ޕޯސްޓްމޯޓަމަށްފަހު ނިޝާމާގެ ހަށިގަނޑު މާލެގެނެސްފައިވާކަމަށް ފުލުހުން ވިދާޅުވެއްޖެއެވެ. ނިޝާމާގެ މަރުގައި ޝައްކު ކުރެވޭ ކަންތައްތަކެއް ހުރުމާއި ގުޅިގެން، އެ މައްސަލަ ފުލުހުން ދަނީ ތަޙުޤީގުކުރަމުންނެވެ.
ހދ. ނޮޅިވަރަން ހިތަށްފިނިވާގެ އުމުރުން 28 އަހަރުގެ ނިޝާމާ މުޙައްމަދު މަރުވެފައި އޮއްވާ ފެނުނީ މިމަހުގެ 10 ވަނަ ދުވަހު އޭނާ ދިރިއުޅުނު ގޭގެ ކޮޓަރި ތެރެއިންނެވެ. މި މައްސަލައިގައި ފުލުހުން ތުޙުމަތު ކުރަނީ ނިޝާމާގެ ފިރިމީހާ ފައިޞަލް ޢަލީއަށެވެ.
އެކަމުގެ ތުޙުމަތުގައި އޭނާ ހައްޔަރުކޮށްފައި ހުއްޓާ އަމިއްލައަށް މަރުވާން މަސައްކަތްކުރުމުން، ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދެމުންދަނިކޮށް މިމަހުގެ 19 ވަނަ ދުވަހު ވަނީ މަރުވެފައެވެ.
އިތުރު ތަޙުލީލުތަށް ހެދުމަށް ނިޝާމާގެ ޕޯސްޓްމޯޓަމް ހެދުމަށް ނިންމާ، އޭނާގެ ހަށިގަނޑު އިންޑިއާއަށް ފޮނުވާފައިވަނީ މިމަހުގެ 21 ވަނަ ދުވަހުއެވެ. ފުލުހުން ވިދާޅުވީ، ޕޯސްޓްމޯޓަމަށްފަހު ނިޝާމާގެ ހަށިގަނޑު މިއަދުގެ ވަގުތެއްގައި މާލެގެނެސްފައިވާކަމަށެވެ. މިކަމާގުޅޭ އިތުރު ތަފްޞީލެއް ފުލުހުން ދެއްވާފައެއްނުވެއެވެ.
ނިޝާމާގެ ހަށިގަނޑު ޕޯސްޓްމޯޓަމަށްފަހު މާލެގެނެސްފައިވާއިރު، އޭނާގެ ޖަނާޒާ ބޭއްވުމަށް ހަމަޖެހިފައިވަނީ މިއަދުގެ މަޣްރިބް ނަމާދަށްފަހު އާސަހަރާ މިސްކިތުގައެވެ.
ނިޝާމާގެ މަރާއި ގުޅިގެން އޭނާގެ ފިރިމީހާއަށް ތުހުމަތު ކުރެވެނީ އެ ޙާދިސާ ހިނގާދިޔައިރު އެގޭގައި އޭނާ އެކަނި ހުރުމާއި، އަދި ނިޝާމާ މަރުވެފައި އޮތްއިރު ކަރުގައި ޒަޚަމްތަކެއް ހުރުމުންނެވެ. އަދި ނިޝާމާ މަރުވެފައި އޮއްވާ ފެނުމުގެ ވަގުތުކޮޅެއް ކުރިން، ފައިޞަލް ރަށުން ފުރައިގެން ދިއުމުންނެވެ. ހާދިސާ ހިނގި ދުވަހު ފުލުހުން ވަނީ ފައިޞަލް ފުލުހުންގެ ހައްޔަރަށް ގެންގޮސްފައެވެ.
ނިޝާމާގެ މަރުގެ މައްސަލައިގައި ތުޙުމަތު ކުރާ ފައިޞަލް މަރުވިނަމަވެސް، މި މައްސަލައިގެ ތަޙުޤީޤު ހުއްޓާނުލާނެކަމަށް ފުލުހުން ވަނީ ވިދާޅުވެފައެވެ. އަދި ފުލުހުންގެ ބެލުމުގެ ދަށުގައި ވަނިކޮށް ފައިޞަލް އަމިއްލައަށް މަރުވާން މަސައްކަތްކޮށް އެފަދަ ޢަމަލެއް ހިންގި މައްސަލަވެސް ފުލުހުން ދަނީ ބަލަމުންނެވެ.