އިތުރު 3 އެއަރޕޯޓެއް އެޅުމަށް ބިން ހިއްކުމަށް ތައްޔާރުވަމުން އަންނަ ކަމަށް މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރަރސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ސަރުކާރުން މިހާރުވެސް އަންނަނީ ރާއްޖޭގެ 4 ސަރަޙައްދެއްގައި އެއަރޕޯޓް އެޅުމުގެ މަސައްކަތް ކުރަމުންނެވެ.
މިނިސްޓަރ އޮފް ޕްލޭނިން ހައުސިން އެންޑް އިންފްރަރސްޓްރަކްޗަރ މުހައްމަދު އަސްލަމް ވިދާޅުވީ ވައިގެ މަގުން ފަސޭހައިން ދަތުރުކުރެވޭނެ އިންތިޒާމް ހަމަޖެއްސުމުގެ ގޮތުން އެއަރޕޯޓްތައް ތަރައްޤީކުރުމުގެ މަސައްކަތް ކުރަމުން އަންނަކަމަށެވެ. އެގޮތުން މިހާރުވެސް 4 އެއަރޕޯޓެއް އެޅުމުގެ މަސައްކަތް ކުރަމުން އަންނަކަމަށާއި އިތުރު 3 އެއަރޕޯޓެއް އެޅުމަށްޓަކަށް ބިން ހިއްކުމަށް ތައްޔާރުވަމުން އަންނަކަމަށެވެ. މިނިސްޓަރ ވިދާޅުވީ މިއެއަރޕޯޓްތަކުގެ މަސައްކަތްވެސް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ މިދައުރުގައި ފައްޓަވާނެކަމަށެވެ.
އަލަށް އެއަރޕޯޓް އެޅުމަށް ހަމަޖެހިފައިވަނީ ހދ. މަކުނުދޫއާއި، ބ. ތުޅާދޫއާއި، ށ. ބިލެތްފަހީގެ އިތުރުން ތ. ވިލުފުށީގައެވެ.
ރާއްޖޭގެ ކޮންމެ ރަށަކުން 30 މިނިޓުން ދަތުރުކޮށްފައި ދެވޭ ހިސާބުގައި އެއަރޕޯޓުތައް ތަރައްޤީކުރުމަކީ ސަރުކާރުގެ މުހިންމު ސިޔާސަތެކެވެ. އެގޮތުން އެއަރޕޯޓް ނެތް އަތޮޅުތަކުގައި އެއަރޕޯޓްތައް އެޅުމުގެ މަސައްކަތް އަންނަނީ ކުރަމުންނެވެ. އެގޮތުން މ.އަތޮޅާއި ފ.އަތޮޅުގައިވެސް އެއަރޕޯޓް އެޅުމުގެ މަސައްކަތް ކުރަމުން އަންނަކަން ފާހަގަކުރެވެއެވެ. ފ.މަގޫދޫއާއި މ.މުލީގައި އަޅާ އެއަރޕޯޓްތަކުގެ މަސައްކަތް މިއަހަރުގެ ތެރޭގައި ނިންމުމަށް އެމަސައްކަތުގެ ކޮންޓްރެކްޓަރ އެމްޓީސީސީން އަންނަނީ މަސައްކަތް ކުރަމުންނެވެ. މީގެ އިތުރަށް ފަރެސްމާތޮޑާ އެއަރޕޯޓް ހުޅުވުމަށް ކުރަންޖެހޭ މަސައްކަތްތައް ކުރަމުން އަންނައިރު އަލިފުށީ އެއަރޕޯޓް އެޅުމަށްޓަކައި ބިން ހިއްކުމުގެ މަސައްކަތް ނިންމާ އެއަރޕޯޓް އެޅުމުގެ މަސައްކަތް އަންނަނީ ކުރަމުންނެވެ. މީގެ އިތުރަށް މިހާރު ހުރި އެއަރޕޯޓްތައް ތަރައްޤީކުރުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ.
ސަރުކާރުން އިޢުލާންކޮށްފައިވާ އެއަރޕޯޓްތަކުގެ މަސައްކަތް ކޮންޓްރެކްޓަރ ފައިނޭންސް އުސޫލުން ކުރިއަށް ނުގެންދެވިއްޖެނަމަ، ދަޢުލަތުގެ ބަޖެޓުން ޚަރަދުކޮށްގެންވެސް މަސައްކަތް ނިންމާނެ ކަމަށް ޕްލޭނިން މިނިސްޓަރ އަސްލަމް ވަނީ ވިދާޅުވެފައެވެ. މިގޮތުން ހދ. މަކުނުދޫއާއި، ބ. ތުޅާދޫއާއި، ށ. ބިލެތްފަހީގެ އިތުރުން ތ. ވިލުފުއްޓާއި، ފ. މަގޫދޫ އާއި ރ. އަލިފުށީގައި އެއަރޕޯޓް ތަރައްޤީކުރުމަށް 133 މިލިއަން ޑޮލަރު ހޭދަވާނެ ކަމަށް ޕްލޭނިންގ މިނިސްޓްރީން ލަފާކޮށްފައިވެއެވެ. އެއީ ދިވެހި ރުފިޔާއިން 2 ބިލިއަނަށްވުރެ ގިނަ ރުފިޔާއެވެ.
އަދި ޑޮމެސްޓިކް 6 އެއަރޕޯޓް ތަރައްޤީކުރުމަށް ފައިނޭންސްކުރުމަށް ކުންފުނިތަކާ މިހާރު ވަނީ ހަވާލުކޮށްފައެވެ.