ހއ. ހޯރަފުށީގައި އިންޓަރނޭޝަނަލް ސުކޫލް ހިންގުމަށް 3 ފަރާތަކުން ޝައުގުވެރިކަން ފާޅުކޮށްފިއެވެ.
އެރަށު ކައުންސިލުން މިހާރު ވަނީ ޝައުގުވެރިކަން ފަޅުކުރި 3 ފަރާތަށް ބިޑް ހުށައެޅުމުގެ މުއްދަތު މިމަހުގެ 22 އަށް އިތުރުކޮށްދީފައެވެ. ކުރިން އެ މުއްދަތު ކަނޑައަޅާފައި އޮތީ މިިދޔަ މަހުގެ 20 ވަނަ ދުވަހަށެވެ.
ހޯރަފުށީގައި އިންޓަރނޭޝަނަލް ސުކޫލެއް ތަރައްޤީކުރުމުގެ މަގްސަދަކީ ޕްރީ ސުކޫލް މަރުހަލާއިން ފެށިގެން ކީ ސްޓޭޖް ފަހަކާއި ދެމެދު ފެންވަރު ރަނގަޅު ޒަމާނީ ތައުލީމު ހޯރަފުށީގައި ހުރެގެން ލިބުމުގެ ފުރުސަތު ދަރިވަރުންނަށް ހޯދައިދިނުންކަމަށް ހޯރަފުށީގެ ކައުންސިލުން ފާހަގަކުރެވެ.
މި ޕްރޮޖެކްޓުގެ ދަށުން ސްކޫލް ހިންގުމަށް ވަށާ ފާރު ރާނާ، ގޭޓް ހަރުކޮށްފައިވާ 11406 އަކަފޫޓޫގެ ބިމެއްގައި ހުރި އިމާރާތެއް ހަވާލުކުރާނެއެވެ. މިތަނުގައި ޕްލޭ ގްރައުންޑް އަދި ގުދަނަކާއި ޕަބްލިކް ފާހާނާއަކާއި އަދި ދަރިވަރުންގެ ހާއްސަ ފާހާނާއެއް ހުންނާނެއެވެ. މީގެއިތުރުން ދަރިވަރުން ކިޔެވުމަށް ބޭނުން ކުރާނެ ގޮނޑި މޭޒް ކައުންސިލުން ފޯރުކޮށްދޭނެއެވެ.
ހޯރަފުށީ ކައުންސިލުން ބުނީ މި ސްކޫލް ހިންގަން ހަވާލުކުރާނީ 5 އަހަރާއި 15 އަހަރާއި ދެމެދުގެ މުއްދަތަކަށްކަމަށެވެ. އަދި ސްކޫލް ހަވާލުކުރާ ފަރާތުން 2023 އިން 2024ގެ ދިރާސީ އައު އަހަރާއެކު ސުކޫލްގައި ކިޔަވައި ދޭން ފަށަންޖެހޭނެކަމަށްވެސް ކައުންސިލުން ބުނެއެވެ.
ހޯރަފުށީ ސްކޫލްގައި ކިޔަވައިދިނުމަށްޓަކައި 3 ކްލާސްރޫމް ހުންނާނެކަމަށާއި 200 އެއްހާ ކުދިންނަށް ކިޔަވައިދެވޭނެކަމަށް ކައުންސިލުން ބުނެއެވެ. އަދި ސްކޫލްއަށް ބޭނުންވާ ސާމާނު ފޯރުކޮށްދޭނީ ކައުންސިލުންކަމަށާއި ޕްރީ ސްކޫލްއިން ފެށިގެން މަތީ ޘާނަވީ މަރުހަލާއަށް ކިޔަވައިދިނުމުގެ ފުރުޞަތުވެސް އޮންނާނެއެވެ.
ހޯރަފުށީ އިންޓަރނޭޝަނަލް ސްކޫލް އިމާރާތްކޮށްފައިވަނީ އެމްޓީސީސީގެ ސީއެސްއާރުގެ ދަށުންނާއި ކައުންސިލްގެ ބަޖެޓުން 2 މިލިޔަނެއްހާ ރުފިޔާ ޚަރަދުކޮށްގެންނެވެ. މި ސްކޫލް އިމާރާތް ކުރުމުގެ މަސައްކަތް ފަށާފައިވަނީ މިިދިޔަ އަހަރުގެ އޭޕްރީލް މަހުއެވެ.