އެމްޑަބްލިއުއެސްސީން ފޯރުކޮށްދެމުން އަންނަ ފެނުގެ ޚިދުމަތުގެ ކެޕޭސިޓީ އިތުރުކުރުމަށްޓަކައި 3000 ޓަނުގެ ފެން އުފެއްދޭނެ ޕްލާންޓެއް ގެނައުމުގެ މަސައްކަތް ކުރަމުން އަންނަކަމަށް އެ ކުންފުނީގެ މެނޭޖިން ޑިރެކްޓަރ ހަސަން ޝާހް ވިދާޅުވެއްޖެއެވެ.
މާލޭގެ އާބާދީއަށް އަންނަމުންދާ ބަދަލާއެކު ދުވާލެއްގެ މައްޗަށް ފެން އުފައްދަންޖެހޭ މިންވަރު އިތުރުވެ ފެނުގެ ޑިމާންޑް އަންނަނީ ބޮޑުވަމުންނެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްވަމުން މާލޭ ވޯޓަރ އެންޑް ސްވަރޭޖް ކޮމްޕެނީގެ މެނޭޖިން ޑިރެކްޓަރ ހަސަން ޝާހް ވިދާޅުވީ މާލޭގައި ފެނުގެ ޚިދުމަތް ފޯރުކޮށްދިނުމަށްޓަކައި މިހާރުވެސް 20000 ޓަނުގެ ފެން އުފައްދަމުން އަންނަކަމަށާއި ދުވާލެއްގެ މައްޗަށް 18000 ޓަނުގެ ފެން ބޭނުން ކުރަމުން އަންނަކަމަށެވެ. މީގެ އިތުރަށް ހުޅުމާލޭގެ އާބާދީ އިތުރުވަމުން އަންނަގޮތުން ފެނުގެ ޑިމާންޑް ބޮޑުވަމުން އަންނަކަމަށާއި މިހާރުވެސް ދުވާލެއްގެ މައްޗަށް 11000 ޓަނުގެ ފެން ރައްޔިތުން ބޭނުން ކުރަމުން އަންނަކަމަށެވެ.
ފެނުގެ ޑިމާންޑް އިތުރުވަމުން އަންނަވަރަކަށް ފެން އުފައްދާ މިންވަރުވެސް އިތުރުކުރުމުގެ މަސައްކަތް ކުރަމުން އަންނަކަން ފާހަގަކުރައްވާ ޝާޙް ވިދާޅުވީ 3000 ޓަނުގެ ފެން އުފެއްދޭ ޕްލާންޓް ގެނައުމަށް މަސައްކަތް ކުރަމުން އަންނަކަމަށެވެ. އަދި އެ ޕްލާންޓް ގެންނަނީ ސިންގަޕޫރުން ކަމަށާއި އެޚިދުމަތް ދެވޭނެކަމަށް އަންދާޒާ ކުރަނީ އަންނަ އޯގަސްޓްމަހުކަމަށެވެ.
"މުޅިން ފެނުގެ ޚިދުމަތުން މަހުރޫމް ނުވެވޭނެ ގޮތަކަށް ވިސްނުން ބަހައްޓައިގެން މަސައްކަތް މިކުރަނީ. ގުދުރަތީ ހާދިސާތަކާއި އެހެނިހެން ހާދިސާތަކުން ފެނުގެ ޕްރެޝަރ ދަށްކުރަންޖެހުނަސް ފެނުގެ ޚިދުމަތް މުޅިން މެދުކެނޑުނަ ނުދިނުމަށް މަސައްކަތް ކުރަމުން މިދަނީ." އެމްޑަބްލިއުއެސްސީގެ މެނޭޖިން ޑިރެކްޓަރ ހަސަން ޝާހް ވިދާޅުވިއެވެ.
އެމްޑަބްލިއުއެސްސީން މިވަގުތު މާލޭގައި ފެން އުފައްދަމުން އަންނަނީ 3 ސަރަޙައްދަކުންނެވެ. އަދި ހުޅުމާލެއިންވެސް ފެންއުފެއްދުމުގެ މަސައްކަތް އެ ކުންފުނިން އަންނަނީ ކުރަމުންނެވެ. މި މަސައްކަތް ފުޅާކުރުމަށްޓަކައި ސަރުކަރުން މިހާރު ވަނީ އެމްޑަބްލިއުއެސްސީއަށް އަށް އިތުރު ބިމެއްވެސް ދޫކޮށްފައެވެ. އެގޮތުން އެ ކުންފުނިން އުފައްދާ ފެން ރައްކާކުރުމަށް ކުރީގެ އެސްޓީއޯ ރެޑީމިކްސް އިން ބިން ވަނީ ދީފައެވެ.
ޝާހް ވިދާޅުވީ އެތަނުގައި ޓޭންކްތައް ހެދުމަށްޓަކައި މިހާރު ބަޔަކާ ހަވާލުކޮށް އެ މަސައްކަތް ފެށުމަށް ކުރަންޖެހޭ މަސައްކަތްތައް ކުރަމުން އަންނަކަމަށެވެ. އަދި އެތަނުގައި 13000 ޓަނުގެ ފެން އުފެއްދޭވަރުގެ 2 ޓޭންކް ބެހެއްޓުމަށް ހަމަޖެހިފައިވާ ކަމަށްވެސް ވިދާޅުވިއެވެ. މިއާއެކު އަބަދުވެސް ފުދޭވަރެއްގެ ސްޓޮކެއް ހުންނާނެކަން ޝާހް ފާހަގަކުރެއްވިއެވެ.