އޯކިޑްމަގުގައި ހުރި އީވްނިންގ ކެފޭގައި ރޯވި އަލިފާންގަނޑު ނިއްވާލައިފިއެވެ.
މ. އީވްނިންގ ކެފޭގައި އަލިފާނުގެ ޙާދިސާއެއް ހިނގައިގެން އުޅޭކަމުގެ މަޢުލޫމާތު އެމް.އެން.ޑީ.އެފްގެ ފަޔަރ އެންޑް ރެސްކިޔު ޓީމަށް ލިބިފައިވަނީ މިއަދު އިރުއޮއްސި 18:12 ހާއިރެވެ. އެއާއެކު އެމް.އެން.ޑީ.އެފްގެ ފަޔަރ އެންޑް ރެސްކިއު ޓީމުން ވަނީ އަލިފާންގަނޑު ކޮންޓްރޯލްކޮށް ނިއްވާލުމުގެ މަސައްކަތް ފަށާފައެވެ.
މި ހާދިސާގައި އެއްވެސް މީހަކަށް ގެއްލުމެއް ލިބިފައިވާކަމުގެ މަޢުލޫމާތެއް ލިބިފައެއްނުވެއެވެ.
މި އަލިފާނުގެ ޙާދިސާ ހިނގާފައިވަނީ އީވްނިންގ ކެފޭގެ ފުރަތަމަ ފަންގިފިލާގައި ހުރި ބަދިގޭގައެވެ. މި ޙާދިސާ ހިނގަން މެދުވެރިވި ސަބަބެއް އަދި ޙާދިސާގައި ލިބުނު ގެއްލުންތަކުގެ ތަފްޞީލެއް އަދި ކަމާބެހޭ ފަރާތްތަކުން ހާމަކޮށްފައެއްނުވެއެވެ.
އޯކިޑްމަގުގައި ހިންގަމުން އަންނަ އީވްނިންގ ކެފޭއަކީ ދިވެހިންނާއި ބިދޭސީންގެ މެދުގައިވެސް މަޤުބޫލު ކެފޭއެކެވެ.