސީއީއޯ އާދަމް އާޒިމް ވިދާޅުވީ އެކުންފުނިން މިވަގުތު އެކަނިވެސް 70 އަށްވުރެ ގިނަ ރަށުގައި 100 އަށްވުރެ ގިނަ މަޝްރޫޢުތައް ކުރިއަށްގެންދާކަމަށެވެ.
ދާންދޫގެ ބިންހިއްކުމުގެ މަޝްރޫޢުއަށް އަލިއަޅުވާލައްވަމުން އާޒިމް ވިދާޅުވީ މި މަސައްކަތް ނިންމުމަށް އެއްބަސްވެފައި ވަނީ މިމަހުގެ 29 އަށްކަމަށާއި ނަމަވެސް އެމްޓީސީސީގެ އަމާޒަކީ ކޮންމެ މަސައްކަތެއްވެސް އެއްބަސްވުމުގައި ހިމެނޭ ތާރީޚްގެ ކުރިން ނިންމުންކަމަށެވެ.
"މިއީ ދާންދޫ ފަސްގަނޑަށްވުރެ އުސްފަސްގަނޑެއް. މި ބިމުން ރަށަށް ކަރަންޓް ދިނުމަށް އިންޖީނުގެއަށް އެޅުމަށް ބިން އޮންނާނެ. ރައްޔިތުން މޫދަށް އެރިލަން ބީޗް ހަދާނެ ސަރަޙައްދެއް ހެދޭނެ. އިޤްތިޞާދީ ހަރަކާތްތައް ކުރިއަށްގެންދެވޭނެ." އެމްޓީސީސީގެ ސީއީއޯ އާދަމް އާޒިމް ވިދާޅުވިއެވެ.
ދާންދޫ ފަޅުން 25 ހެކްޓަރުގެ ބިން ހިއްކާ އެސަރަޙައްދު ޙިމާޔަތްކުރުމަށް 833 މީޓަރުގެ ބޮޑު ހިލައިގެ ރިވެޓްމަންޓަކާއި 375 މީޓަރުގެ ބޮޑު ހިލައިގެ ބްރޭކްވޯޓަރ، 180 މީޓަރުގެ ބޮޑުހިލަައިގެ ގްރޮއިންސްއާއި 345 މީޓަރުގެ ޖީއީބޭގް ރިވެޓްމަންޓް ވަނީ ޖަހާފައެވެ.
ދާންދޫ ބިންހިއްކާ އެސަރަޙައްދު ޙިމާޔަތްކުރުމަށް ދައުލަތުގެ ބަޖެޓުން 186.6 މިލިއަން ރުފިޔާ ވަނީ ޚަރަދުކޮށްފައެވެ.
ދާންދޫގެ ބިން ހިއްކުމަށް އެމްޓީސީސީއާ ހަވާލުކުރީ 2020 ވަނަ އަހަރުގެ ނޮވެމްބަރު މަހުގެ 10 ވަނަ ދުވަހުގައެވެ. އަދި މަސައްކަތުގެ ޢަމަލީ މަސައްކަތް ފެށީ މިއަހަރުގެ ސެޕްޓްމްބަރުމަހުގެ ތެރޭގައެވެ. ނަމަވެސް އޭގެ ކުރިން މަސައްކަތް ފެށުމަށްޓަކައި ކުރަންޖެހޭ މަސައްކަތްތައް 2021 ވަނަ އަހަރުން ފެށިގެން ކުރަން ފެށިއެވެ.