ގއ.މާމެންދޫގައި ސަރުކާރުން އިމާރާތްކުރި އައު އިންޖީނުގެއާއި ފެނަކަ އޮފީސް ހުޅުވާ ޚިދުމަތް ދޭން ފަށައިފިއެވެ.
މި ޚިދުމަތް ފައްޓަވައިދެއްވީ މާމެންދޫއަށް ކުރެއްވި ޒިޔާރަތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްއެވެ. މި ރަސްމިއްޔާތުގައި ރައީސުލްޖުމްހޫރިއްޔާވަނީ ފެނަކައިގެ ސްމާޓް މީޓަރުގެ ޚިދުމަތްވެސް އިފްތިތާޙްކޮށްދެއްވާފައެވެ. މިއީ ފެނަކައިގެ ޚިދުމަތްތައް ޑިޖިޓަލައިޒް ކުރުމުގެ ގޮތުން ތަޢާރަފް ކުރި ޚިދުމަތެކެވެ. މި ޚިދުމަތާއެކު ގޭބިސީތަކުގައި ކަރަންޓް ބޭނުން ކުރާވަރު ބަލާލެވޭނެއެވެ.
1500 އަށްވުރެ ގިނަ މީހުން މިހާރު ދިރިއުޅެމުން އަންނަ މާމެންދޫގައި މީގެ ކުރިން ކަރަންޓްގެ ޚިދުމަތް ފޯރުކޮށްދެމުން އައިސްފައިވަނީ ޖާގައިގެ ގޮތުން ކުޑަ 23 އަހަރުވެފައިވާ އިންޖީނުގެއެއްގައެވެ. މިއިންޖީނުގެ 23 އަހަރުުގެ ތެރޭ ރަށުގެ 24 ސަރަޙައްދަކަށް ބަދަލުކޮށް ޚިދުމަތް ދެމުން އައެވެ. އޭރުވެސް އިންޖީނުގެއިން ކަރަންޓް ދެމުން އަންނައިރު ކަޅުބޯ ދުމުގެ އަސަރާއި އަޑުގަދަވުމުގެ މައްސަލަތައް ރައްޔިތުންނަށް ކުރިމަތިވެއެވެ.
މިބޮޑު ތަކުލީފުން ރައްޔިތުން ސަލާމަތް ކުރުމަށްޓަކައި ސަރުކާރުން ފެނަކައާ ހަވާލުކުރީ އިންޖީނުގެ މީހުން ދިރި ނޫޅޭ ސަރަހައްދަށް ބަދަލުކުރުމަށެވެ. އެގޮތުން މާމެންދޫގެ އައު އިންޖީނުގޭގެ ބިންގާ 2019 ވަނަ އަހަރު އަޅާ މިހާރު މިވަނީ ޚިދުމަތް ދޭން ފަށާފައެވެ.
މާމެންދޫގެ އައު އިންޖީނުގެ ހުޅުވުމަށް ބޭއްވި ރަސްމިއްޔާތުގައި ފެނަކައިގެ މެނޭޖިން ޑިރެކްޓަރ މުޙައްމަދު ސަޢީދު ވިދާޅުވީ ޒަމާނީ ވަސީލަތްތަކާއެކު އިންޖީނުގެއާއި ނެޓްވޯކް ޤާއިމްވެގެންދިއުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށެވެ. އަދި މިހިތްހަމަޖެހުން މިލިބުނީ އިޚްލާސްތެރި ނިޔަތަކާއެކު އޯގާތެރި ހިތެއްގެ ވެރިއަކު މިޤައުމުގެ ރައީސަކަށް އިޚްތިޔާރުކުރެވުނީތީ ކަމަށް ސައީދު ވިދާޅުވިއެވެ. އަދި ޤާއިމްކުރެވުނު މިއިންޖީނުގެއާއި ނެޓްވޯކާއެކު ރަށުގެ އުމްރާނީ ތަރައްޤީއަށް ކިތަންމެ ބޮޑު ޕްރޮޖެކްޓެއް އަދި ކިތަންމެ ގިނައިން ކަރަންޓް ބޭނުން ކުރަންޖެހުނަސް އެއްވެސް ދަތިކަމެއްނެތި ކަރަންޓް ދެވޭނެ ހުރިހާ މަގެއް ފަހިވެގެންދާނެ ކަމަށް ވެސް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ ވިދާޅުވިއެވެ.
މާމެންދޫގައި އަލަށް އިމާރާތް ކުރި އިންޖީނުގެއަކީ ކުރީގެ އިންޖީނުގެއާ ބަލާއިރުވެސް ޖާގައިގެގޮތުން ތަނަވަސް އިމާރާތެކެވެ. އެގޮތުން އިންޖީނުގެ ކުރީގެ ބޮޑުމިނަކީ 89 އަކަމީޓަރެވެ. ނަމަވެސް އައު އިންޖީނުގެ ބޮޑުމިނަކީ 206 އަކަމީޓަރެވެ. ކުރިން މިރަށުގައި ހުރީ 1000 ކިލޯވޮޓުގެ ޖެންސެޓް ކެޕޭސިޓީއެކެވެ. ނަމަވެސް އައު އިމާރާތުގައި 1400 ކިލޯވޮޓުގެ ކެޕޭސިޓީގެ އިންޖީނު ވަނީ ބަހައްޓާފައެވެ.
ޢައު އިންޖީނުގެ ޑިޒައިން ކޮށްފައިވަނީ 600 ކިލޯވޮޓުގެ 3 ޖަނަރޭޓަރ ސެޓް ބެހެއްޓޭގޮތަށް ކަމަށް ފެނަކައިން ވިދާޅުވެއެވެ. އަދި 800 ކިލޯވޮޓުގެ 1 ޖެންސެޓް ބެހެއްޓޭނެ ކަމަށްވެސް ފެނަކައިން ވިދާޅުވެއެވެ. އައު އިންޖީނުގޭގައި ޑެގް ރޫމް، ކޮންޓްރޯލް ރޫމް، ވޯކް ޝޮޕް، ސްޓޯރ، ޕޭންޓްރީ، ފާޚާނާ، ޗިމްނީ، ޑޭ ޓޭންކް، އަދި ޑީސަން ޓޭންކް ހުރެއެވެ.
ގއ. މާމެންދޫގައި އައު އިންޖީނުގޭގެ މަސައްކަތް ކޮށްފައިވަނީ "ޓިކް ޓެކް އިންވެސްޓްމަންޓާ"އާއި ޙަވާލުކޮށްގެންނެވެ. މި މަސައްކަތަށް 5 މިލިއަނަށްވުރެ ގިނަ ރުފިޔާ ވަނީ ޚަރަދުކޮށްފައެވެ.