މާލޭ ނީލަން ފިހާރަ ސަރަހައްދުގައި އަލިފާން ރޯވެ އަނދައި ހުލިވެފައިވާއިރު އެ ސަރަހައްދުގައި އުޅޭއިރު މާސްކް އަޅަން ހެލްތު ޕްރޮޓެކްޝަން އެޖެންސީ، އެޗްޕީއޭއިން އިލްތިމާސްކޮށްފިއެވެ.
މިއަދު ފަތިހު ނީލަން ފިހާރައިގައި ހިނގި އަލިފާނުގެ ހާދިސާގައި އެތަންއެއްކޮށް ވަނީ އަނފާ ހުލިވެފައެވެ. އަދި އަލިފާނުގެ އަސަރު ގަދަވެ ބޯ ދުންގަނޑު ވަނީ ޖައްވުގެ ތެރެއަށް ފެތުރިފައެވެ. މިކަމާއި ގުޅިގެން އެޗްޕީއޭއިން ވަނީ އެ ސަރަހައްދުގައި އުޅޭއިރު އަނގައާއި ނޭފަތް ނިވާކުރުމަށް އިލްތިމާސްކޮށްފައެވެ.
އަލިފާން ރޯވެ ވަރަށް ބޮޑަށް ދުންގަނޑު ފެތުރުނުއިރު ދުމުން ރައްކާތެރިވުމަށް ގޭގެ ދޮރުތަކާއި ކުޑަދޮރުތައް ބަންދުކުރުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.
ދުމުގެ ސަބަބުން ނޭވާލާ ނިޒާމުގެ އިތުރުން ހިތުގެ ބަލި ހުންނަ ފަރާތްތަކަށް ކުރާ ނޭދެވޭ އަސަރު ބޮޑުވުން އެކަށީގެންވެއެވެ. އަދި އެއްވެސް މީހަކަށް ނޭވާ ކުރުވެ، ނޭވާލާން އުނދަގޫވެ، ގަދަޔަށް ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯދުމަށްވެސް އެޗްޕިއޭއީން ވަނީ އިލްތިމާސްކޮށްފައެވެ.
ނީލަން ފިހާރަ ސަރަހައްދުގައި ރޯވި އަލިފާންގަނޑު މިހާރު ވަނީ ކޮންޓްރޯލް ކޮށްފައެވެ. އަލިފާންގަނޑު ކޮންޓްރޯލް ކުރިއިރު އެތަނުގެ އިތުރުން، ޖެހިގެން ހުރި ބިދޭސީން ދިރިއުޅޭ ތަންތަނަށްވެސް ވަނީ ގެއްލުން ލިބިފައެވެ.