މާލެ ސަރަޙައްދުގައި ދިރިއުޅޭ ކިޔަވާ ކުދިން ތިބުމަށް ޚާއްސަކޮށްގެން ހުޅުމާލެ ދެވަނަ ފިޔަވަހީގައި އެޅުމަށް ހަމަޖެހިފައިވާ އިމާރާތުގެ ބިންގާ އަޅައިފިއެވެ. މިއިމާރާތުގެ މަސައްކަތް ހަވާލުކޮށްފައިވަނީ ރޯޓައިމް އިންޖީނިއަރިންގ އެންޑް ޓެކްނޮލޮޖީއާއެވެ.
ހުޅުމާލޭގައި މުޅިން އާ ކޮންސެޕްޓަކަށް ތަރައްޤީ ކުރުމަށް ހަމަޖެހިފައިވާ މިފްލެޓްތަކަކީ "ކޯލިވިންގ ހައުސިން" މަޝްރޫޢުގައި ދަށުން އެޅުމަށް ހަމަޖެހިފައިވާ ފްލެޓްތަކެކެވެ.
އެޗްޑީސީން ވިދާޅުވީ މި މަޝްރޫޢުގެ ދަށުން "ކޯ ޝެއަރ" ނުވަތަ އެހެން މީހުންނާއިއެކު ދިރިއުޅޭ ކޮޓަރި އާއި އަސާސީ ޚިދުމަތްތަކަށް ބޭނުން ކުރާ ބަދިގެ ފަދަ ތަންތަން ހިއްސާކޮށްގެން ދިރިއުޅުމަށް ސިންގަލް އަދި ޓްވިން ޝެއަރ ކޮޓަރި ހެދުމަށް ހަމަޖެހިފައިވާކަމަށެވެ. ރާއްޖެއަށް މުޅިން އާ ކޮންސެޕްޓަކަށް ފަރުމާ ކޮށްފައިވާ މިމަޝްރޫޢުގެ އެންމެ ބޮޑު މަގުސަދަކީ ގްރޭޓަރ މާލެ ރީޖަންގައި ދިރިއުޅޭ ކިޔަވާ ކުދިން، ނުވަތަ ބޮޑު އަގުދީގެން ތަންތަން ހިފައިގެން އުޅޭ ފަރާތްތަކަށް އަތްފޯރާފަށުގައި ބޯހިޔާވަހިކަން ފޯރުކޮށްދިނުން ކަމަށް އެޗްޑީސީން ވިދާޅުވެއެވެ.
މި މަޝްރޫގެ ބިންގާ އެޅުމަށް ބޭއްވި ރަސްމިއްޔާތުގައި، ބޯހިޔާވަހިކަމުގެ މައްސަލައަކީ މާލެ ސަރަހައްދަށް ދިމާވެފައިވާ ބޮޑު މައްސަލައެއްކަން ފާހަގަކުރައްވަމުން އެޗްޑީސީގެ މެނޭޖިން ޑިރެކްޓަރ އަޙްމަދު އާތިފް ވިދާޅުވީ ޚާއްސަގޮތެއްގައި ބޮޑު އަގު ދީގެން މާލޭގައި ދިރިއުޅޭ ކިޔަވާ ކުދިންނަށް މިމައްސަލައަކީ ބޮޑު މައްސަލައެއްކަމަށެވެ. އަދި މިމަޝްރޫއުގެ ސަބަބުން މިމައްސަލައަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށް އުއްމީދު ކުރައްވާކަމަށް އާތިފް ވިދާޅުވިއެވެ.
"ކޯ ލިވިންގ" ކޮންސެޕްޓަށް އެޗް.ޑީ.ސީ އިން ފަރުމާކޮށްފައިވާ މި ޕްރޮޖެކްޓުގައި އައުޓްޑޯ ޖިމް، ޕޭންޓްރީ އަދި ކޮންމެ ފަންގިފަލައެއްގައި އެންމެންނަށް ބޭނުންކުރެވޭނެ ބަދިގެއެއް ހިމެނޭނެއެވެ. މީގެއިތުރުންވެސް އެހެނިހެން ޒަރޫރީ އަދި އަސާސީ ބޭނުންތަކަށް ލޯންޑްރީ އާއި ފިހާރަ ފަދަ އެހެނިހެން ޚިދުމަތްތަކެއް މި ބިލްޑިންގއިން ލިބިގެންދާނެ ކަމަށް އެޗްޑީސީން ވިދާޅުވެއެވެ.
މިއިމާރާތުގެ 2 ވަނަ ފަންގިފިލައިން ފެށިގެން 9 ވަނަ ފަންގިފިލާއަށް ޓްވިން ޝެއަރިންގ އަދި ބާކީ ފްލޯތަކުގައި ސިންގަލް ރޫމް ތަރައްޤީ ކުރުމަށް ވަނީ ހަމަޖެހިފައެވެ. މިތަން ކުއްޔަށް ދެނީ ހަމައެކަނި ދިވެހިންނަށެވެ. 14 ފަންގިފިލާގެ މި އިމާރާތް އެޅުމަށް ހަމަޖެހިފައިވަނީ ހުޅުމާލެ ދެވަނަ ފިޔަވަހީގެ 16،934.07 އަކަފޫޓުގެ ބިމެއްގައެވެ.
އެޗް.ޑީ.ސީން ކުރިއަށް ގެންދިޔަ ދިރާސާއަކުން ދެއްކިގޮތުގައި ކިޔެވުމަށާއި އާމްދަނީ ހޯދުމަށް މިސަރަހައްދުގައި ދިރި އުޅޭ ފަރާތްތަކުން އާންމު ގޮތެއްގައި ކުލީގެ ގޮތުގައި މަހަކު 5000 ރުފިޔާ ހޭދަކުރެއެވެ. މީގެތެރެއިން %56 އަށް ވުރެއް ގިނަ ފަރާތުން މިމަޝްރޫޢަށް ޝައުގުވެރިކަން ފާޅުކޮށްފައިވެއެވެ. އަދި މި ފަދަ ކޮންސެޕްޓަކަށް ފަރުމާ ކުރެވިފައިވާ ގެދޮރުވެރިކަމެއްގައި 1 އަހަރަށް ވުރެ ގިނަ އަހަރު ދިރިއުޅޭނެ ކަމަށް ލަފާކުރެވޭ ކަމަށް އެޗްޑީސީން ވިދާޅުވެއެވެ.